市場現水退潮 股市放暑假抖抖︳凍鏈茶專欄
廣告
恒指年初由18,000點衝上24,000點失敗後，到五月儲夠力又再衝過，五月初起資金流入本港，令銀行體系結餘由400多億港元一直升至1600億元港元水平，一度令一個月銀行同業拆息（Hibor)跌至0.5厘水平，港股亦連升三個月。由於港元定息得返一厘都無，連買餸錢都賺唔到，聽多咗「羊太」入市嘅消息，散戶入市都係股市見頂先兆。不過，最關鍵問題係目前港美隔夜息差逾4厘，套息交易誘因大，最近熱錢又流出香港，金管局又調轉頭沽美元接港元，港股自然首當其衝。
新股已率先有「乾塘」跡象
近日一眾新股已率先有「乾塘」跡象，好似安井食品（2648.HK）同三花智控（2050.HK）呢類新股，雖則業務唔係咩新嘢，但始終AH 股折讓大，諗住點都有少少肉食，點知都先後跌超招股價。另外，等咗幾年終於正式上市嘅富衛集團（1828.HK）真係唔好彩，星期五暗盤價都守唔住招股價$38.8。聽聞上市前，有富衛保險高層同員工講買得過，所以唔少員工都入咗手。加上富衛做零售生意，比錢客賺當係marketing ，但似乎今鋪budget唔夠加上水漸退，想托都托唔住。
大鱷或高位抽水
通常個市升到咁上下，班大鱷就會高位抽水。揸住友邦 （1299.HK）嘅科威特投資局，近日大手出貨套現$268億。另一邊廂，阿里巴巴（9988.HK）亦宣布抽水，計劃發行阿里健康（0241.HK)零息可換股債券，涉及本金總額約120億港元，而債券將於2032年7月9日到期，到時可交換現金、亦可選擇阿里健康股份、甚至係一半一半，現金加阿里健康股份嘅組合。不過，塘底魚仲敢唔敢入去接貨呀？似乎大市都要放暑期，抖一抖了。
免責聲明：本專頁刊載的所有投資分析技巧，只可作參考用途。市場瞬息萬變，讀者在作出投資決定前理應審慎，並主動掌握市場最新狀況。若不幸招致任何損失，概與本刊及相關作者無關。而本集團旗下網站或社交平台的網誌內容及觀點，僅屬筆者個人意見，與新傳媒立場無關。本集團旗下網站對因上述人士張貼之資訊內容所帶來之損失或損害概不負責。
