凍鏈茶專欄|2024炒減息 趁機鎖定高息股債

投資

廣告

轉眼又到2024年,今年投資主題一定係 ── 減息,聯儲局雖然未正式宣佈減息,但就已經打晒開口牌。最近,唔少本地銀行嘅定期存款利息都已經減緊落嚟﹐小弟上上星期搵交行做咗筆定期去到5.2%,但一個星期之後,小弟嘅老友同一個銀碼搵返同一個經理,最盡都係俾到4.9%,佢仲話3個月後應該會更少,所以食息一族要諗定2024年點投資,先可以做到4、5厘息口回報。咁到底有咩選擇?

  1. 機管局發行50億元零售債券係吸引嘅。年期為2.5年,每年定息4.25厘,債券每3個月派息一次,最吸引係設有提早贖回機制,投資者可於截止時間,即係每季付息日前30至60日遞交提早贖回要求,之後就可以獲得100%本金同相關應計未付利息。市場預期美國息口已經見頂,今次機管局債券年息4.25厘,鎖定兩年半息,相信有都有吸引力。
  2. 買債。債券價格走勢同息口相反,息口見頂就有利債券,如果而家已經買緊債,可能要考慮延長存續期,鎖定個息率。咩債?除咗頭先講嘅機管局可以考慮,要分散風險可以考慮美國國債,或者投資級別嘅公司債
  3. 高息股。收息股股息率要高於定期存款,即係一年回報要超過4、5厘先好考慮。近期已經有好多人偷步炒領展(823.HK),不過咁,雖然低息係對REITS有利,但唔係領展喎,佢有管理層折讓負面因素,同埋香港物業折讓因素。如果係都要揀,我寧願揀誠哥嘅置富產業信託(778.HK),或者係買外地嘅REITS 。另一方面,可以諗吓公用股,港燈(2638.HK)或者中電(2.HK)都可以考慮,但煤氣(3.HK)就似乎未得。至於好高息內房股就避之則吉啦。

圖片來源:資料圖片