【經一專欄】月儲$1萬 揸$50萬現金 想2年內置業 分注投資兩類股｜龔成信箱
撰文：龔成｜圖片：新傳媒資料庫、unsplash、中新社
1.置業
老師你好，我收入2萬多，月儲1萬，現有50萬現金，應該點樣投資比較好，因為我想2年後有100萬現金買樓置業。
龔成老師：
如果你打算2年置業，咁投資就不能太過進取，因為投資要長期先有作用，中短期的投資市場可以較為波動。所以，你最好以「平穩增值類」+「收息股」為投資的核心。
現時大市處合理水平，你可以將$25萬，分注投資這兩類股，餘下$25萬就不要動用，除非出現好大型的跌市。
至於每月儲$1萬，這可以做月供股票，你供$6000都得，這部分可集中在平穩增值股，如不懂選股就盈富（2800）。你以上述模式進行，2年都可累積到一定的財富，然後到時再睇樓市，決定是否入市。
（對照龔成信箱：Q8247）
2.粵海（0270）
龔老師，請問買270收息又點睇？
買得過嗎？
龔成老師：
粵海（0270）係一間綜合企業，當中包含不少公共事業的部分，水務供應部分為最大，而其中大部分為供應香港。粵海亦有其他業務，如物業持有及投資、酒店持有及營運、酒店管理及百貨營運、基建及能源項目投資等。
佢有一定質素的企業，擁有穩定的業務，水務部分是其主要的盈利來源，這個水務系統就像一條會生錢的水喉一樣。雖然此股內裡的資產優質，但增長不會太快，只能平穩。
你投資長期收息都可以，不過佢股息率只有3%多，唔算太高。但就有股價增長的潛力。
（對照龔成信箱：Q8242）
3.貿易戰
請問老師在貿易戰、股市差的情況下，資金應如何避險？
龔成老師：
所有事情都有危有機的。
近期股市不穩，投資股市看似風險好大，這只是集中在中短期的股價。如果我地以長線分析，以買股票就是買企業的角度分析，情況就不一樣。
以長期計，股市不利因素，貿易戰不利因素，能為我地提供一個平宜價入市機會，雖然買入後可能再跌，但長期睇是平宜的。
所以，現時已可留意一些本身優質的股票，分注買入，長線投資。
（對照龔成信箱：Q8243）
4.盈富（2800）
老師，我女兒2歲，有現金2萬，如果月供，除了買盈富，其他可以怎樣分配買那些股票？
龔成老師：
盈富（2800）是最好的選擇。至於其他，可以考慮一些優質，平穩增值類的股，金沙（1928）、港鐵（0066）、領展（0823）、長建（1038）都是適合的，你只要用分注式月供，慢慢累積就得。
當然，盈富一定是佔比最大的部分。就算你唔識選股，集中在盈富，都無問題的。最緊要是不理中短期股價，長期累積就得。
（對照龔成信箱：Q8244）
5.中生製（1177）
老師384，939，現價入長渣
另外1177現價可以？
龔成老師：
中國燃氣（384）、建行（0939）都是有質素的股票，可以投資，現價分注買入就得。但要留意，近期股價波動。
至於中生製（1177），這股有潛力的，但之前估值較貴，現時已處合理水平，你分注買入就得，但這類潛力股，不能太大注。
（對照龔成信箱：Q8245）
6.平穩增值股
我仲係讀緊書的學生，返兼職儲左份錢，想試下玩投資，想問下有d咩適合我？
龔成老師：
比較好的做法，是月供股票，即是每月投資相同的金額在某指定股票，這可以令你的買入價平均，有效減少你面對的風險。
以你的年齡，投資平穩增值股+潛力股是適合的。但由於你是新手，你投資平穩增值股先。你可以考慮月供盈富（2800）、銀娛（0027）、恆基（0012）、中銀（2388）、港鐵（0066）。
如果你唔想月供，就可以用一手手的方法去投資，但就要有少少技巧，又或以分注模式去投資都得。
（對照龔成信箱：Q8246）
7.月供股票
我本人23歲，供盈富、港鐵、領展、金沙、比亞迪，全部都是一千蚊，甘我會唔會分得太散？
我月儲1萬，月供5千，另5千儲現金。
同埋，如果我申請居屋，政府係唔係唔會主動查，我有冇股票？
龔成老師：
上述所選的都是有質素的股票，都可以長期月供，$1000係偏少，但你後生，只要時間夠長，同埋之後加人工加大投入，咁樣就得，所以都可以進行。
你以「一邊月供，一邊儲現金」的模式進行，是最好的。
政府所用的，是自願申報模式，你要誠實講出資產情況。政府一般會用抽樣調查的方法，所以睇你好唔好彩。
（對照龔成信箱：Q8248）
8.物業加按
阿sir, 我最近睇緊你本《財務自由行》。
見到有種增加財務自由既方法，係用借貸去買其他資產，並用還貸款利率週資產既回報率既差價，從中得到有利既回報，而又睇到你推薦以最低既本金，而做最大既按揭去買樓，從而得到物業價值既升價同租金回報既利益最大化
咁我想問一問一個方法，如果我有物業，並如果我將佢加按得到一批本金，而用該本金去投資新既資產，咁會唔會比就咁用物業收租更得到更大既回報？
因為我做加按得到既金錢會貶值，相對係還款既時候我依家做加按既現金購買力會多左，而用租金去做加按既還款，咁其實如果我新買既資產既收益係大過物業既租金收益，咁做係咪可以得到更大既利益？
龔成老師：
利用物業加按，但更多資金，再作投資，這是一個創富的方法，但這刻要小心運用。
因為加按的原理是增加借貸，這是要利息的，如果投資的回報率大過利率，這當然值得做。
但加息週期正式開始，之前好多人用這個方法，現時的威力減弱，因為成本上升。所以，你要見到一些好明顯的投資機會，確保你加按投資後，回報率足夠對消利息，這才值得做的。
而這刻的情況，這樣做的值博率只屬中等。
（對照龔成信箱：Q8249）
9.高收益債券
龔老師，請問現在呢個經濟環境，適不適合投資「安X收益及增長基金」
它有三分一是可換股債券，三分一是收息股票，三分一是高收益債券？
有甚麼要留意？風險？價格？
可否長期投資呢？
龔成老師：
的確不太適合。
在加息週期，債券的價格會下跌，好少人會在這時候投資債券的。至於收息股，只要有質素，股息有長期上升的能力，就算加息週期也不算好大影響。
至於高收益債券，其實是低評級的「垃圾債券」，這類債券有機會收唔翻錢，同時在加息週期價格會受壓，投資價值不高。
因此，這類基金，在這刻的投資環境，未必適合投資。
（對照龔成信箱：Q8250）
10.優質股
做左老師課堂都有一段時間都冇認真向老師你請教財務策劃ge事
我開始明白老師你成日第一堂同我地講做任何ge投資行動
一定係以目標行頭最起碼未來5年10年你target想儲幾多$有幾多資產
我覺得即使自己有投資股票都有點不著邊際好虛無飄渺咁
唔知個終點係邊到
又冇咩好強烈ge諗法
所以想問問老師你ge意見
我依家ge財政狀況係咁
25歲月入21K每月可儲10K現金流（已排除MPF、儲蓄保）
股票的話手頭上現有：
52 (500)
1928 (400)
285 (1500)
1038 (500)
576 (2,000)
66 (500)
現打算如老師所建議接下來把每月所得的收入keep住現金比率的10% (趁自己後生而且都唔大洗)
剩底ge 90% (有10K就抽9K)想月供或做股票投資
再按老師所授ge水桶理論將80%放係潛力股20%放係優質股
接下來有2個問題想問老師
1.比自己5年時間撇除升職加人工等因素最低限度每月儲到10K 5年後就600K
呢5年期間我想藉著股票投資碌大至120萬你覺得這個目標可以接受嗎？
2. 呢個經濟時期我到底選擇將現金流ge一部分放於月供（80%落1211；20%落1928） 另一部分儲起佢待底撈抑或係咩都唔好做靜待時機一炮過買平貨？
若老師建議前者的話月供：儲蓄（備用）ge比例應為多少？
龔成老師：
有明確目標十分重要，所以你都要定目標，有計劃，規律地去進行。而你上述定的月供等方法，基本上已無問題，已可進行。但潛力股部分太多，你要明白當中的風險。
1）這個目標可以呀，我唔覺得好誇張，你只要不斷選股，把握投資機會就得。雖然近期股市波動，但這只是中短期，長期來說，所有野都有危有機，睇下你點把握。
2）你可以將可儲蓄的一部分，一半用作月供，一半儲現金。比亞迪（1211）及金沙（1928）都可以月供的，但太集中在比亞迪，始終會有風險，我建議減翻D。
其實我覺得你的方向已正確，之後就是具體去做，同埋堅持。我相信你可以完成目標的！
（對照龔成信箱：Q8251）
