買樓給子女 才是好爸爸？

朋友Ｂ： 「諗吓先啦，可能唔生啦！」
筆者： 「吓？！你哋唔係話鍾意小朋友架咩？」
朋友Ｂ： 「以前就係嘅，宜家唔係咁鍾意啦。」
朋友Ａ： 「受咗咩刺激呀？咁大轉變嘅？」
朋友Ｂ： 「宜家做老豆好辛苦架。」
筆者： 「咩年代做老豆都辛苦架啦，值得嘅！」
朋友Ａ： 「你就梗係口响啦，咁多樓收租，生多幾個都冇所謂。」
筆者： 「唔一定要洗好多錢嘅，唔讀咩國際學校咪得囉。」
朋友Ｂ： 「讀書事小，宜家做老豆，要買埋樓俾仔女架。」
朋友Ａ： 「咁又係喎，你自己都仲租緊樓，點買？」

 

筆者： 「自己大個識賺錢啦，唔一定要你買嘅。」
朋友Ｂ： 「你講呀！個個同學都有，你冇，咪好唔開心。」
朋友Ａ： 「咁又係喎，宜家好似…買樓俾仔女先叫好老豆。」
朋友Ｂ： 「如果唔生，都仲可以食好啲、著好啲去吓旅行。」
朋友Ａ： 「生咗，細要供書教學，大要買埋樓俾佢，唉~~」
朋友Ｂ： 「咪係囉，點解要作賤自己呢？」
筆者： 「唉…」

 

文：1%Anthony

 

父親、母親確實偉大，而且愈來愈偉大！
近年，愈來愈多朋友傾向婚後唔生！部份因為對香港前途冇信心，部份因為生活成本太高。正如朋友所講，自己都未能夠安居樂業，怎會有信心給下一代好的成長環境？怎有能力買樓給他們？

 

每個年代都有自己的困難，上一代經濟環境差，反而願意生兒育女！筆者父母理念是…天生天養，知足常樂，不一定要住洋樓、養蕃狗，平平凡凡、平平安安就好。

我們也從沒想過要父母買樓給自己，反而父母對子女有期望，養兒防老，老來從子。

 

是高樓價惹的禍？

不知從何時開始，好爸爸、好媽媽的定義是…買樓給子女！新盤現場記者訪問準買家，很多父母都高談闊論…買樓給子女，被塑造成慈父、慈母，難道買不起樓的，就不是好爸爸、好媽媽？
朋友仔Ａ： 「我阿爸買咗匯璽俾我！」
朋友仔Ｂ： 「你就好啦，我阿媽買咗海之戀俾我咋！」

朋友仔Ａ： 「你呢？你父母買咗邊度俾你？」
自己個仔： 「冇呀！佢哋話冇錢。」

朋友仔Ｂ： 「咁點呀？唔通要你自己買呀？」
朋友仔Ａ： 「你阿爸阿媽都唔鍚你嘅。」
…可憐！是的！正如朋友所說，如果孩子身邊的同學、朋友，個個都有父母買樓，自己沒有，多不快樂！與其無法滿足社會被扭曲的價值，不如唔生！何必辛辛苦苦養大仔女，反被埋怨？

 

還是香港人太有錢了？還是政策扭曲？

高樓價不是元凶，1997的時候都是高樓價，但都沒有這個問題，最主要的原因是政策！政策！不但扭曲了樓價，更扭曲了價值觀！

 

以前的父母，即使自己賺到錢，都不一定會買樓給子女，因為自己名下可以買很多個物業，老了、快要離世了，才分身家。

現在呢？政府推出第二套房15%印花稅，全港市民立即轉動腦筋，如何可以慳稅！

 

香港人很有錢，有錢沒處花，總要買資產，自己不能買，就買給家人，有錢父母，用子女名義買樓，被讚美為慈父、慈母；有錢子女，用父母名義買樓，被讚美為孝子、孝女。

 

今天要做好爸爸，財富、資產要求更高。一份工作、一份收入…是不夠的！要有多幾個收入來源！

 

很多朋友都奇怪，為甚麼香港人那麼有錢，樓價那麼貴，仍然打晒蛇餅搶購新樓，破晒頂去搶二手樓。一個家庭要花的錢不少，那裡來那麼多收入呢？

 

秘密是…絕大部份的千萬富翁，其實都有好幾個收入來源，工作的收入，只是其中之一，還有投資的斬獲、副業賺的錢、物業及資產帶來的現金流等，要做富一代，做好爸爸，就要學會開拓收入來源啊，不然怎麼買樓給子女呢？

 

如果筆者當了爸爸，不會直接買樓給子女。
從沒付出過，就不會珍惜，寵壞了！
筆者或會借他們首期，要他們自己供、自己投資，能走多遠，就要靠他們自己的本事。唸書嘛…筆者不甚麼名校、國際學校，但是理財嘛…一定要從小就學。在今天的定義下，可能不是好爸爸呢！
各位爸爸，努力啊！

作者為1%投資培訓中心課程總監，教授物業投資、上車及裝修等課程。暢銷書《上車又住又賺》及《樓轉命運》作者，網誌《第一桶金》總瀏覽逾300萬人次，並曾擔任TVB《有樓萬事足》顧問。

Fan Page《第一桶金》： www.facebook.com/anthony.wealth