起薪點逾15,000的Fresh Grad職位

社會熱話

廣告

一年容易又Grad Din,又到畢業生化身社會奴隸獸的季節。不過今年人人都話市道差,分分鐘鐘低層奴隸獸都冇得你做!

《經濟學人》旗下研究部經濟學人智庫,就全球25個經濟體系的教育開支、失業率等研究,得出一個令人絕望的真相。預計本港青年失業率由2015年的9.2%,上升到2030年的11.9%。主要原因是本港教育開支下跌,加上畢業生增多,競爭加劇。

但不要去絕望,其實又未有外國勢力講到咁差。根據本港大學的聯校就業資料庫(JIJIS)數據顯示,今年首季的畢業生職位空缺為13,900份,較去年同期升30%,平均薪酬都有14,462元。

不過人力資顧問蘇偉忠指,大學生普遍起薪點為10,000 至13,000元,其中工程界要很多新血加入,人工會較高。

有見及此,小編努力為一眾畢業生努力搵潛力工,務求照亮一眾廢青的心靈。以下綜合了人力資顧問蘇偉忠、網上資料同數據得出不同行業嘅起薪點。

公務員 – 傳說中的鐵飯碗

紀律部隊起薪點:21,410元

由細到大,媽媽都話公務員係一份又穩定又高收入的工,咁到底有幾好搵先?普通公務員有50個薪點,0點代表月入10,885元;49點代表月入117,080元。

如果大學畢業生考政府行政主任(EO),起薪點約15點左右,即26,785元;如果入職衛生署、機電工程署等專業人才,起薪點可達23點,即39,360元。

不過咁,公務員的確競爭大。如果閣下想盡快搵工,可以考慮加入偉大的紀律部隊,每月有$21,410元。你知喇,下下都要成千人保護一個人,要好多人力?!

建造業 – 職安真漢子

月薪:20,000元以上

理工大學早前公布2015年畢業生就業調查顯示,建築工程及管理學、土木工程、電機工程畢業生的月薪亦逾20,000元。職安真漢子除有身材,人工都絕不可以睇小,閒閒地都過千日薪,開二十日工,一個月就有20,000人工。

2015/16年度建造業部份工種日薪
模板-日薪2,050 元
混凝土(石屎)-日薪2,300元
扎鐵-日薪1,930元
金屬棚架(通架)-日薪1,150元
泥水-日薪1,350元
喉管-日薪1,250元
金屬工-日薪1,080元
雲石-日薪1,100元

平水及測量-日薪1,200元

法官大人,我冇補充。

IT人 – 毒也可以有市場

月薪:18,000元以上

女士一般都覺得毒男冇出色,但現實話畀你知,依家係毒男的天下。城大商學院最近訪問302家企業,近半企業願意額外支薪10%至19%予具備IT技能的員工。

城大更加有保險界人士表示,行內對IT人求才若渴,願以高薪聘用程式開發人員及項目經理,履歷亮麗的程式開發員起薪可達18,000至19,000元,跳槽可獲加薪15%至20%。未來都愈來愈多公司發展網路事業,IT工作可以話愈做愈有。一眾絲打如果身邊有毒男,記得唔好錯過。

見習行政人員 – 向管理層進發

起薪點:15,000至25,000元

如果想人工高啲,大公司或者銀行嘅見習行政人員(Management Trainee),係個不錯的選擇。蘇偉忠指出,MT薪金大概由15,000 至25,000不等,亦因為人工高,不少精英都要爭崩頭先入到。例如合和實業有限公司、PCCW、SFC 證監會都有提供培訓生嘅機會。大部份公司請培訓生都沒有特定獲聘的名額,主要聘請大學畢業嘅新鮮人或者有一兩年工作經驗的年青人。

空姐空少 – 攞正牌周圍飛

起薪點:約16,000元 (底薪連津貼)

空中服務員係唔少畢業生嘅選擇,做空少空姐底薪連津貼,起薪點約16,000元。如果想周圍飛,又唔怕jet lag,都係一個唔錯嘅選擇。入職要求就要講得一口流利英語,仲要有多一種亞洲區嘅語言,例如:日本語同韓國語,如果有流利嘅普通話,有啲航空公司仲會優先考慮。

教育 – 作育英才 春風化雨

學位教師起薪點:24,000元以上

學校老師分文憑教師(Certificated Master)及學位教師(Graduated Master),基本上都係政府職級編制上的分類。前者有文憑或證書資歷;後者就有大學學位,起薪點會高少少。不過近年學校資源不足,好多有學位的老師都只可以做文憑教師嘅職位。

護士 – 美麗的白衣天使

起薪點:25,000元以上

護士唔單止人工高,隨住人口老化問題,全港繼續鬧護士荒,公立同私立醫院都等人用,可謂另一個鐵飯碗。不過護士要經常見血,仲要照顧病人,幫病人換片,未必人人頂得住。

市場推廣 – 腦筋急轉彎

市場推廣起薪點:14,000至15,000元

市場推廣係好有挑戰性嘅工作,有行內人士話最緊要識執生,因為無論你準備得幾好,都有可能出現突發事件,破壞左原本嘅計劃。

有唔少中小企都開始做新媒體及數碼營銷,用社交媒睇增加知名度,希望可以拉近同顧客嘅關係。自問有創意嘅你,市場推廣都諗得過。但稍有不慎的話,就會變成關公事件。