巴拿馬兩碼頭被「收回」 誠哥塞翁失馬? ︳凍鏈茶專欄

一年前嘅港口大計

此情此景不禁令人回望長和一年前嘅「港口大計」。當時長和雄心壯志，擬將旗下龐大海外港口資產全數售予全球資管巨頭貝萊德（BlackRock），套現逾190億美元（約1,480億港元），金額甚至高於當時長和的市值！然而此舉觸動阿爺神經，於監管壓力下，長和以至李家都被口誅筆伐，最後被迫引入「國家隊」中遠集團參與交易。豈料雙方角力僵持，中遠堅持要做「話事人」，交易就此卡住，至今未見突破。弔詭嘅係，市場對巴拿馬一事反應相對冷靜。相較去年傳出交易受阻時，長和股價曾急瀉至$37嘅慘況，今次消息公佈當日，股價雖然一度跌5.7%，低見$62.55，上周五收市最終跌幅收窄至4.6%，收報$63.25，較去年$37低位仍高出七成。呢份「淡定」背後，或許因為「誠哥」深諳商海變幻，早已為公司鋪下多重後路。

長和應變棋局已經悄然展開：

1.  電訊分拆突圍：積極籌備分拆旗下電訊業務獨立上市，更同時探索出售部分歐洲電訊資產嘅可能，雙線並行，意在搞活資金、釋放價值。
2.  屈臣氏上市加速：零售旗艦屈臣氏集團分拆計劃快馬加鞭，目標估值高達300億美元（約2,340億港元），力爭登陸倫敦與香港雙市場掛牌。
3.  港口「散賣」求生：縱然巴拿馬兩個碼頭就此被接管，整體出售大計受阻，但長和仍然握有分散全球嘅其他港口資產。「散賣」其餘港口，成為套現另一方案。

塞翁失馬，焉知非福

塞翁失馬，焉知非福。巴拿馬裁決，表面是長和挫折，但係能夠見到誠哥老練嘅風險分散同彈性策略。雖然道門俾人閂咗，但已經開定幾隻窗。最重要係身處中美角力下，唔使再因為巴拿馬兩個碼頭而陷於「兩面不是人」嘅爛局。