「公屋仔」贏在起跑線 究竟贏幾多條街呢?

樓市

廣告

早前討論區有港女以擁有的物業,排序列出擇偶條件,立即有不少人批評「拜金」!

不過排序中,「住公屋」排行高於「供緊樓」的結果,卻有網民認同,皆因住公屋做「公屋仔」,其實比住私樓供樓優勝,絕對是一隻「潛力股」!做「公屋仔」可以贏在起跑線,究竟可以贏幾多條街呢?

撰文:Nic Chan

1. 供樓 vs 交租

雖然買私樓住可以有一筆「潛在資產」,不過一日未供完樓,一日層樓都屬於承造按揭的銀行,而非你的名下!

現時樓價高,俾足3成首期,剩下7成按揭的每月供樓開支都不少,而且加息週期臨近,供樓負擔只會愈來愈多,隨時每月供樓要10,000幾至20,000元!加埋管理費、差餉地租,每月要俾多千幾元,隨時份人工都所剩無幾!

講返住公屋,除了管理費差餉地租全免,租金亦夠低,一個2人單位隨時月租3,000元有找。如果有經濟困難,還可以申請延遲交租~有時政府更有免租優惠,1個月慳多幾舊。儲起筆錢,足夠一年去幾次旅遊,甚至供仔女讀大學!

「公屋仔」贏在起跑線 究竟贏幾多條街呢?

2. 維修費用差一大截

住私樓,除了要負責自己單位內維修,所住大廈各種維修都要業主負責!以為供完樓可以不用再俾錢?錯啦~業主要定期驗窗,30年樓齡更要驗樓做大維修,如果遇上無良商人要天價維修,層樓加按幾次都唔夠俾!

至於公屋呢?當然無維修煩惱,因為只要每月準時交租,所有維修費用都由政府承擔!小至換水喉,大至天花板剝落、換窗、換廁所,通通有專人跟進!

3. 奇則 vs 實用間隔

私樓「奇則」多籮籮,除了鑽石型客廳,幾10呎長走廊,甚至棺材式露台、窗台大到可以瞓、坐唔落廁所……想好似公屋間隔四正,好好利用空間?no way!

如果買到好似新盤加多利軒,客廳面積只有60.8平方呎,不單比車位細,更細過公屋最低面積標準(室內人均居住面積不少於75平方呎),那一個較好?高下立見吧?

延伸閱讀:【奇則充斥 5大揀宅注意事項】
http://www.edigest.hk/Vip/detail?id=2383

「公屋仔」贏在起跑線 究竟贏幾多條街呢?

4. 商場公園配套

公屋配套簡直用perfect形容,雖然大部分屬於領展商場,不過普遍有齊食肆、商場、超級市場,部分更提供球場、遊樂場等。私樓呢?如果單幢樓可能無會所,如果住日出康城可能無商場食肆,如果九龍站上蓋,樓下是名店商場專賣貴貨,想食麥記都要去港鐵站最底層囉!

5. 換樓容易度

住公屋可以有綠表資格,申請居屋更方便;如果與家人同住,將來亦可以用「擠逼戶」原因,申請換大單位或調遷。而私樓要換樓,除了要預備一筆首期,更要限時完成,否則要俾額外印花稅,總之要經歷多個難關同抬錢才可順利換樓!

延伸閱讀:【94萬買市區樓 綠置居接受申請】

經過幾輪比試,總結一下~「公屋仔」可算是贏晒!大家以後不要睇小「公屋仔」啦!

延伸閱讀:
【港女擇偶條件 原來住公屋勝私樓】
http://www.edigest.hk/Vip/detail?id=5675
【大專畢業想住私樓 要幾多年先買到?】
http://www.edigest.hk/Vip/detail?id=5569
【樓價升不停 邊8類樓盤搶先破頂?】
http://www.edigest.hk/Vip/detail?id=5486
【唔受「2047大限」影響有邊啲物業?】
http://www.edigest.hk/Vip/detail?id=5323