眼見寧德時代炒得起 定期反而無肉食 一個二個起動買新股︳凍鏈茶專欄

好似上星期上市嘅寧德時代(3750.HK)，大家以為AH 股上市前溢價只有幾個％，一定炒唔起，點知好多人都跌眼鏡，首日上市收市升近兩成，每手賬面賺HK$4,320，已經好賺過定期唔少。有「藥中茅台」之稱嘅內地創新型藥廠恒瑞醫藥 （1276.HK)上市前溢價一樣只有7％，但首日暗盤收市升3成，以每手200股計，一手帳面賺2,960元。仲有一隻MIRXES-B(2629.HK)，集資只有10億左右，申請人數只有兩萬幾人，反應甚差、又無群星拱照，都一樣有得升。而且唔少證券行推出免息免手續費，賺錢成本甚低，連中三元嘅打工仔，相信都幾乎少少地賺返晒一年嘅定存收入。

寧德時代曾經俾David Webb 警告股權太過集中，不過無人理。事實上，投行呢鋪都餓咗好耐，佢地都一樣要靠新股開飯。寧德時代難得創下港股近四年最大 IPO 紀錄，共有23 家基石投資人參與認購，包括中東主權基金科威特投資局、中石化 (香港) 、同埋高瓴資本等。

如果Hibor一直保持低位，證明熱錢仲喺香港，未來一段時間，新股都仲有炒賣空間(當然要轉身夠快）。Labubu概念股中國IP玩具公司樂自天成，持有近年勢爆嘅公仔chiikawa IP，大家都要昅住，唔好走漏眼。