最少延遲15分鐘 最後更新:
關閉
我Sell保險我都係人 你咪叫我高級神棍

我係一個前保險從業員,而我知道好多人都話我係保險佬、高級神棍、衣冠禽獸。不過我呢個衣冠禽獸,對於呢行,有啲啲嘢想講。

入行即斷六親

對我而言,所謂「入行無朋友」呢句嘢都好睇份人,斷六親就多數言過其實。通常講入行斷六親嘅,多數都係份人裏裏外外都對「開單」表現出野獸般慾望嘅行家,自己入咗行後,約人嗰陣聽見人哋答句「唔得閒,下次先」就話人哋歧視你做保險,實在諗太多。講真,如果你份人本身就係太aggressive,畀人覺得成日「猴」住喺你啲親戚朋友身上開單嘅話,相信就算你唔係做保險呢行,你嘅朋友都唔太多。

真正要詮釋「入行無朋友」呢句說話嘅,應該咁講,係「入咗行就再無乜新朋友」,對於新認識你嘅人聽到你做保險,多數都會對你敬而遠之,驚你搵佢著數嘛。唔知幾時開始多咗一班為求開單不擇手段嘅業界害蟲,好快呢個社會就標籤哂所有保險仔做高級騙徒,但其實呢行真係仲有啲只求賺少啲等時間鬆動啲可以照顧小朋友或者屋企人、或者畀啲時間自己追吓夢咁,但求本住良心有些許收入、而唔係個個都為咗賺大錢哄身邊每一個人落搭。

富二代玩哂

唔好以為富二代肯出嚟打份保險工就叫自力更生,多數富二代都有極有利嘅社交圈子,隨便就數到幾個咩開餐廳呀、開咩咩公司呀嘅Uncle X或者Auntie Y咁,跟住接哂呢啲世叔伯嘅水險火險做就爆數做Top Sales,對於佢哋嚟講咪又係做吓啲文件嘢又有錢收,仲輕鬆過以前去外國讀書寫paper。

講到唔靠屋企人咁,頂多咪父母唔會直開單畀佢做,但身邊嘅世叔伯都好識做,而且比較相信一個有錢仔多過唔知乜頭乜路無後台嘅阿水,一班好努力搭幾廿條路去識呢啲人哋世叔伯嘅阿水,sell完一大輪,花幾多幾多日去準備資料去傾,點知客仔一個屈尾十就搵咗無付出過啲咩努力嘅世姪簽單。

Top Sales?得啖笑。

借糧制

如果你係Fresh grad畀人哄入行,我諗你多數都會聽過「借糧」呢套系統,而呢個,可以話係做咗廿幾年人以嚟,本人人生做得最錯嘅決定。

剛畢業,手頭無錢又要返工的確好難生活,亦好難堅持喺保險界度打滾太耐,所以保險公司就諗咗呢條橋出嚟繼續哄你入行。大家都知保險理論上係無底薪,但公司就出咗啲借糧制度,允許你每月拎幾千蚊底薪,而你還嘅方式就係同公司對數。如果你拎咗$5000底薪,每個月就要跑返起碼三倍嘅數畀公司。你嘅上司會畀無限大嘅壓力你,因為你嘅底薪係會喺上司度扣,試問佢又點會由得你拎完底薪又表現低迷呢?你唔好以為自己其中一個月跑爆數就有錢分,一日你仲係拎緊底薪,你今個月跑突嗰啲,咪撥落下個月囉。點解?同我哋平時sell你哋嘅時候講嘅道理一樣,「今日唔知聽日事」,你今個月爆箒,但如果你下個月唔爆,咁公司咪蝕囉,所以你爆嘅,我keep住,直至你唔玩借糧呢個遊戲勒,你就有機會賺多過你筆底薪喇。係咪好勵志呢?

結果我喺呢個制度下萬劫不復,好辛苦先爬返出嚟,希望同企圖入行嘅你哋講聲,千祈唔好重蹈我嘅覆徹,我試過,真係好難受。

奉勸各位,你有路數嘅,的確入呢行就純粹當多筆額外收入,但唔好淨係聽人講呢行嘅好嘢就入行。始終呢行個名,而且畀好多人玩到負面哂,入得行,你就要抵得住人哋嘅眼光。你可以好有野心,但唔該唔好太不擇手段,因為呢行,始終仲有真心想做好呢份工嘅人,要同你哋榮辱與共。

經一守護神鳥,閒時周圍飛,務求以最快速度、搵最趣怪的料和大家開心share!