綠置居抽唔抽得過?

綠置居抽唔抽得過?

朋友:「我想抽綠置居,點睇?」
筆者:「你唔係諗住呢世都唔買樓咩?抽乜鬼?」

朋友:「呎價5,600左右,最平94萬咋!」
筆者:「只限綠表喎,你諗住交返間公屋俾房委會?」
朋友:「我阿媽嗰間公屋囉,佢一個人住之嘛。」
筆者:「依家交租千幾蚊,將來供樓幾千蚊,阿媽自己住?」
朋友:「阿媽搬嚟同我住,諗住租俾人。」
筆者:「綠置居同居屋一樣,唔租得出去架!」
朋友:「係咩?親戚都唔得?」
筆者:「梗係唔得啦,犯法架!」
朋友:「咁我搬去同阿媽住。」
筆者:「咁要買大間啲,可能要200幾萬,供成萬銀喎。」
朋友:「我依家租間村屋,加埋阿媽間公屋,都成9,000元啦。」
筆者:「咁計又抵,抽啦!」

朋友:「係咪呀,信你啦!」

近日好幾個朋友問綠置居抵唔抵買,筆者與戰友們近年有投資新蒲崗的工廈,見區內發展不俗。以價錢計,只屬市價,抵唔抵抽要視乎個人情況。

房委會評估市值呎價9,000多元,以六折計算,得出呎價5,000多元。現時新蒲崗的私樓如越秀廣場、新蒲崗廣場等呎價約11,000多元,估算偏低,不過要計算物業質素上的差異。綠置居是房委會的作品,質素應介乎公屋與居屋之間,比私樓差一皮,市值呎價9,000多元是合理價。

如果你純粹為住

綠置居只接受綠表申請,換句話說要放棄自己的公屋單位。細公屋單位月租千多元,買綠置居要百多萬,月供5,000、6,000元,大一點的公屋單位月租2,000、3,000元,買綠置居要200多萬,月供逾10,000元,每月多付約4倍,還要付高昂的管理費。

如果你的年紀已經不小,預期將來也不會怎麼拼搏,資產及收入不會超額,純粹希望有個地方可住,為甚麼要買呢?為甚麼要加重自己的負擔呢?

筆者有朋友已經年逾50,兩老口子在將軍澳公屋住了廿幾年,子女都大了,又問筆者抵唔抵抽,真的想搬過去嗎?抽來幹嗎?

如果你想資產增值

如果你年紀不算大,預期將來會拼搏,資產及收入將來有機會超額,有機會買居屋甚至私樓,那就應該抽了。

筆者身邊有很多朋友,就是怕家庭收入、資產超出限額,有前途的工作唔敢返,有升職機會都唔敢接受,有機會投資都唔敢去馬,免得失去公屋,生活頓失預算。

如果是這樣的話,不如及早買居屋或綠置居,釋放自己的人生,樓價賺多少是其次,賺了人生才可貴!

居屋好定綠置居好

很多學者專家說,買居屋不及買私樓,居屋不能出租,出售又要補地價,不值得買云云。鬼唔知阿媽係女人咩?私樓梗係好過居屋啦,有錢先得架!

居屋、綠置居及公屋,將來可以賣給其他綠表白居二人士,靚區靚位,有價有市。如果買新居屋,一般是市價七折,如果買綠置居,是市價六折,將來賣出街,就可以比其他居屋的對手平一成,更有優勢,咁睇又買得過喎。