龔成問答信箱(Q641-Q680)

龔成問答信箱(Q641-Q680)

Q641:龔成老師你好,我月入16k,扣除家用、保險、還學生貸款、平日開支,我每月大概可以儲6k左右,我每月放5k入股票投資,1k做後備金。

我目前持有股票係領展(823)$44.7買入,金蝶(268)$2.8買入,金山軟件(3888)$15.2買入,中國人壽(2628)$17.3買入,我用35萬買入以上股票,我想老師你分析下我目前持手既股票有邊隻係屬於優質股可以中長線持有?其實有D近期先升翻,之前有想過止蝕的。

我希望未來一兩年同男朋友買樓結婚,我主要買股票,男朋友只儲現金沒有任何投資,佢月入3萬,每月儲一萬,希望老師幫忙分析下我手上既股票仲應唔應該放左佢,轉投其他股票?另外,匯豐可入嗎?

龔成老師:若你打算一兩年內結婚,宜先增持現金,因為我們投資股票,都希望是長線投資,優質股長期必升,但中短期會有波動,若遇上跌市而你又要用資金,那就要蝕讓優質股了。

雖然現你不用沽股票套現,但每月可能要儲多一點現金,為結婚準備。

至於組合方面,持有的原則不是看賺蝕的現金數目,而是該股在本質上,有沒有繼續持有的價值,領展(0823)及中國人壽(2628)本身優質,可長期持有,領展在$50以上雖然有少少貴,但卻是貴得合理,可長期持有,不用沽出。

至於金蝶(0268)及金山軟件(3888),若你有睇開我的書及專欄,都知我最怕是科技股,因為行業變化大,盈利的不確定性高,要分析股值好難。由於市埸對其估值的分歧大,引至股價會較為波動,未必適合長線投資。而金山是較多散戶炒的股票,而凡多散戶炒的股,我都會避,因為散戶往往是輸的一方。因此若要套現等,這兩隻宜先沽出,持現金,或轉到較穩健及合適你情況的股票裡。

匯豐其實可以的,但要有耐性,若你這不錢不會到結婚時套現就可以,但匯豐不要太大注。

————————————————

Q642:龔成你好!我上年分段買入匯控2000股,平均價$68,依家跌到甘,應該收手,再等機會買入其他有潛力股,還是點樣? 若離場後有咩股建議可買? 萬分感激!

龔成老師:若果匯豐(0005)佔了的股票組合的3成,就建議你減持部分,不要太重注在這股。

匯豐雖然賺錢能力比以前減弱,但都有一定質素,匯豐往後的增長力及潛力都只屬一般,若處$50水平其實不貴,因此在這價沽,策略上未必最好。

若要轉其他股,其實簡簡單單轉去盈富(2800),已是不錯的策略。

————————————————

Q643:龔SIR,我要做李嘉誠!

龔成老師:這是很好的信念,你應該保持呢團火,發展出最適合你的道路,致富有很多方法,最緊要有心,找到合自己的路,加油!!

————————————————

Q644:成哥,我有d 問題關於《百萬富翁1》

1. 我見到有個表係關於每年回報 10%,想問單靠投資盈富基金做唔做到,有什麼其他辦法可以達致此效果,可以做到65歲時有超過500萬, 我的資金並不是很多但可以做到一年投資 一萬多元

2. 我是初學者,想問及除了盈富基金有沒有類同的股票作參考學習, 因為我都想學習一下投資股票以爭取更高回報畢竟我是90後, 你認為可不可行?

3. 請問如何運用良性循環? 是不是要在第一年終沽出某部分資金 然後用作下一年投資, 我不明白資金如何會增加, 資產收入是從哪裏來?

多謝你的解答, 我亦得知你有打算推出 網上課程,十分支持你的做法,希望有更多途徑上你的課堂,了解你的心得

龔成老師:1, 過往數年計,恆指的複息回報為12%,股息3%,總共15%,若我們保守點,單單投資盈富,長期要有10%複息回報,其實合理。

如果每年只投資$1萬多,即是每月只投資$1000,這數目的確比較少,若要做到數十年後有$500萬,回報率及年期就是關鍵。假設回報率15%,每月$1000,年期30年,那30年後就能滾存出$500萬,所以愈早開始愈好。同時亦要加強投資知識,提升回報率。

2. 學投資股票不能急,初學者只可從較穩健(當然回報未必高)的股票著手,例如盈富、收息股、公用股、房託,之後再從恆指成份股著手,然後再到個股,最後是潛力股,整個學習過程超過一年,你愈快學愈好。記住,財不入急門。

3. 一般都不用沽出的,除非當時股價過高,價格遠超價值,那就可沽出後,將資金轉投到價值被低估的股票。良性循環主要表達兩種狀態,資本的不斷增值,以及現金流再投資何。資金增加是表達其價格在長期不斷上升。

————————————————

Q645:脫歐問題、英磅大跌又令保誠已經跌番落去,有考慮緊長線投資,不過又擔心英國情況,主權評級都已經被降,老師你有何看法?另外見到你有提到金沙,你打算咩價位再入?

龔成老師:保誠(2378)本質不錯,但英國脫歐會對其股價有影響,但只要有長線投資的耐性,不理中短期股價波動,那就可以了。

金沙(1928)在$28以下是平宜價,而就算$35也不貴,都如入就要小注及分段。

————————————————

Q646:你好,我有15000元,想學習投資 請問有什麼建議?

龔成老師:最好的就是盈富(2800),簡單、回報不錯、不用理、自行增值。但若然你想學股票,就可從收息股、公用股、房託這類基本的著手,之後就是恆指成份股。

————————————————

Q647:龔生你好, 1)我係一名即將畢業既學生, 見你既POST 同書都話年青人既投資組合應該要係增長多, 咁有無一D 增長類既股可以推介我分析?唔該哂!

2) 我想每月入一至兩手港燈收息, 今個月係第一個月, 係7.52 買入, 想問問咩價位先叫合理呢, 因為7.52 好似過貴…… 另外, 我應該KEEP住每月入定係儲一筆一次過先入呢,因為你話過, 無買錯只有買貴

龔成老師:簡單而言,可將資產分成3個類別:
-增長
-平穩
-現金流

若果以股票去分別,較有潛力的股票,例如比亞迪(1211)就是是增長,金沙(1928)屬平穩,這是由於已過了增長期,而盈富基金(2800)亦屬於平穩類。至於收息一類的股票,例如港燈(2638),就是現金流類別。

增長型股價波動會較大,風險較高,但由於年輕人可承受的風險較大,所以就算投資這類股亦可以。但由於這類股投資前要有一定的技巧,所以,最好是掌握投資基礎的人才開始投資這類別,這會較佳,用時要注意買入價位。在這之前,投資平穩型的股票會較合適。

至於港燈,絕對是不錯的股票,但往往處不平宜的水平,其實可以簡單以息率計算,若果息率處5%以上,就可算較貴,大約為股價$8。若然要較平宜,可理解為息率有6%以上,可算是更有投資價值,股價約為$6.7。因此在$6.7以上,雖然仍可以買入,但只能用分注的策略,以減低風險。

————————————————

Q648:你好,最近都睇左你本書2百萬富翁,真心覺得你份堅持 ,不論係投資定對你自己既人生,感到好佩服,對所謂無可能既事都仍然唔放棄,不斷搵方法,一直努力。

反觀自己,好似就無你咁利害,你仲可以講得出做得到,真係去訓街,雖然有?無謂,但事後對你自己既影響一定好大,深深被你既故事感動左。

我都想將來可以財務自由,買車買樓,但我同樣都係住公屋既,但我今年22,細個由內地落黎所以仍然讀緊書,本金就有十幾萬,投資左半年,抱住用真錢去玩,學野學得快?,雖然真係積極左,但都蝕左。一直都有睇書學野,上網睇blog,睇片咁,但仍然好唔夠,有咩書可以知道多實際操作?

另外你用價值投資方法,以咩準則去批定好與壞,優唔優質,點樣去分析同研究,我有時間都可以好似你咁分數月去分析,但就仍未搵到方法,同埋?資料可以係邊度搵到 ,係咪真係睇公司既年報,去網站度搵下資料或者睇下新聞咁?比較想知道係點操作?

龔成老師:《80後2百萬富翁》我只係將我的故事分享,因為我知道只要我相信,我就做得到!而一般人做不到,只因他以為自己做不到。所以我出書分享當中的信念。

學習的過程是長的,不斷睇書、上課程可豐富你的知識,而實驗及錯誤,亦是提升你知識的關鍵,所以,你保持學習就可以了,但你亦要明白學習不是一時三刻就見到成果。巴菲特的相關書,是你一定要看的,因為他是憑投資最賺錢的人,他的方法真正有效,而坊間的,不少都是不賺錢的錯知識,要小心。

優質股就即是這企業有一定特別的優勢,令其市場保持,生意穩定增長,賺錢能力不錯,但如壟斷市場的企業,大多是優質股,當然要說明要花很多時間,這亦是我的股票班要15小時的原因。課程除會講劣優股與優質股的特質,亦會教你一套分三個程序的選股方法,憑這方法一步步選出優質股。

股票資料方面,一般的財經網站有簡單的資料,而要分析企業本質,就一定要分析年報,你可上港交所的網下載。

————————————————

Q649:成哥,之前英國脫歐,影響漸漸出現,你點睇?長和你覺得值得博嗎?

龔成老師:我試試從自我適應這角度去講我的睇法。脫歐對英國來說並非末日,就算沒有了某些事情,市場都要自行補足另一些事情,自我適應,不會自此一沉不起。

英國的確有可能進入衰退一段時期。但英國這個國家,本身有一定的優勢,無論在歷史、制度、法制、教育、民族質素等,都處於高水平,而這就是本質。

只要本質有優勢,就有能力面對衝擊,當市場失去了某些事物,漸漸又會發展出一些新事物,這就是市場的適應力。

試想想,脫歐事件令英磅下跌,國民的購買力受影響,但同一時間,英國貨相對地便宜了,送子女去英國留學的成本大減,近期亦有不少香港人增加了相關的興趣,而類似的平衡會在英國以不同形式出現。

即是說,失去了的同時,又會以另一形式增加,這就是市場適應力,而這因素會令英國長期不會太差。而長和我亦不會覺得太差的。

————————————————

Q650:你認為823領展創新高,現價貴嗎,想用一筆額外資金去月供領展

龔成老師:領展(0823)是一隻貴得合理的股票,因為佢有獨特優勢,本質相當好。佢唔止收入同派息不斷上升,更不受香港地產市道回落影響,其業務仍很好。

由於佢實質的可分派收入不斷上升,令其價值有實質上升,所以股價要大幅回落不易,可考慮以分注入的形式,待其股價略回落後,先入一注,到再有較大的調整時,才入多一、兩注。

凡創新高的股票,就算多優質,也要分注。

————————————————

Q651:你好,我是在兩三年前在書局發現<>,看了幾頁就被內容吸引,買回去看完也真是獲益良多,先在此表達謝意。我有以下問題:

1)我在大時代買入了港交所(388)及莎莎(178)。我認為這兩隻都是優質股,只是買入價位判斷錯誤。那我是否應該繼續持有? 還是買入價實在太高要止蝕?

2)我看了<>一書,有以下迷思:理論說優質股應該終生持有,我想問終生持有的話(如我的月供股票)我怎樣享受這些資產? 如我想置業, 照顧家庭?

龔成老師:1)莎莎(0178)及港交所(0388)都是優質股,可以守,但要上到買入價要較長時間,因為當時的價位配合了泡沬,而這些股由於有質素,故慢慢會好轉,股價會慢慢會回升,但要有下一個泡沬,則要等。

2)你要改變用現金單位去思考,改成擁有資產,當長線持有資產時,就會享受到資產的增值,以及其產生的股息。就以長建為例,你翻查下資料,就會發現20年的股息不斷增加,若20年前買入,不止早已回本,股息更不斷增加,這就是資產的回報,可永遠持有的。

————————————————

Q662:龔成先生,想問你股票意見,覺得金山軟件(3888)前景如何?金山值得長線投資嗎?

因為見最近金山發出盈警令股價急跌,主要由於金山投資迅雷同世紀互聯作出減值計提撥備。雖然預期今年業續虧損,但今次撥備對金山現金流沒有影響,而且我見互聯網服務前景始終無限,佢既雲服務金山雲仍然為投資期未回本,再加上金山主席雷軍的作風進取,現在應該趁低分段吸納嗎?謝謝!

龔成老師:金山軟件(3888)我自己有點保留,其實不是說這股不好,而是該行業的變化實在太大,行業裡的企業盈利保障程度很低,所以很易出現有時賺大錢,有時發盈警,有時虧損的情況。

雖然我都很欣賞雷軍這人,但這企業的變化大,估值難,所以我自己不會投資這類股。若你看好,其實可再等多一等,因為這股的股價波動大,宜在較平位才買,令風險減低。另外不宜大注。

————————————————

Q653:龔兄,有蟹貨想請教如何部署,謝謝你的幫忙。我有4手460四環醫藥成本價$5,同埋1手762聯通成本價$13.82,想係2017年年中前,止蝕套現之後可以買比亞迪,再重覆交易慢慢賺返,唔洗蝕咁多。

我有睇你facebook之前講關於比亞迪,自己都覺得佢有潛力同前景,尤其同英國ADL合作,股價都算硬淨,自己同工作方面都唔適宜成日睇股價,所以宜家就想將蟹貨止蝕,再係$40換一手1211比亞迪再賺15% $46左右沽出,再反覆交易。龔兄你建議我在那個價位止蝕?應如何部署?

小弟不懂是否正確,或者可能有更好方案,請糾正其弊,再次謝謝你的幫忙,感激不盡!

龔成老師:四環醫藥(0460)比較多事端,之前又停過牌,比較麻煩。但業務本質又不是太差,其實等有較多的反彈宜沽出(當然你唔好預佢返到買入價位。

反而聯通(0762)有較大守的條件,雖然生意回落,但有一定質素,可惜回報率只是一般,宜反彈至買入價轉去其他本質較優質的股票。但注意,這股要返你的買入價仍要一段時間,要有耐心。

有關你比亞迪(1211)$40買$46沽的策略,表面容易,實行困難,好似好易賺,但又可能錯過機會。所以我不建議。

其實1211是潛力股,買入後要做的是等待,等其潛力的漸漸爆發,到其產品普及時,才是真正的收成期,到時的回報必然可觀的。

————————————————

Q654:龔SIR你好,1910新秀麗你點睇?而家PE 20多D,最近又收購TUMI,而家好多行李箱原來都係UNDER佢的! 有品牌效應,想請教下你點睇?

龔成老師:新秀麗(1910)本質不錯的,生意盈利保持增長,股本回報率都不算低,加上有品牌,所以有長線投資價值。但收購業務存有未知數,不能盲目利好,以20倍市盈率來說,就略為高了少少相信18倍會較合適。

————————————————

Q655:成兄, 我發現左隻股票唔錯 (900 – Aeon Credit), 下面係我的結論

a. 派息隱定, 每年$0.360, 現左7 %息
b. sale 上升中
c. ROE ~10%
d. Net Profit ratio ~20%
e. profit 非每年上升
f. D/E, 較高, >100%
g. Current ratio 跌緊
似優質股嗎? 可以俏後吸納嗎??

龔成老師:上述是其中的分析點,但再深入分析後,你會發現這股只屬一般。

首先,5年的ROE都不算高,生意沒有增長,賺錢能力只層一般,加上近年盈利出現倒退,雖然有品牌,但業務本質有風險,這點要注意。較為吸引之處是息率高,市盈率低。

————————————————

Q656:龔成先生你好,本人剛剛才接觸投資,完全0知識,請問除了你著作外,有什麼書籍可以了解更多投資知識?

另外出來社會一段時間,有將一D人工儲落黎用作投資,加上家人給幾萬,有8-9萬,但想買長線股長期持有,請問有哪隻現在值得買入?

龔成老師:先睇《股壇解碼器》,同埋睇多D財經報紙。然後再睇巴菲特的書、《彼得林區的選股戰略》、《非常潛力股》。除睇書外,上課程都是吸收投資知識的重要途徑。

以初學者來說,最好是收息股、公用股、盈富(2800),之後再分析輐恆指成份股,然後再到其他股票。

————————————————

Q657:你好,想請教一下,我的投資組合問題,我上一年買入1288,0939,1060,1682,是作長線投資,但買了之後,你覺得我的組合如何,請問有冇什麼可以推介呀?唔該

龔成老師:建行(0939)、農行(1288)都有質素,雖然比上年下跌了不少,但有守的條件,可長線持有收息。

阿里影業(1060)波動性太大,行業結構不穩,有點保留,因為這類企業很難評估長期的業務情況,可以好勁,又可以好差,長線不是不可,但不宜太大注。高銳中國物聯(1682)生意不斷下跌,近兩年更蝕錢,沒有太大的投資價值,長線投資不適合。

若長線的話,金沙(1928)不錯,因為本質優質,但面對中短期問題,令股價下跌,是入市時機,但要有耐性。

————————————————

Q658:你好!我想問一下(3918)金界,同(1928)金沙邊隻基本面比較好,謝謝

龔成老師:金界(3918)主要從事管理及經營位於柬埔寨酒店及賭場娛樂城,本身優質,股本回報率高,生意同盈利都不斷上升,是優質股,而金沙(1928)的本質同樣好好,持有的酒店娛樂場都是優質資產。

但由於我較熟識澳門賭業的結構,所以我會選金沙,不過金沙面對中短期生意下跌,而金界就未有這情況,所以若你不看好澳門,可選金界,但我投資時會選自己較熟識的。

————————————————

Q659:龔成先生你好啊,我係之前見到你既專頁之後先follow你既人,我想問你的時間管理會係點嫁?會留起幾多個係做分析,望下邊隻股票值得投資等等,我想知你既生活模式係點嫁,當作一個指標做參考。

龔成老師:由10年前開始,平均每兩星期分析一隻股票,每次花數小時。每星期讀一本書,所以《80後百萬富翁》是一千本理財書的精華。每天睇報紙、新聞。

————————————————

Q660:龔SIR!我是股票班的學生,你其中一個估值方法,是以過去的複息盈利增長率作為推算,但唔係好識計你提到的複合增長率?

龔成老師:過往的複合增長率,其實是數學問題。例如股價$100,2年升到$200,每年升幅約為40%,$100升40%是$140,而140升40%是$196,所以大約是$100(1+40%)(1+40%)=$196

而note上的計算,就是$2.36(1+X)的9次方,而要找的就是X。這是一條數學問題,考會考的計算機可計到,Excel可能幫到你

————————————————

Q661:龔成你好 想問依家入1號仔定2800 較為值博? 想長擺收息

龔成老師:盈富(2800)較為穩健,風險較少。而長和(0001)受英國問題影響,中短期股價一般,但在長線投資的角度,其實已不貴,只要你有耐性,其實長和不差的。

————————————————

Q662:龔先生你好!本人在2013年的時候買入123越秀地產,當時股價為1.98.到現在已經跌左一半,本身諗住長期持有收息的。

但最近睇左你本書入面的錯誤一:不止蝕等如不虧蝕.我開始諗係咪要正視問題,抽返錢出黎去投資有更好回報的股票,定繼續莫視呢隻股票.請指教,多謝! 其實本人的買股票喜好係長期持有收息.

龔成老師:越秀(0123)作為收息股未必適合,若翻查5年的派息記錄,派息比率不高,盈利不穩定。

加上中國房地產市場本質波動,相關股份的股價必然波動,而越秀的負債很高(內房股大部分有這情況,這亦是令我卻步的原因),都令這股風險提升。

股價跌了不少,市盈率亦回至較低水平,作為收息這股不太適合,但現價放又不是最好策略,可考慮股價略回升後(未必上到一倍),逐漸將股票沽出,轉成較強質素的股票。

————————————————

Q663:你好呀, 我手頭上的股票 494 (利豐) 和 2888 (渣打銀行) 分別是 7.93 和 113.5 入貨, 手持一年幾, 原本是打算收息長渣, 但越渣越跌, 兩隻股票已跌了一半價位, 我想問你的看法, 應該沽出, 還是持有收息長渣 或者低價溝貨??

龔成老師:首先唔建議溝貨,雖然能將平均價拉低,但會增加本金,使風險增加,同時亦在深化錯誤。

這兩股的質素不是太差,但正經歷中短期的不景期,相信中短期內股價難以返回你的買入價。但由於這兩股本質不差,所以有守的條件,當經歷完不景期後,股價會有較明顯的回升,但這要有一定的耐性,不是一年內會出現的。

另外,任何一個行業的持股,都不應佔超過你股票組合的30%,特別是銀行股。所以,若果你是重注的,那應該在反彈中減持部分,令組合的風險得以平衡。

————————————————

Q664:一直都知道自己投資股票概念差,睇過你既書就發現自己既問題,好多都一針見血,但我資質差,有幾項策略性既題目有時要睇幾次先明,我輪班工作未必每次都上到你既課程,還有其他課程資訊嗎?另外,中國人壽比中國平安好嗎?

龔成老師:我的個人網站將有網上課程推出(即課程報名連結的那個網),你可留意。

中國人壽(2628)在壽險上的市佔率比平安(2318)大,但近幾年的市佔率有下跌情況,之前是中國人壽較佳,但近年開始可以話兩者質素差不多。其實兩隻都是優質股。

————————————————

Q665:先多謝老師你答我的問題。我自己睇投資類型既書唔多,因我仲讀緊書,只係想知多D理財既野,我覺得我要睇多D書先去參加你個course會好,因為好多term依家未明曬。我會買你既書黎睇:) 我唔想我連基本既認知都冇就去參加。

龔成老師:好呀,睇多d書先啦,睇書可以學到好多野,我由讀書時期開始,已keep住一星期睇一本書,相信已睇了過千本,獲益良多。

其實課程在設計上合初階及中階者,頭一兩堂都是基本知識,只要上完堂返學溫習就跟到了。

————————————————

Q666:成兄,自問睇左幾本投資書,就試下自己搵隻潛力股考下眼光,見到有隻1225,5合1,創左新低,我起0.66入左D嘗試撈底,因為見佢純利同資本回報起2015年都有唔錯增長。我覺得會升番,唔知你點睇呢?

龔成老師:隆成金融(1225)近年好多財技動作,2015年8月:1供3,之後到2016年6月:5合1,然後2016年6月:1供2。

我對呢D較多供股合股,玩財技的股票有保留,因為佢太常在股票市場上抽水,對小股東不利,同時亦唔會珍惜集資得來的資金,可能投資較高風險的業務,就算不幸失敗,就會再在市場上集資,不是好事。另外,這股過往的盈利不穩,過往5年有2年虧損,從長線投資的角度看,並無投資價值。

但近期供股後,加上盈利好轉,會否有炒作,以及中短期會否上升,這或許有可能,但其實我不懂這種分析模式的。

————————————————

Q667:本人就黎30歲,單身。人工30000左右。話說我有間樓市價630 萬左右, 按揭OUTSTANDING 375萬 NET: 255萬左右。另一層 市價320萬左右 按揭OUTSTANDING 180萬 NET: 140萬左右。另外有層深圳樓 值 360萬人仔(NET:420萬港紙) 無按揭,另外現金大約160萬左右。我暫時同屋企人住, 唔使俾錢住, 因為呢間屋唔使供.

我想問既問題係:
1. 我應唔應該放左層深圳樓? 因為驚深圳樓會跌, 升得太多, 加上深圳出租回報率太低, 同人仔驚會跌.

2. 如果賣左深圳樓, 好唔好full pay 多層香港樓 大約600萬既樓(420萬+160萬) 左右樓 然後去出租?

3. 或者 我想UPGRADE 樓去1000萬左右. 好唔好賣左深圳樓+ 香港市值630萬既樓.. 即有CASH 835萬左右 去買 1000萬 差額做按揭.咁做好唔好? 定係唔賣630萬樓, 直按用(420萬+160萬) 去買800萬左右既樓,餘額做按揭?

4. 最想問既就係 1000萬既樓, 應該揀凱旋門 實呎419 建呎602呎, 定係 囍匯 實呎4XX , 貝沙灣兩房 定係 泓都 3房,寶翠園?

或者定係買黎緊既新盤好? 因為我唔熟呢個價位既樓盤,又無睇過呢個價位D 盤, 可唔可以講下1000萬左右好既樓盤我聽下 你有邊個盤係睇好架? 講多幾個盤我留意下! 同埋長遠計 3房大單位會唔會跑贏2房?貴價?既樓會唔會跑贏細價既樓?

同埋我打算買黎係諗住用黎出租… 或者同埋有可能我會用黎將來自住!所以想間樓會係有質素?既樓!希望呢個樓盤有投資價值同自住價值.定係俾多少少買1200萬-1500萬左右既樓盤好??又有咩推薦?等我可以留意下.

5. 定係賣左深圳樓, 用(420萬+160萬) 買港股2800? 升到2成至3成放左佢先買樓?

6. 定係乜都唔好郁好過?

龔成老師:1. 深圳樓建議放左佢,所有物業最終的價值源自其產生的現金流,即是租金最終會決定樓價,若果現時的租金回報率太低,將來若回至正常水平,就是價跌的下跌。

另外,深圳樓升得太多,開始有泡沬,雖然唔知仲會升幾多,但沽出是較好的策略。

2. 如果你本身的財富已較集中在物業,其實套出來的錢,宜投資其他資產,例如股票,以平衡財富組合的分配。同時,太集中在同一經濟週期去增持物業,亦不是好事。將套出的錢買股票,若不幸樓市下跌,之前的錢就可在低位買樓。

3. 以租金回報來說,1000萬以上的樓不是太吸引。

4. 以1000萬來說,凱旋門、貝沙灣等都只能買到較細的單位,其實凱旋門我都有去睇過,除了景觀及高鐵因素外,其他都沒有想像好的,呎價偏貴,若以1000萬去這裡買細單位,回報與升值都有限。

反而較好的策略,是應分開買其他地區幾間細樓,回報率更高。但如果你怕管理麻煩,只想集中買一間,在凱旋門 、囍匯、貝沙灣、泓都、寶翠園中,我會選寶翠園,因為校網、有質素、較實用、有地鐵、市區。

我認為細單信的長遠升幅會跑贏大單位。首先是租金回報本質地較高,另外是市場需求,加上之前的工廈火警,將引至細單位的需求增加。

5. 套現後買2800是一個策略,其實你要分析的,是改變結構後的財富分配。當你賣樓有現金後,你用資產負債表檢視自己的財務情況,若你太集中在物業資產,就應該將現金投資其他類的資產,平衡風險。

6. 賣大陸樓,增加股票資產,建立一個平衡的組合。

————————————————

Q668:龔成,我在$27.3同$24.7入左金沙。澳門巴黎人唔知會唔會對股價有幫助呢?現有不錯利潤,我應長線嗎?

龔成老師:會有幫助的,賭業可說已見底,生意漸漸好轉,但不會大升。如果你買入的理由同我一樣,看好長期賭業前景,建議你不用現時放,可長線持有。

————————————————

Q669:龔Sir, 我都想學以致用自己計下合理價, 選左新秀麗1910做練習:

P.E – 5<19.47<20
市值: 302.58億
總債項/股東權益 = 58%
股東權益回報率(%) = 13.05 (5年平均)
每股盈利?長: 26.34% (計左4年,平均數)
毛利率 (%) – 52.579% (經濟通數據, 代表賺錢能力唔錯?)
流動比率 – 146% (經濟通數據)

每股盈利近5年平均數 0.87156

5年的每股盈利複合增長率 18.42%
假設的未來每股盈利 = 0.87156 X 118.42% = 1.032
自己估計的合理市盈率 = 15 – 22 倍 (真心唔知點定, 亂黎的….)
自己估算的合理價 = 1.032×15 ~ 1.032×22
= 15.48 ~ 22.704

龔Sir,請畀下意見, 感謝=]

龔成老師:大致你都掌握到課堂上所學,從財務數據分析是其中一環,另外你亦要分析佢的市場結構、產品、品牌等因素。

「合理盈利」的推算大致正確,記住這沒有絕對公式,我地最重要係找到一個有代表性的盈利,作為推算的基礎。

市盈率合理範圍,其實先用10-15倍做基礎,之後再因應其優劣,而向上下調,你可比較行業、及這股過往的市盈率去推算,同時評估其增長力,以這股來說,其增長力不錯。

所以合理市盈率會在10-15向上調。其實點推到個合理市盈率都好講經驗,呢個只有不斷累積。我未睇佢的市場結構,初步睇應值14-20倍,所以估值差不多。

————————————————

Q670:成哥,見你好睇好隻金沙,但金沙對於我來講需要資金比較多,如果是每月供還可以,我想問其實供股還是買,邊一個好。資金唔多,有咩好推介?

我唔太明白,請問月供股都有息的嗎?我睇過你書,追過文,而家想用每月的兼職錢月供盈富,金沙,港燈,港交,但應咩位入好?唔該,同埋未來點睇醫療和保險股?

龔成老師:月供會較好,因為價格更平均,但缺點是手續費較高。月供股票如同儲股票,派息那時你持有多少股,就會計你收到幾多息。如你想月供股票,不用太著重現價。

盈富(2800)的入場費不高,可考慮。另外你問的幾隻股都有質素,金沙不貴,港燈略高。

人壽保險股本身有不錯的賺錢能力,不錯的。

————————————————

Q671:成哥你好,想請問你怎樣看現時匯豐的價位,本人想入3手並作長期投資 請問是否值得考慮?

龔成老師:$50以下的匯豐不算貴,但這股的賺錢能力已減弱,不建議佔股票組合太多,若這3手佔的財富較少那沒問題,但若佔了股票組合的30%,相信這已是上限。

另外,由於合融市場波動,匯豐的股便亦不穩,建議分注去入,減少一次過入的風險。

————————————————

Q672:龔Sir,我想想報CFP, 要考邊D PAPERS?考完有無用?因為我無諗過入金融行業?

龔成老師:CFP唔易考,可能上下課程會好d,實質paper我都唔知,因我都無考。如你想在銀行業發展,才有用的。如你想增加知識,強烈建議你花時間到圖書館睇書。

————————————————

Q673:已經入左金沙,打算分注入。我再想問中國移動你點睇?想聽聽你既睇法,謝謝。

龔成老師:中移動(0941)不錯的,擁不錯的市場佔有率,同時有一定的賺錢能力,股本回報率不算差。

但近年的賺錢能力有減弱情況,生意沒有增長的動力,行業已進入了平穩期,相信往後只能以平穩形容。而盈利近年有回落情況,所以質素略減。以這市場結構及增長動力來說,現價約14倍市盈率處合理水平。

————————————————

Q674:你好, 我係你股票班既學生,我想問你對李氏大藥廠(950)既看法?

龔成老師:李氏大藥廠(0950)過往是快速增長的股票,生意同盈利都有快速增長,而股本回報率亦一直處於高水平。但生意的增長開始減慢,而股本回報率率有下跌情況,相信增長最高速的時期已過,但整體來說,單從財務數據看是不錯的。

近期股價大幅回落,相信是市場估值方面的改變,由過往高增長股,給予高市盈率高估值,到現時將這股評為平穩型股票,因此評為一般市盈率及正常估值的股票,從估值角度而令這股的股價大跌。

由於藥業股在較大的風險,因為研發的投資可以很大,所以這類股我自己在評估上,往往要求較大的安全邊際,即是比估值較低才會入,令策略上得以減少風險。雖然現時股價大幅回落,市盈率為14倍,但以一般增長的股票來說,這市盈率是差不多的,因此,安全邊際未夠。

————————————————

Q675:首先多謝你上次的回覆,我今次都想問隻992聯想,我4.78入,你點睇隻股票前景?另外想問是否除淨日當日賣出股票都有股息收?

龔成老師:聯想(0992)有本質上算是不過不失,但近一年的業績不佳,加上GOOGLE減持,都令股價下跌,相信中短期都不會有好表現。

雖然上年度業績不佳,出現虧損,但管理層已作出應對,相信下年度會有一定的盈利,返回正常水平。前景不會預期太好,以不過不失去形容,但現時股價市場已預期較差的一面,所以只要有點耐性,可持有的。

除淨日賣出股票仍有息收的,但注意股價會調整。例如除淨前一天的收市價為$10,派息$1,除淨日當天的開市價,就會自行調整至$9,然後才因應當天的升跌,而開出開市價。

————————————————

Q676:龔成兄, 想請問一下你對兩隻內險股中國財險(2328)和中國平安(2318)的前景和看法, 兩隻現價都偏低, 值得長線投資嗎? 謝謝!

龔成老師:由於財險類與壽險類不用,財產保險的品牌價值較低,同時賺錢能力不及壽險,所以中國平安(2318)的質素會比中國財險(2328)較佳。

平安可長線投資,現價亦不算貴,但要注意壽險公司會將浮存金其中一部分投資在大陸的A股市場,所以大陸A股的波動會影響其股價。由於A股的波動性較大,因此分注入的策略較佳。

————————————————

Q677:成哥,之前見你分析隻保誠。好奇的問,見佢之前股價大跌,係咪因為脫歐而會令2378盈利大減而令股價下跌?定係只係受情緒影響呢?

龔成老師:兩樣都有,保誠(2378)有唔少英國業務,英國脫歐令英磅大跌,接下來又會影響英國經濟,這當然會令保誠的盈利減少。但保誠早前因脫歐事件,而令股價大跌,其跌幅已超過實質不利的因素,所以當中有唔少是情緒影響。

————————————————

Q678:龔成,請問點睇2368?

龔成老師:鷹美(2368)主要業務是以OEM「原設備製造」,即係根據客戶提供的設計或訂造產品的形式去做,從事製造男、女及兒童運動服。

主要為Nike、North Face及Puma等多個國際品牌製造產品。除了出口到世界各地外,亦內銷至中國市場。

呢類公司由於有大客,生意同盈利都會較穩定,但由於D客好大,同客議價的能力亦不會太高,所以賺錢能力有限,沒有成本轉嫁的能力。若不幸大客自身的生意不好而要求減價,往往這企業只能就犯,最終影響自身的盈利。

這企業優點是生意穩定,而市盈率不高及高息是吸引之處,但若大客生意不好,盈利會減少,派息亦會減少,這點不得不注意。

————————————————

Q679:成哥,我知你在讀書時期已不斷睇投資書、聽講座、上課程,想問下其實得著係咪真係咁大。其實我剛中學畢業,已買了你的書,寫書真的很了不起,我想上你的課程,但價錢對我來說有點貴,其實上課程的效果是否真的那麼大?另外你有沒有網上課程呢?

龔成老師:若課程對你來說付擔較大,不斷睇書是吸引知識的方法,因為睇書的成本較低,甚至可以去圖書館免費睇,從而獲取到不少知識。

我多年來都是保持學習,睇書、聽講座、上課程都有,我是一個很節儉的人,對我來說,過往上課程是覺得很貴的,但我都會比錢上,因為幾種吸收知識的方法,都有不同的得著。

睇書獲得的是基礎知識,但上課程獲得的是針對於某範疇的知識,而且往往是實用知識,因為課程往往有大量實戰例及及情況分析。而最重要的是,上課程是一個互動環境,你不明白的可立刻問,在知識的增長當然不少。其實,書及課程可說互相補足的範疇,所以都是有用的。

但你注意一點,就是有關錢的概念,好多人因唔想比錢增加知識,以至自己一世無錢,而有錢人就會愈花錢愈有錢。

因為你的著眼點集中於「我付不起」、「這課程佔了我開支不少」、「我很少花這類支出」,你著眼於支付的部分。但其實,我們學習知識,重點不會放於「支出」,而是集中在「獲取」,這課程能為你增加多少知識,這課程能令你在一生中,能減少多少虧損,以及能助你在一生中賺多少,這才是重點。

其實這正是窮人思維與有錢人思維的分別,窮人著眼於減少,有錢人著眼於增加。由於窮人不願意花錢花時間去增值自己、去為自己創造更多的將來收入、去為自己的財富產生更大的增值,以至一生都無法致富。

相反,擁有致富思維的人,願意花錢花時間去提升財務知識,以致將來收入不斷增加,財富增值的速度亦不斷加快,造成愈花錢愈有錢的效果。

你而家錢不多,花不起是正常,可睇多些書先,但將來有能力,一定要花錢上課程(不一定是我的),因為這些錢是愈花愈有錢的。

另外,我遲些都會開始有網上課程,你可留意這個網站:https://80shing.skx.io/

————————————————

Q680:我係股票班學生,龔sir你好,想問下對151旺旺的睇法, 已知近5年ROE>20,市盈率已降至16倍水平,現價是否合理價位?還有甚麼地方要注意?謝謝!

龔成老師:的確,旺旺(0151)的股本回報率很高,是我們的選股範圍,但這是優質股的其中一個特質,因此要再加分析才知是否優質股。

當觀察佢的5年生意時,就發現生意沒有甚麼增長的能力,而近年有略為倒退的情況,反映這企業的增長力有限。另外,5年間的盈利增長同樣有限,而近年亦有倒退情況,這點不得不注意。

這不是說這股不優質,而是增長力只是一般,當以市盈率作估值時,就不會給予大高的估值。

其實,旺旺的品牌有一定價值,加上有歷史及領導地位的產品,這是優勢,亦是加分的地方。

而當仔細分析這企業的業務結構時,主要可將產品劃分為三大類:乳品及飲料類、休閒食品類、米果類。

乳品及飲料類為業績貢獻了不少,但其增長及確立市場是較近年的事,而在2014年開始,旺旺的乳品業務收入增長放緩,亦低於管理層預期,之後令業績倒退,而接下來預期競爭將加劇,不確定性仍存在。

綜合各種因素,旺旺有不錯的品牌,吸引的毛利率及高ROE,都算有不差的質素,但近年經濟放緩,競爭激烈,都令市場仍存有不確定性,但整體而言,評價算是不過不失。

至於市盈率方面,現時的16、17倍市盈率算是不過不失,已反映了當中的品牌及賺錢能力,但由於存在不確定性,以及正處於放緩週期,故這刻略有保留,相信15倍以下才開始投資會較好。

———————————————-

多謝各位提問,若然你有問題想向本人發問,可在龔成的facebook專頁中(www.facebook.com/80shing)inbox龔成,但要注意如無特別聲明,有可能將問答放上網的,當然,會將發問者的身份,以及有關個人的部分刪去。

另外,由於提問人數眾多,見諒無法即日回覆,如果是普通的提問,預起碼要3天以上才能回覆,若然是較複雜的提問,起碼要7天才能回覆,希望各位能諒解。