80後月儲2萬 想買低入場費股票 呢幾隻值得考慮   |龔成信箱 |中國銀行|中廣核電力|領展|盈富

80後月儲2萬 想買低入場費股票 呢幾隻值得考慮 |龔成信箱 |中國銀行|中廣核電力|領展|盈富

【入場費】今日龔成信箱,不少讀者想為未來作打算,如何實行投資計劃,亦提及熱門的股票以及投資心態等問題,當中包括收息股、止蝕、月供股票、手續費、投資物業,以及儲蓄保險等提問。

撰文:龔成 |圖片:新傳媒資料庫、unsplash

 1.入場費

龔sir您好,本人現37歲,月入約4萬,每月可儲2萬,請問可作以下投資計劃嗎?

每月供: 3000盈富,3000煤氣,2000長建,2000建行

另每月餘下的想投資一些入場費夠便宜的企業,可考慮這些嗎: 中國龍工,中國重汽,火岩控股,阿里健康。謝謝指教!

 

龔成老師:

你每月可儲$2萬,將其中$1萬作月供股票,適合的,而上述的股票都是有質素的股票,金額亦適合,基本上已經可以進行計劃。

至於其餘的股票,不要只是貪平,企業質素是更重要的考慮因素。同埋,入場費低不等於有投資價值。

中國龍工(3339)質素中等,業務有點波動,這刻估值不算特別平,但都算合理。

中國重汽(3808)質素不差,但近年股價上升了較多,處合理區略貴水平。

火岩控股(8345)業務波動,但可能有潛力,只可小注投資。

阿里健康(0241)業務波動,股價上落大,雖然這股有增長潛力,但從值博率角度分析,則只屬一般般。

(對照龔成信箱:Q6976)

2.合理價值

本人30歲 現持有700萬
有150萬 定期,100萬儲蓄保險。350萬現金

其中100萬股票:992、144、2333、546、6839

想問問怎計算這些資產合理價值是多少?
應該幾錢再加注?

144,6839 算是優質資產嗎
992,2333,546 應否繼續加注

144暫時持有最多,因為覺得都算系穩定現金流
992 個人認為現價低估
6839 負債不斷上升,但諗為其環保資產應有不錯既投資價格
546 必需品,但對該公司既低價擴佔市場,好像很難有穩定回報
2333 單車利潤高,suv龍頭

我應該集中持有依幾隻股票嗎?

 

龔成老師:

先講你的整體財富,你30歲,其實有相當的增長力,同埋可以承受略高的風險,因此你應投資更多在「資產」項目上,例如物業、車位、優質股,等你的財富有更大的增值,物業及車位現時都不平,集中投資優質股較好。你已做好防守的部分,之後應將更多資金投資在股票。

$700萬中,將$400萬投資股票都可以,但不用一次過入,慢慢分注,同埋把握跌市時買平貨,這是最好的策略。

聯想集團(0992)質素中等,現時估值合理,但不值得投資太多。

招商局港口(0144)質素中上,但增長不算強。

長城汽車(2333)有質素,但股價波動,同時中短期較弱。

阜豐集團(0546)質素都不算差,但獨特性不強,不用太大注。

雲南水務(6839)雖然本業有質素,但負債問題令人擔心,不宜大注。

上述股票,都算可以持有,但你之後的資金,最好投資其他更優質的股票中,如果你未有選股的能力,可考慮盈富(2800)。

另外,你本身持有財富不少,如果能有效理財,財富的增長將會好可觀,最好努力學更多投資知識,對你長遠的財富有好深遠的影響。

(對照龔成信箱:Q6942)

3.恆生中國企業(2828)

我現時月供6000 分別係
700 $2000
2828 $2000
AIA $2000

想加大月供至$8000 到$10000
應該揀做823做第4隻股票?

 

龔成老師:

你原有月供的股票都是有質素的,可以保持長期進行。如果想加多啲錢去月供,可以加上領展(0823)及盈富(2800),各加上$2000。

選領展是適合的,佢本身有相當的質素,但經常處於不平的水平,因為市場都知道當中的質素,同時佢物業有加租的潛力,這類股不適合一次過買入,而月供就是一個很好的策略,只要長期不斷進行月供就得。

至於盈富,雖然同你的恆生中國企業(2828),略有重覆,但盈富會有一些香港類企業,再者,這些組合就算略有重覆都無問題,所以都可以進行月供。

(對照龔成信箱:Q6975)

 

4.中國銀行(3988)

龔成老師, 想問你點樣睇1816 中國廣核電力@20K股, $3.29 同 3988 中國銀行@10K股, $4.25

呢兩隻股都係最近先知父母佢地買左, 佢地都70幾歲!

因我都係投資新手, 見佢地都跌好多下, 其實呢2隻值得買嗎? 謝謝!

 

龔成老師:

以70歲來說,只能投資較低風險的股票,例如只集中在收息股類別。

中國銀行(3988)是有質素的股票,同時是不錯的收息股,所以這股適合佢地投資,只是佢地在較貴的時期買入。這股可以長期收息,但股價要大升並不易,因為這是平穩類型的股票,要有耐心先守到,但持有無問題。

至於中廣核電力(1816),雖然本身有點質素,但2015年曾經被熱炒,以長者買入這類股是不適合的。當時股價去到高得不合理的水平,市場認為佢能高增長,但這類企業其實只會平穩增長,因此現時的估值才是合理價。

這股雖然可以持有,但要上翻去,的確好困難,暫時只有收住息先,股價慢慢會上翻D,但就好翻去到買入價。

(對照龔成信箱:Q6977)

入場費 龔成信箱 中國銀行 中廣核電力 領展 盈富
【入場費】圖片:新傳媒資料庫

5.收息股

老師,我係超級初哥,請問你點睇匯豐前景?35 歲就用搵機會較低位入匯豐搭港燈做收息孖寶會唔會太保守

 

龔成老師:

匯豐(0005)雖然仍然有質素,但已經比以前的年代質素下跌,你最好當佢係一隻平穩類股票,以收息為主,股價有少少增長。

雖然都可投資,但不應太集中在這股,可將資金投資在其他更優質的股票裡。

至於港燈(2638),是很好的收息股,但對於35歲的年輕人來說,投資小小就夠,因為年輕人應集中在增長部分,投資不用太過保守。

(對照龔成信箱:Q6978)

6.勝龍國際(1182)

老師,當年年少無知聽埋果啲內幕消息買左1182,而家帳面蝕左一半,睇佢企業盈利又唔靚仔,係咪好應試斬纜離場?

 

龔成老師:

繼續持有一隻股票與否,關鍵位是企業的質素,以及長遠前景,買入價、賺蝕數,都只是一些心理因素,不是核心因素。

勝龍國際(1182)已經連續5年出現虧損,根本無投資價值,你持有這股票,即是股東,但這盤生意不斷蝕錢,持有愈耐只會對你愈不利,止蝕是最好的方法。

(對照龔成信箱:Q6979)

7.投資物業

龔生,本人會有大約600萬的流動資金,是否可以投資物業收租?還是有其他投資方法呢?謝解答

 

 

龔成老師:

現時的香港樓,處於略貴的水平。買入自住的價值仍在,因為供應好唔夠,樓價長期只會向上,因此如有需要,例如你本身無物業,可考慮買入自住。

但如果你本身已有物業,打算只作投資的話,就未必是最好時機,因為現時投資物業的租金回報率較低,只有約3%水平,同一筆資金,投資其他工具,會比投資物業的回報更好。

因此,你可以先將投資投資股票(要優質股),等股票保持增值,同時在日後樓市有較好回報時,轉投入樓市(不用心急進行),這策略會較好。

(對照龔成信箱:Q6980)

8.手續費

成哥你好,我睇完你本80後百萬富翁同埋好多龔成信箱之後,我想試下月供股票,但我有些問題想問。

我23歲,剛剛出黎工作,搵13k加埋少少花紅同兼職,每月有15k左右,儲6-7000,打算買一手港鐵。

而家考慮緊月供股票,但我問過銀行月供股票一年要500-600手續費佣金等,如果買二隻股費用就會x2,相反如果買一手股票每次都係收100-200,月供好似收到的股息都用左黎交手續費,收息股升幅又較一般。所以有以下方案,你認為那個比較好?

1.買$2500盈富,$2500領展,$2000儲蓄

2.買$3000盈富/領展,$3000金沙/比亞迪/中國平安,$1000儲蓄

3.儲夠錢襯低位先一次過買一手領展,一手盈富, 一手比亞迪/中國平安

另外,除左以上股票,你有無看好的較高風險股票介紹呢?

希望你會回覆我啦!作為股票初哥有好多唔明又多問題唔好意思呀。

仲有想問下你覺得騰訊呢排有點回落買唔買得過?

 

龔成老師:

手續費的確是一個好煩的問題,如果唔計手續費因素,月供股票一定比直接買入股票好,因為買入價得以平均,風險有效減少,你最好問多幾間銀行的收費,例如南X商業銀行,聽網友講好似較平。

如果唔計手續費,以你23慮的年齡,可以月供$5000,其中盈富(2800)$2000、領展(0823)、平安(2318)、比亞迪(1211)各供$1000,餘下儲現金,長期進行,這方案最好。

如果手續費佔比太多,則回歸一手手買入的模式,但風險就略高。

至於較高風險高回報的股票,可留意福壽園(1448)、中生製藥(1177),企業有相當的潛力,但股價卻略貴,小注分注買入可考慮。

(對照龔成信箱:Q6981)

9.止蝕

你好,龔老師!

小弟29歲,早前在生意上賺得100萬,但現在已沒有工作,休息一段時間才會工作。

如果投資在置富產業信託,冠君產產業信託,盈富基金, 建設銀行,農業銀行,這幾種股票可行嗎?

因為之前未讀閣下作品前,小弟只聽從朋友介紹,入了,中廣核電力,華能新能元,雷蛇,易鑫,全部也虧損,合計四萬多元!

老師,想請教一下這些股票現在還應該持有還是止蝕離場,方便的話可以 給小弟一些意見,謝謝老師

 

龔成老師:

以你的年齡,其實仍有一定的增值力,因為我地累積財富,會用「先增值,後現金流」的策略,即是先投資增長類別的股票,到財富已累積了一定數量,以及年齡漸大時,才會轉到收息類的股票。

過往只是你未知何謂投資,只要你多增加投資知識,明白,買入優質股長線投資這道理,就不用太保守。

你所選打算買入的股票,都是有質素的,但不少都有點保守,以收息來說的確不錯,但對年輕人來說,不用投資太多。盈富(2800)、金沙(1928)、港鐵(0066)、長建(1038)、中銀(2388),其實都適合你投資,當然你可再加上上述的收息股,但比例不用太多。

這些股只要你分注買入,慢慢動用資金,長線持有,基本上十分穩健。用埋,你一定要留有一定的現金,等大跌市時作買平貨之用。

至於原有股票,則視乎當中質素決定持有與否。

中廣核電力(1816)都算有質素,但增長力不算強,可以持有,但你要預佢增長較慢。

華能新能源(0958)有質素,可持有,這股有得守。

至於雷蛇(1337)同易鑫集團(2858)則要睇下你博唔博,我唔敢話佢地無潛力,但最大問題佢地仍然處於燒銀紙的狀態,根本無人知幾時先可以賺到較合理的利潤。但現時的市值都不算平,市場比左佢地唔少「概念價值」,但這個價值值多少,根來無人知,所以股價一定好波動。

這類股,無人知結果,如果持有太多,就要減持。(對照龔成信箱:Q6982)

10.月供股票

龔成老師您好, 我最近有留意您的信箱後,好想立刻請問您意見, 謝謝!

小弟今年23歲, 而加月入17k, 扣除家用,自用後每個月都可以儲到12-13k,

暫時已經儲左10幾萬, 目標係希望28歲前儲到人生第一個100萬, 所以想向老師請教投資知識.

如果我想用月供股票達到我目標, 2800, 0066, 0005,1211, 0002, 2388 每個供2k是否可行?

還是用儲錢去買正股一手一手咁?
或者有咩方法可以盡量達到?

 

龔成老師:

每個方法都有利有弊,同埋會適合不同類型的人,你23歲,可以進取一點,因為你可承受的風險較高。

你現時的$10萬,暫時不用心急用動,等大跌市時把握機會仲好。

如果你每月能儲$12000,一年就有約$15萬,5年本金加上投資回報,要有$100萬並不困難。

首先,你一定要堅持每月起碼儲$12000,同時將其中的部分做月供股票,你上述所選的都是優質股,都可以進行月供,但用盡$12000去月供,則有利有弊。

好處是簡單地不斷累積優質股,長遠財富能保持增值,但缺點是你無法儲到現金,若出現大跌市,又或找到其他潛力股,你就無法提握機會。

比較平衡的做法,是上述股票,每隻只供$1500,咁你每個月都有一定的現金剩。同時,你要好好學習投資知識,多睇書及上堂,然後令到自己掌握選股、企業評值、估值、把握投資時機等能力,就能充份發揮餘下現金的作用,這部分會成為好重要的增值部分,對你財富有好大影響。(對照龔成信箱:Q6983)

延伸閱讀:

想揀兩隻收息股月供一世 港燈及煤氣是否最好選擇?

收息股 港燈 煤氣 龔成信箱 深圳控股 匯賢 長建 碧桂園 港華燃氣 莎莎 置富

投資初哥較少時間留意股市 月儲$6,000 最好的投資策略係⋯⋯ 

月供股票 龔成信箱 北京首都機場股份 利亞零售 數碼通電訊 佐丹奴國際 怡園酒業 瑞聲科技