《破•地獄》導演陳茂賢 「低谷」中攀高峰 曾狂減140磅求突破 斷食35日只喝兩飲料
陳茂賢最初立志入馬圈，豈料上天給他的安排驚喜不斷。電影《破•地獄》累積票房逾1.6億港元，破了的不止地獄，還有「香港最高入場人次港產片」紀錄。該片為他帶來《第61屆亞太影展》最佳導演，以及《第43屆香港電影金像獎》的最佳編劇獎榮耀。當日他「轉戰」電影工作，純屬現實的考量。
「細個時我舅公教識我睇賽馬，佢見我有興趣，就帶我去沙田馬場睇晨操，去得多就同馬圈人混熟，做埋part-time。以前科技未咁發達，需要人手打錶去紀錄馬匹操練時間，畀data報章用。作為學生，16、17歲一個月賺8,000、9,000元好犀利㗎，但我目標係做馬評人，唔係打錶。」於是，他決定一試無妨，主動電郵馬評人兼電台主持馬恩賜，就這樣十幾歲正式入行。
「我係獨子，爸爸行船，媽媽好後生身體已經唔好，我幫到屋企手就盡量幫。我18、19歲開始喺王晶旗下嘅馬經打工，做咗一、兩年，跟住馬恩賜先生去香港電台講馬，賺錢都OK，但斷估唔到港台有一日會無馬講，當時覺得無可能發生㗎，呢一行好唔穩陣喎；再加上我父母、親戚、同學都覺得呢行好冷門，佢哋永遠聯想到賭錢，而賭錢通常都係輸錢、欠債呀咁，唔係偷又唔係搶，但形象唔太好，直到一日劉天賜老師同王晶導演問我有無諗過做編劇？佢哋話我有潛質。」
陳茂賢自覺讀書不多，被讚有編劇潛質，實在開心了幾晚，但到了第一天返編劇工時，一推門便發現內有十個他這樣的人，「即係我唔係好有天份、唔係骨骼精奇啦。當日我哋嗰十個學徒，而家得番我重喺呢一行。」
升職靠符碌？
他20歲出頭已是大卡士劇集《情陷夜中環》的編劇，「我覺得叻嘅，因為聽好多出名嘅編劇、編審講，以前喺電視台嘅訓練好高壓、好密集，而我能夠做到編審，全因為『符碌』嘅啫！嗰時有好多內地、香港合拍劇。晶哥（王晶）好叻，佢係嗰啲自己扒緊一碟飯，攞緊隔籬嗰碟飯，重望緊對面嗰碟飯嘅人。《情陷夜中環》開咗工，佢突然有第二部合拍劇，因為女主角係馮寶寶，好似緊要啲喎，佢要親自去招呼，同時間亦叫走晒所有編劇。有一日佢同我講：『你嘅目標係做編審吖嘛，機會嚟啦，我而家就升你，你係《情陷夜中環》嘅編審喇！』嗰年我23歲。」
兩年後，25歲的他接到王晶指令，要寫年輕人電影《甜心粉絲王》，「我話電影我唔識寫，佢哋嘅理論，係全部都來自戲劇，你識得搞一個劇，自自然就識得搞電影；加上晶哥話會教我，結果佢梗係無教過啦！回頭睇，佢唔係成功嘅作品，但我學識咗編劇需要同導演溝通，因為電影係導演嘅世界，我唔可以盲目寫自己嘅嘢。」
能醫•自醫
陳茂賢是註冊催眠治療師及發證導師，在密集的電影、劇集工作下，他何來時間和心神去取得認可資格？
「2009年我離開晶哥公司去北京，因為我想搵多啲錢。媽媽2003年中咗風，爸爸年紀好大都迫住再去行船，嗰段時間屋企環境好差，咁啱有人話不如上北京跑劇組，跑劇組劇接劇可以搵多啲快錢。我喺北京衝鋒陷陣咗兩年，雖然係影視製作最蓬勃時期，但我哋無名氣、無人識，對於一個咁大嘅市場嚟講，都唔當我哋係啲乜嘢編劇，總之乜都被剝削啦！」
他生了回港發展的念頭，開始想做導演。剛好他看到一本有關催眠的書，因而構思到一個關於神經語言程式學（Neuro-Linguistic Programming, NLP）的故事。
「NLP來自傳統催眠，我覺得唔好神化催眠，不如由最傳統嘅催眠學起。我由香港開始，跟住到台灣、馬來西亞跟唔同老師學習，最初係為咗方便我寫劇本，好想自己做導演，但寫下又學下，我覺得催眠好有趣，可以了解自己，又幫到人治療情緒、安頓身心靈，一學就三年，去到最後，考埋一個教授催眠治療嘅發證導師執照。」
為何他不認真考慮把治療師作為職業？「人年紀愈大，愈怕同人溝通，同理心無咁強。我覺得我可以教人，但幫人做情緒治療要花好大心力，我唔適合去肩負這個重任。」
能治療別人的情緒、能細膩地寫出角色的情緒、能帶動觀眾的情緒，他和「情緒」之間誰是主子，誰被支配？「我有唔少內在情緒，喺一個社交群體，太輕易去表達自己嘅情緒，影響到大家都唔好。我唔壇於表達，好多嘢我可以自己匿埋去處理，加上我有好長久嘅訓練，我亦都係一個佛教徒，我覺得要多『自觀』，多了解自己。」
自小由婆婆照顧的他，在婆婆離開後，長時間未能把情緒處理好，「嗰個係我人生比較差嘅時候，我有去內觀過自己嘅情緒，佢包含咗對死亡嘅睇法、對人與人關係嘅睇法，亦有好多自我懷疑。望住婆婆離開，一個生命嘅脆弱。一個人唯一存在喺呢個世界嘅憑證，就係你嘅身體，當身體回歸大自然，就要靠記得你嘅人去證明你曾經存在，但當最後一個記得你嘅人都離開，你等於無存在過。我嘅職業已經比人哋好，可以用電影、文字去留低痕跡，但慢慢我又會覺得唔算係名留青史，亦唔係一啲好大嘅痕跡啫，咁其實我喺度有乜意義？婆婆離開；加上嗰一、兩年好多親戚突然走咗，令我對生命好懷疑。」
破•低谷地獄
2021年陳茂賢成為導演，他的第一部執導加編劇作品是《不日成婚》，當時遇上全地球最差的時候，電影又開始式微。拍喜劇出身的他入行多年，高高低低無疑經歷不少，「我覺得我未高過，長期都處於低谷。拍完《破•地獄》之後，好多人會覺得我好犀利，點點點，但對我嚟講都係一個低谷。或者好啲啲，可能以前喺地下，現在終於都上一級喇，無咁差喇。」
他愛他的工作，但他未必愛自己。陳茂賢為何不善待陳茂賢？
「原因我好了解，其實嚟自原生家庭。我唔係成長自富裕家庭，讀書又唔係叻，咁嘅環境下我成日覺得自己唔叻，變到特別自卑。我哋父母都係咁講：你唔叻，唔好囂張，一定要蝕底，要多學嘢。爸爸行船成日喺外國；媽媽唔係讀好多書，但佢清楚長時間要管教一個男仔唔容易，佢嗰輩嘅管教方式係言語打擊，如果套用喺而家，可以告得㗎、拉得佢去坐監㗎！呢啲對我嘅成長、對我嘅自信心有一定影響，但我亦感恩能夠咁樣成長，永遠keep住無自信心、對自己懷疑，做出嚟嘅嘢會無咁多盲點。」
極端•減肥
這個狀態，為陳茂賢帶來改變自己的渴求，他選擇了地獄式減肥。
「我係一個無中間，一係零、一係一百，一做就做到盡嘅人。減肥係方法加恆心，係我能夠控制嘅事。當時我減咗百幾磅，我斷食、做運動、戒口，曾經斷食35日，只係飲水及喝蔬果汁，後來我覺得呢個方法太極端，於是認認真真去搵營養師。個營養師睇完之後話：『你都重行到入嚟都好叻喎！』可能減得太多，身體有啲發炎，肚臍位置不斷潰爛同流血，所以食咗好多類固醇；加上屋企有好多人走咗，情緒唔好，人就開始翻脹。」
現時約220磅的陳茂賢，《不日成婚》首天開工時，體重只有165磅，身邊人都覺得他身體有事，「所有人都問我係咪有癌症，我最肥嘅時候差不多300磅；巔峰時期我減過140磅。」
平淡•開心
信佛令陳茂賢領悟到無常：「宗教，好多人喺一啲特別原因之下，遇上你嘅信仰，所以你先會相信你嘅信仰，而我就喺北京時遇到，我見到路邊攤檔賣書嘅婆婆，佢啲書唔係逐本賣，而是斷斤秤，睇佢個款今晚都賣唔晒，我見咁平，幫佢買咗等佢收工啦！咁啱有本書叫《如何修正佛法》，南懷瑾老師寫嘅，佢引起我對佛法嘅好奇心，因為咁，我開始信佛，亦喺香港成立咗一個佛教中心。」
信佛有否讓陳茂賢頓悟何謂開心、快樂呢？他的答案不新奇：「好複雜，唔可以三言兩語去解釋。有啲人有飽飯食、唔憂柴唔憂米就叫快樂，但當你唔憂柴唔憂米，你都會有其他煩惱。我係唔需要驚喜嘅，對於我嚟講平靜、唔好有太多未知嘅事發生、大家健健康康平平穩穩，就係快樂。」
