對沖大鱷無鬧錯 東亞前景堪憂︳凍鏈茶專欄

近年香港商廈同內地樓市跌到無底深潭，一直擁抱內地市場嘅東亞銀行自然「七勞八傷」。份業績報告就出盡財技冚住，將壞帳包裝成資產，例如用8.24億買入投資物業，明眼人一睇就知係接咗客戶嘅「損手磚頭」自己啃。其他投資同樣見紅，包括2011年買入馬來西亞Affin銀行兩成股權要減值，內地一間唔開名嘅聯營公司又蝕3.05億。

東亞仲想淡化「減值客戶墊款」比例微跌到2.69%，但特殊準備金由舊年37.98億，跳升到今年43.95億，反映資產質素繼續變差。特殊準備再上一級就係「減值客戶墊款」，即係話東亞仲未脫離危險期。

管理層方面，依然係「李氏王朝」話事。88歲嘅李國寶同兩個仔李文橋、李文斌做聯席CEO，三父子舊年合共攞咗6290萬酬金，但持股僅得7.26%。點解可以繼續掌權？全靠李國寶早年引入外資股東制衡，包括日本三井住友銀行（19.79%）、西班牙凱克薩銀行（19.01%）同馬來西亞國浩集團（16.21%）。

東亞銀行早年俾美國對沖基金Elliott狙擊，被指管理不善兼落後、股東回報低，甚至入稟法院要求賣盤。

東亞銀行主席李國寶透過「馬住」外資股東銀行，以抵抗Elliott嘅壓力，最後Elliott無功而還，東亞透過動用銀行資金回購Elliott 8.43%股份，才平息長達七年嘅股東鬥爭。不過時間證明Elliott當年嘅批評並非無的放矢，依家李國寶年事已高，東亞困局未解，兩位太子有冇能力守住個東亞銀行呢個百年招牌都好成疑問。