買樓給子女 才是好爸爸?

朋友A: 「結咗婚兩年啦喎,幾時生番個?」
朋友B: 「諗吓先啦,可能唔生啦!」

筆者: 「吓?!你哋唔係話鍾意小朋友架咩?」
朋友B: 「以前就係嘅,宜家唔係咁鍾意啦。」
朋友A: 「受咗咩刺激呀?咁大轉變嘅?」
朋友B: 「宜家做老豆好辛苦架。」
筆者: 「咩年代做老豆都辛苦架啦,值得嘅!」
朋友A: 「你就梗係口响啦,咁多樓收租,生多幾個都冇所謂。」
筆者: 「唔一定要洗好多錢嘅,唔讀咩國際學校咪得囉。」
朋友B: 「讀書事小,宜家做老豆,要買埋樓俾仔女架。」
朋友A: 「咁又係喎,你自己都仲租緊樓,點買?」

 

筆者: 「自己大個識賺錢啦,唔一定要你買嘅。」

朋友B: 「你講呀!個個同學都有,你冇,咪好唔開心。」
朋友A: 「咁又係喎,宜家好似…買樓俾仔女先叫好老豆。」
朋友B: 「如果唔生,都仲可以食好啲、著好啲去吓旅行。」
朋友A: 「生咗,細要供書教學,大要買埋樓俾佢,唉~~」
朋友B: 「咪係囉,點解要作賤自己呢?」
筆者: 「唉…」

 

文:1%Anthony

 

父親、母親確實偉大,而且愈來愈偉大!
近年,愈來愈多朋友傾向婚後唔生!部份因為對香港前途冇信心,部份因為生活成本太高。正如朋友所講,自己都未能夠安居樂業,怎會有信心給下一代好的成長環境?怎有能力買樓給他們?

 

每個年代都有自己的困難,上一代經濟環境差,反而願意生兒育女!筆者父母理念是…天生天養,知足常樂,不一定要住洋樓、養蕃狗,平平凡凡、平平安安就好。

我們也從沒想過要父母買樓給自己,反而父母對子女有期望,養兒防老,老來從子。

 

是高樓價惹的禍?

不知從何時開始,好爸爸、好媽媽的定義是…買樓給子女!新盤現場記者訪問準買家,很多父母都高談闊論…買樓給子女,被塑造成慈父、慈母,難道買不起樓的,就不是好爸爸、好媽媽?
朋友仔A: 「我阿爸買咗匯璽俾我!」
朋友仔B: 「你就好啦,我阿媽買咗海之戀俾我咋!」

朋友仔A: 「你呢?你父母買咗邊度俾你?」
自己個仔: 「冇呀!佢哋話冇錢。」

朋友仔B: 「咁點呀?唔通要你自己買呀?」
朋友仔A: 「你阿爸阿媽都唔鍚你嘅。」
…可憐!是的!正如朋友所說,如果孩子身邊的同學、朋友,個個都有父母買樓,自己沒有,多不快樂!與其無法滿足社會被扭曲的價值,不如唔生!何必辛辛苦苦養大仔女,反被埋怨?

 

還是香港人太有錢了?還是政策扭曲?

高樓價不是元凶,1997的時候都是高樓價,但都沒有這個問題,最主要的原因是政策!政策!不但扭曲了樓價,更扭曲了價值觀!

 

以前的父母,即使自己賺到錢,都不一定會買樓給子女,因為自己名下可以買很多個物業,老了、快要離世了,才分身家。

現在呢?政府推出第二套房15%印花稅,全港市民立即轉動腦筋,如何可以慳稅!

 

香港人很有錢,有錢沒處花,總要買資產,自己不能買,就買給家人,有錢父母,用子女名義買樓,被讚美為慈父、慈母;有錢子女,用父母名義買樓,被讚美為孝子、孝女。

 

今天要做好爸爸,財富、資產要求更高。一份工作、一份收入…是不夠的!要有多幾個收入來源!

 

很多朋友都奇怪,為甚麼香港人那麼有錢,樓價那麼貴,仍然打晒蛇餅搶購新樓,破晒頂去搶二手樓。一個家庭要花的錢不少,那裡來那麼多收入呢?

 

秘密是…絕大部份的千萬富翁,其實都有好幾個收入來源,工作的收入,只是其中之一,還有投資的斬獲、副業賺的錢、物業及資產帶來的現金流等,要做富一代,做好爸爸,就要學會開拓收入來源啊,不然怎麼買樓給子女呢?

 

如果筆者當了爸爸,不會直接買樓給子女。
從沒付出過,就不會珍惜,寵壞了!
筆者或會借他們首期,要他們自己供、自己投資,能走多遠,就要靠他們自己的本事。唸書嘛…筆者不甚麼名校、國際學校,但是理財嘛…一定要從小就學。在今天的定義下,可能不是好爸爸呢!
各位爸爸,努力啊!

作者為1%投資培訓中心課程總監,教授物業投資、上車及裝修等課程。暢銷書《上車又住又賺》及《樓轉命運》作者,網誌《第一桶金》總瀏覽逾300萬人次,並曾擔任TVB《有樓萬事足》顧問。

Fan Page《第一桶金》: www.facebook.com/anthony.wealth