【凍鍵茶專欄】業績見真章 ATMXJ 變ATX
廣告
最近港股升穿25,000點，但支撐港股嘅未必再係昔日風頭無兩嘅ATMXJ（阿里巴巴、騰訊、美團、小米、京東）。京東(9618.HK)第二季業績已經慘遭滑鐵盧，美團(3690.HK)剛發佈嘅業績亦無眼睇，第二季收入918.4億元人仔，差過預期，經調整盈利竟然按年減少89%，令市場震驚。外賣大戰對美團影響尤為明顯，股價即日大跌超過一成。
究竟美團、京東可以「咸魚翻生」，定係只會「死貓彈」？可以從以下幾個方向去思考：
一、抖音本地生活來勢洶洶，如同餓虎搶食，以低佣金搶灘，對於美團嘅地推鐵軍來講，如何擊敗呢個靠演算法推流量嘅巨頭，實在係一大挑戰。
二、每單生意利潤已經如履薄冰，但成本卻年年上升，用戶喊貴、商戶要求減佣、騎手要求加薪，美團被「三昧真火」夾擊，真係要諗諗點拆掂佢。
三、「買菜」、「充電寶」等等新戰場不斷燒錢，本來依賴核心業務嚟養戰，但核心業務自身難保，未來仲有無咁多子彈支持新業務發展？
至於京東，一樣被拼多多(PDD. US)直線抽擊，行高檔行唔通，同時又俾抖音、快手嘅「帶貨」模式捲走流量。原本佢嘅自建物流係護城河，但後來俾順豐(6936.HK)、極兔速遞(1519.HK)追住打，京東難以反擊。但對於京東來講，單靠電子產品嘅銷售已經難以保持優勢，面對拼多多低價競爭，京東嘅定位反而係一個束縛。
ATMXJ好大機會得返ATX繼續頂住
依家騰訊(700.HK)佔恒指成份比重8.27%，阿里巴巴(9988.HK)佔7.72%，而小米(1810.HK)佔6.14%，可以講恒指能否再上，要靠ATX喇。
免責聲明：本專頁刊載的所有投資分析技巧，只可作參考用途。市場瞬息萬變，讀者在作出投資決定前理應審慎，並主動掌握市場最新狀況。若不幸招致任何損失，概與本刊及相關作者無關。而本集團旗下網站或社交平台的網誌內容及觀點，僅屬筆者個人意見，與新傳媒立場無關。本集團旗下網站對因上述人士張貼之資訊內容所帶來之損失或損害概不負責。
