診所職場事 寶豬趣聞 北歐風的 診所 珍寶豬

【診所職場事|寶豬趣聞】北歐風的診所|珍寶豬

職場

廣告

有日一位小姐同一位先生一齊嚟到診所。

小姐企喺診所門口頂住隻門,望望診所環境就講:「呢間好似幾ok呀,好北歐呀,就呢間啦!」

撰文:珍寶豬funnyclinic)|圖片:電視截圖

鍾意北歐風診所的小姐

佢哋行埋嚟登記處,小姐問我:「係咪即刻有得睇呀?」
我:「而家登記等兩個,麻煩你俾身份證我登記呀!」
佢拎出身份證,我指指旁邊嘅紙同筆:「你寫低電話地址俾我呀!」
佢望望筆筒:「連插筆嘅都好北歐喎!」
唔好意思,其實咩係北歐呀?
佢一路寫地址一路同先生講:「呢啲咪好囉,入到嚟起碼覺得舒服先呀,啱我style嘛!」
先生:「有咩分別啫!」
小姐停止寫嘢,瞪大對眼望住先生:「有咩分別你望到㗎嘛!」

先生望住收費告示:「貴啲囉!」
小姐:「你食佢個北歐風都要啦!」
你哋喺度嘈啲咩呢?係咪要食風呀?一係我開大少少冷氣啦~
先生冇出聲,小姐繼續寫嘢。
登記好後,我:「小姐登記好㗎啦,你坐低等嗌名呀!」
小姐同先生講:「喂,到你呀!」
先生:「我唔喺度睇呀,我一陣去返頭先嗰間睇。」
小姐:「頭先嗰間?好冇taste啫!」
先生:「我睇醫生㗎要咩taste呀?我睇開㗎!」
小姐發晦氣:「唉,我唔理你呀,你要去就而家去啦!」
先生同樣發晦氣:「好呀」,之後先生離開咗診所。
小姐望住先生離開嘅身影,同我講:「都唔明點解啲男人咁冇taste。」

我:「可能佢睇開嘅呢,多數睇開就好少轉醫生㗎啦,你坐低等等呀!」
小姐:「好呀!我去坐吓你哋嘅北歐風呀!張櫈幾靚,肯定唔平啦!」
醫生,我可唔可以話俾佢知你套櫈喺大陸嘢…

鍾意 北歐風 診所
圖片:電視截圖