人生不留遺憾 盡早戒掉呢16件事 抱怨愛你的人 做事太慢 | 網民熱話

熱話

遺憾網民熱話】當你今年仲係20、30歲,咪以為仲好青春可以浪費光陰。歲月不留人,時間真係過得好快。經濟一週記者整理咗16件做完會留遺憾嘅事,唔想後悔,就要睇睇下文,會令你有新一番啟發。

撰文:浩德 |圖片:unsplash

1. 繼續打一份爛工

明知份工無前途、無錢景,依然不思進取,選擇留低唔辭職,完全虛度光陰。

2.有機會去旅行時,但選擇唔去

年齡愈大,旅行會變得愈來愈難,尤其已成家立室有小朋友,每次計劃旅行支出都以3人以上計,行程要考慮嘅事都多好多。

3.唔學習另一種語言

「書到用時方恨小」從來都係至理名言,讀書時無學好兩文三語,到出嚟做嘢先發現自己英文唔Talk得,國語又講得唔好,喊都無謂。

4. 無將身體健康放首位

經常食垃圾食物、零運動,放假淨係呢埋屋企攤抖不見天日,年紀大咗想行多步都難呀。

5. 忽視你嘅牙齒

牙齒可以話係所有人嘅終身伴侶!但偏偏要將會失去佢哋時,先發覺佢哋嘅重要性。

所以刷牙、牙線、定期檢查,缺一不可!

6. 唔聽父母嘅忠告

細個時總係覺得父母講嘅說話煩厭、唔想聽!但人愈大就愈發現父母講嘅大部分說話都係啱嘅。

7. 太介意其他人嘅睇法

因為某個無關重要嘅人而放棄堅持自己想法,唔做自己當時想做嘅事。

8. 對愛你嘅人抱怨

真正愛你嘅人,先會畀你「任勞任怨」,應該要珍惜。

9. 將青春花喺唔值得嘅人身上

人生無幾多個十年,當發覺果個人「唔對路」,最好及時拍拍籮柚閃人,唔好浪費自己時間。

10. 唔去學煮一道撚手小菜

無論係為自己醫肚定係為呃Like,一定要學識煮一道見得人又好味嘅菜色。

11. 無停低欣賞生活上嘅「小確幸」

要香港人「慢活」實在太奢侈,每日忙忙碌碌咁過,但偶爾停一停,欣賞一下身邊美好嘅小事,都係一種幸福。

12. 做事太HEA太慢

同上一個Point相反,做事太HEA太慢,所有決定所有事都花超長時間去完成,浪費寶貴光陰。

13. 唔陪自己個小朋友玩

當小朋友細個時你會好想佢快啲獨立,最好自己玩唔好做「貼身膏藥」,但當你想同佢哋玩時,會發現佢哋已經長大唔再需要你陪了。

14. 無意識到自己可愛之處

年輕時成日嫌自己呢度唔夠好、果度唔夠靚,其實當時已經係自己最美嘅年華so sad!

15.否定自己

未開始就認定自己「唔得、做唔嚟、實唔掂」,凡事都先否決自己、對自己無信心。

其實第一步都未踏出,又點知自己唔得呢?

16.無留足夠嘅時間畀親人最後悔

正如龍應台所言:「所謂父母、子女一場,只不過意味著,你和他的緣分就是今生今世,不斷地在目送他的背影漸行漸遠。 」

所以大家好應該珍惜雙方相處嘅每一秒。