凍鏈茶專欄｜阿爺救市一彈又散 美國揪後脚拖冧生化股

2024年1月開唔到靚局，恒指失守15,000點，上星期更最多跌514.5點，得返14,794點。月初，一度連跌7個交易日，追平1998年金融風暴下嘅7連挫開局紀錄。呢一年以來，亞洲整體股票其實一直向好，除咗港股，淨係跑贏咗黎巴嫩嘅股市。港股陷崩盤邊緣，中央就出手救市，人行宣布2月5日下調存款準備金率0.5%，變相多咗0.5%現金可以喺市場流動，但一月份累跌超過2000點嘅恒指喺消息出咗之後都只係升得500幾點，似乎大家都對消息可唔可以刺激到港股都仲有好大保留。

屋漏偏逢連夜雨，美國眾議員兼美中戰略競爭特別委員會主席Mike Gallagher提出《生物安全法案》草案，建議限制中國生物製藥公司進入美國市場，所以上星期五生物醫藥股份齊挫。其中有平均五成收入來自美國市場嘅藥明系股價齊瀉，藥明生物（2269.HK）仲因為三度觸發市場調節機制而進入冷靜期，最多曾經跌咗27.8%，見3年低位。同系嘅藥明康德（2359.HK）午後亦急跌並同樣觸發市調機制，跌16.4%。而舊年11月先上市嘅藥明合聯（2268.HK）收市亦挫20%，正所謂冚包散，觸發藥明系3隻股份股價急挫最多達20%，3股份在港市值蒸發約357億元。藥明合聯係近期少有炒得起嘅新股，但唔夠三個月，韭菜已被割得乾乾淨淨，叫大家之後仲點敢買新股呢。