買樓需要理性 也需要直覺與勇氣

筆者：「又問？張Sir，你問咗好多年啦！」
朋友：「係咩？有冇咁誇張呀？」
筆者：「年年舊同學聚會你都問，最少五、六年，仲未買？」
朋友：「買樓係重要決定，想了解清楚先嘛！」
筆者：「其實你到底想了解咩，要了解幾年？」
朋友：「知多啲唔同地區啦、環球經濟啦……」
筆者：「明晒！咁你覺得幾時先了解夠呢？」
朋友：「其實好多嘢會影響樓價，經濟啦、政策啦、利率啦……」
筆者：「明晒！到你了解完，樓價都升咗超過一倍。」
朋友：「咁我應該點呢？」
筆者：「買樓有時需要一啲直覺、勇氣。」

買樓講經驗 難只靠數據

張Sir是筆者一位大學同學，教書先生，高薪厚職。記得當年筆者的培訓中心開幕，張Sir知道我對物業投資有點研究，於是就問我：「依家係咪買樓時機？」

每年舊同學聚會，張Sir都會問同樣的問題，最初兩、三次我都會好認真答，還會替他緊張，代理有筍盤，如果適合，我都會介紹給他。到了第五、六年，樓價由2009、2010年的低位，闖高一、兩倍，我就已經沒好氣再認真回答了。

甚麼因素影響樓價？十日十夜都數不完。可能因為張Sir教經濟，對於很多經濟學現象尤其敏感。可惜這個世界變數太多，人為因數更多，沒有一條公式可以準確計算樓價。基本的認識固然要有，然而過分盲目追求數據、邏輯，反而會令自己一次又一次錯失機會。

更嘔血的是，身邊有很多朋友跟張Sir一樣，還未買樓，又或者多年前買過一次半次自住樓，對樓市認識不多，平時少睇樓，少與代理、投資者打交道，只顧搜集資料、數據，幻想可以從中找到一條必勝的方程式，筆者不禁懷疑：「識鬼睇咩？咪傻啦！」

近日新盤銷情的啟示

有朋友問，最近很多新樓滯銷，個別豪宅銷情暢旺，有何啟示？例如最近的何文田大戰，最貴的天鑄賣個滿堂紅，近日開售的西半山殷然，首日開盤近乎搶購，首批買家絕大部分都是買兩個單位，幾千萬元入場。筆者有點意外，細心想想，確有啟示。

買幾千萬元樓的買家，身家動輒幾億元。除了中超級金多寶，一個普通打工仔何來幾億？筆者估計買家多數是老闆或是資深投資者，他們在這刻入市，是否意味着他們覺得這個價錢已經差不多見底呢？

相反開細則多，吸引中產、散戶投資者的樓盤銷情未如理想，再加上媒體報導、不同平台的分享評論，反映普遍市民大眾仍然睇淡，兩路英雄似乎有不同預期。

筆者問自己，信有幾億元身家的高手？還是信大部分人呢？樓，是人的市場，資料、數據固然要參考，但實戰經驗更重要。

今天很多成功的投資者，過去都曾經歷過起起跌跌，包括97金融風暴、08金融海嘯等，才能夠磨煉出智慧與經驗。雖然他們是市場中的極少數，然而參考價值似乎更高。

講番張Sir，自己都未買過樓，對樓市卻理論多多，多到過去幾年都唔敢入市，何苦呢？買樓、賣樓，總需要一點勇氣，最重要是計好自己條數，不要孤注一擲，量力而為，就能累積經驗與財富。

(相片：何柏基攝)