分享至
    【診所職場事|寶豬趣聞】想要「過時」病假紙嘅先生|珍寶豬

    【診所職場事|寶豬趣聞】想要「過時」病假紙嘅先生|珍寶豬

    有日一位男士嚟到診所。
    佢行埋嚟登記處問:「姑娘,可唔可以開張假紙俾我呀?」

    我:「要睇醫生先可以寫嘅,醫生仲會睇埋你係咪真係需要休息先寫~」
    佢:「我想要返早幾日呀!」
    我:「早幾日嘅就冇得寫㗎啦,淨係可以寫到即日嘅!」
    佢:「唔係呀,你聽我講呀,我唔係交俾公司㗎,我攞嚟自HIGH㗎咋!」

    撰文:珍寶豬funnyclinic)|圖片:電視截圖

    想醫生寫張「過時」病假紙

    你用嚟自HIGH嘅話,你唔自己寫?
    我:「咩情況都好,醫生都係唔會寫返之前日子嘅!」
    佢:「唔係呀,你聽我講呀,你聽我講呀!」
    我個樣似冇聽緊咩:「我聽緊呀,你講呀~」
    佢:「我早幾日返咗大陸,我條女唔知㗎!」
    所以要病假紙嚟做咩?

    我:「你去咗邊都唔關我哋事㗎,醫生點都寫唔返之前㗎啦!」
    佢:「可唔可以寫張嘢證明我嗰日唔舒服全日都喺屋企抖呀?」
    我:「唔可以,醫生唔可以寫返之前嘅。」
    佢:「你聽我講,你真係聽我講呀,一次咁多呀,俾我條女知我嗰日唔喺屋企死硬㗎真係。」
    你既然知會死硬,咁你又返大陸嘅?
    我:「先生真係唔好意思,醫生係唔會寫㗎!」
    佢:「不如你嗌醫生聽我講呀!」
    我:「我可以同你登記入去見醫生嘅,你俾身份證我呀,寫低埋電話地址俾我!」
    佢:「你要我電話做咩?想報串俾我條女知呀?」
    我:「我係要你電話號碼登記,唔係要你女朋友電話號碼」

    佢靜一靜好似一副思考樣,邊講邊退後:「我知啦,你想借啲意要我資料報串!我冇嚟過!我冇嚟過!」
    佢離開咗診所。
    先生,你都係唔好再自己呃自己啦~

    想醫生寫 過時 病假紙
    圖片:電視截圖

    延伸閱讀:北歐風的診所|珍寶豬

    延伸閱讀:鍾意聞臭腳嘅先生|珍寶豬