港元轉強 港股嚟緊應該有少少睇頭︳凍鏈茶專欄
廣告
五一黃金週，鑒於日本、泰國、仲有幾個東南亞國家地震嘅陰霾下，香港突然變得人頭湧湧，好耐未試過咁墟冚，小紅書仲湧現多篇「香港勸退」帖文，有人形容「天星小輪快沉了」，太平山山頂纜車站排隊最少兩個鐘、迪士尼樂園連遊樂設施都要輪候50分鐘。
今次唔止旺丁﹐仲旺埋財。呢幾年，喺美國一直加息嘅情況下，本港銀行體系結餘呢幾年都多唔過500億，但由於港元拆息回升、市場對美國聯儲局減息存有憧憬，加上新股市場轉趨活躍令港元有需求，港匯近期處於強勢，上週六升穿7.75，觸發強方兌換保證，金管局從市場上承接等同於逾465億港元嘅美元沽盤，係自2020年底以來首次，銀行體系結餘將增至913億元。
今次資金湧入，以過去經驗講，港股嚟緊應該有少少睇頭。不過究竟係咪可以長期「水浸」？就要了解下點解五月會多咗錢，除咗以上因素，一般嚟講，本港嘅大型上市機構通常安排喺今年5月、6月派發股息，增加港元需求。所以究竟港元強勢，係曇花一現定係後勁有力，都仲需要時間觀察。不過，投資者嘅傳統智慧係sell in May and go away，係唔係應該「寧可信其有、不可信其無」呢？
免責聲明：本專頁刊載的所有投資分析技巧，只可作參考用途。市場瞬息萬變，讀者在作出投資決定前理應審慎，並主動掌握市場最新狀況。若不幸招致任何損失，概與本刊及相關作者無關。而本集團旗下網站或社交平台的網誌內容及觀點，僅屬筆者個人意見，與新傳媒立場無關。本集團旗下網站對因上述人士張貼之資訊內容所帶來之損失或損害概不負責。
