大企業部署裁員 就業市場步入寒冬︳凍鍵茶專欄

根據政府統計處嘅數據，5月至7月嘅季節性調整失業率由上期嘅3.5%升到3.7%，而失業人數增加咗大約8800人，達到14.5萬人，係自2022年10月以來嘅新高。最誇張係餐飲同建築業，失業率分別升到6.4%及7.2%。

經濟唔好，影響唔單止餐飲同建築業，依家連我哋日常生活都開始受到影響。有無發現「總有一間喺左近」嘅7-11最近經常做77折優惠？有啲野真係平到笑，好似最近買Haagen Dazs雪糕，做緊優惠之餘，7仔再折上折，除開只係14蚊一杯，抵過超市。

呢個可謂「不景氣嘅福利」，兜個彎話俾大家聽近期經營困難。7-11一向以方便、開足24小時見稱，但依家要以平價取勝、有啲分店仲要唔夠生意縮短營業時間，令人唏噓。

另一個受影響嘅係宜家傢俬Ikea，本來已經係傢俬界嘅「窮人恩物」，但經濟低處未算低，大家都寧願去「淘」寶或者「併」多多，慳得幾多就幾多。

經濟環境影響經營決定，近日傳出牛奶國際(DFI Retail Group)旗下嘅零售業大裁員，包括惠康、七仔、萬寧、宜家等公司都有裁員計劃。全港7-11有超過1100間，萬寧有300幾間，惠康有280間分店，全港員工大約有7000人，幾乎全部都係基層工種。咁樣睇嚟，香港失業率似乎仲未見頂？不過都要睇吓佢哋係請長工定合約多，如果唔係，到時又唔計落失業率，政府咪又話失業率冇高到。

2025年剩低四個月，大企業要為全年業績作好安排向股東交代。學廿蚊張張宇人話齋，唔好「當埋老婆張棉胎」— 死撐。