仲睇定啲唔上車 遲吓連大灣區樓都買唔到 | 內地樓市 | 置業入門

樓市

【置業入門・大灣區樓】好多人以為,大陸好多地、好多樓,唔怕冇樓買。唔靚嘅大把你揀,靚嘅一房難求!筆者Anthony認為,仲睇定啲?再遲啲,可能連大灣區樓都買唔到!

撰文:1%Anthony | 圖片:法新社

真人真事…

有一次跟前輩到大灣區睇一個很不錯的樓盤。

前輩:    「呢個盤規劃唔錯喎~~」

銷售:    「係呀,攞咗好多獎,個個睇完都讚架。」

前輩:    「賣幾錢呀?」

銷售:    「而家未開盤,未知住,預大約1.5萬/米。」

前輩:    「即是千幾蚊呎,都唔貴丫!幾時開盤呀?」

銷售:    「未知住,老闆話擺多陣先,遲啲價錢靚啲先賣喎。」

前輩:    「嘩!咁你老闆都好有實力喎。」

銷售:    「咁响大灣區嚟講,我哋都係大發展商嚟嘅。」

前輩:    「可以俾低些少訂,到時開賣通知我嗎?」

銷售:    「可以呀~~」

位置靚、環境靚、規劃靚…

同行朋友都心思思,打算睇埋樣版房(示範單位)就落訂。

朋友:    「示範單位响邊呀?」

銷售:    「就响隔離之嘛。」

朋友:    「麻煩帶我哋去睇吓丫。」

銷售:    「可以呀,不過呢…我哋有規矩,要先驗資。」

朋友:    「驗資?咩嚟架?」

前輩:    「即是要俾證明,你有咁嘅錢,先可以去睇樓。」

朋友:    「吓?!唔係化?」

前輩:    「而家大陸唔少優質、搶手嘅樓盤都有咁做架。」

朋友:    「點驗呀?要俾銀行Statement佢睇?」

銷售:    「咁又唔使,你微信過10元俾我,就見到結餘。」

朋友:    「即係見到你戶口要有百幾萬先睇得樓?」

銷售:    「唔使,可以做按揭嘛,有4、50萬就得。」

朋友:    「我未轉數去大陸戶口喎!」

前輩:    「等我嚟啦~~」

前輩征戰大陸30多年,幾十層樓在手,好多仲要唔係幾十萬的平價二手舊樓,單單是蛇口間豪宅都已經市值逾3000萬,身家雄厚,當然冇難度!不過這次經歷確實讓同行的同學有深刻體會…

好多人以為…大陸好多地、好多樓,唔怕冇樓買。

事實是…唔靚嘅大把你揀,靚嘅一房難求!

例如一些比較偏遠的地區,又或者發展潛力一般的城市,又或者質素不高、開價偏貴的盤,確實很多樓賣,甚至內需消化唔晒,要大批攞到香港賣,請埋你搭車、食飯,帶你去考察買樓。

然而一些有發展潛力的城市,一些靚地區、靚地段,開價又不貴的優質樓盤,搶到顛!不妨看看大陸地產新聞,很多大城市賣樓,好似搶黃子華飛咁,大排長龍又有,擠滿體育館又有,到了開盤的時候,甚至會出現…日光!秒殺!…香港人?見都冇機會見!

有網友陰謀論地問:「靚盤又點會平賣?」

他們會覺得…新樓一定有溢價,一定比二手貴很多!

事實是…很多原因都會平賣,其中一個原因叫限價。

當然不是每個樓盤都會平賣,但很多時早期發售的貨源都會較平,因為大陸樓盤規模大,動輒幾千伙,最早幾批盤源平少少,之後再加價加推,才可以長賣長有,這點大家應該明白。另外一個常見原因是限價,大陸政府其中一項調控措施,限制新盤售價,不能賣得太貴,如果識揀,隨時搵到貼二手價的新盤,但質素就比附近的二手高很多,當然另一個問題是…要有人脈,搶得到!

幾年前…香港人看不起一些二、三線城市,看不起大陸樓。

今天…很多城市、很多大發展商,看不起香港人。

以這次考察的大灣區二線城市為例,幾年前筆者初次跟前輩去考察的時候,到處沙塵滾滾,人不多、車不多,只見泥頭實跑來跑去,就像早幾年將軍澳往康城的大道,那個時候當然大把樓盤等你揀。然而幾年過去,大型樓盤、大型商場陸續落成,到處都是人,到處都塞車,再加上大灣區的概念,內需加上外來人口,已形成很龐大的購買力,每次有靚樓盤開售,都會人頭湧湧,最可怕的是…很多排隊的大陸買家,都是全付(Full Pay)的!幸好前輩人脈網絡強,得老總關照,可以留一些給我們,不然肯定唔夠人搶。