【凍鏈茶專欄】泡泡瑪特難逃「股一藍價便殘」魔咒？

泡泡瑪特人氣公仔Labubu兩年前意外彈起，仲食正「盲盒經濟」，限量版賣斷貨，二手炒至幾千蚊一隻。早前一款全球唯一一隻薄荷色 Labubu喺上海以 108萬元人民幣高價成交，限量版棕色亦都拍出 82 萬元人民幣，再次刷新潮玩拍賣市場紀錄。不過潮流呢回事，總是「來又如風，離又如風」，而老闆們亦深知呢個道理，呢兩年有風駛盡𢃇，炒到市盈率高達100倍。

另一邊廂，大股東亦悄悄沽貨。據港交所權益披露資料顯示，創辦人王寧，同埋佢嘅相關企業，包括GWF Holding 、Pop Mart Hehuo Holding Limited，曾經減持咗2,170 萬股，王寧個人套現約 15.62 億港元。機構投資者蜂巧資本亦喺今年 4 月底至 5 月初全數清倉泡泡瑪特嘅持股，總計套現22億。蜂巧資本合夥人屠錚個人亦減持，前後套現約 8億港元。呢兩年，唔單止大股東賺夠仲益埋街坊，聰明嘅小股民應該都有錢落袋，夠買好多隻Labubu。不過有五十六年歷史嘅恒指就永遠走在市場後面，一次又一次印證「股一藍價便殘」。

好似石藥集團(1093.HK)，作爲第一間藥業股成為恒指成份股，股價近乎腰斬，當時嘅高位，暫時仍然係今日高位。此外，為咗要反映「新經濟」，恆指會不時錯誤地納入一啲「虛火」，好似阿里健康(0241.HK），暴瀉87.2%。仲有李寧(2331.HK) 股價染藍後累挫84.7%，農夫山泉(9633.HK)2022年染藍後亦大跌一半，捱足幾年，呢幾個月股價先至見家鄉。相反，2020年「被搣柴」嘅太古(0019.HK)，至今股價已經升咗7成，唔通恒指班管理層有大近視？