開會

我曾經出席過的4大「廢會」打工仔:反抗不了就試著享受|開會文化|浪費生命

職場

廣告

香港唔少打工仔上至高層,下至中低層都總會開不完嘅會!而每次開會,大部分人充當的角色可能都係陪坐,拎住本記事簿、手提電腦入房,出到嚟都係空白一片又或者象徵式寫少少無謂嘢係上面,以免令場面尷尬。

撰文:Purple弟弟 | 圖片:unsplash

而我發覺通常廢會,主要都離不開以下幾種:

1. 虛而無實

呢個情況係指,會議內容充斥住公司未來嘅大方向!

但至於要點做,就你諗你啦,作為普通打工仔,呢啲咁遠大嘅事又關我咩事?

一年後我仲坐唔坐係到都唔知,加上你又無指定任何人做任何事。

最後咪變成你有你講,開完會後大家如常工作,沒有絲毫改變。

2. 零準備會議

叫得人開會,往往都係因為有問題要解決。

但好多時大家都未諗好點解決,甚至連一個可行方法都未有時就開會。

結果到時又係帶住問題入去,帶住更多問題出嚟!

原先個問題解決唔到,會議上仲加深大家怨氣。

3. 匯報會議

有一種老細,可能好想知道同事平日究竟做緊咩,所以會每朝,好少少就一星期一次,叫大家匯報下自己做咗啲咩!

但公司大部分人嘅職位,每日做嘅嘢都係差唔多。

會計每星期都答你計下數,客服主任答你處理客戶問題。

開會浪費生命

其實呢種會唔係唔開得,但要參與嘅最好係每日都面對緊不同挑戰嘅職位。

例如市場部今個星期搞咩活動,編輯諗住出咩文章等等。

否則唔開得咁密只會浪費大家時間!

4. 捽數大會

呢樣相信係大家最痛恨又最經常接觸到嘅會議,而會上你係唔會聽到任何一個有用嘅建議去協助你追數,只會聽到上司用唔同語句去表達同一個內容。

包括:

「你唔夠數,同我死掂佢!」

「依家追唔到數喎,你諗住點啊?」

「點解上季追到數,今季又唔得啊?」

「我唔係要聽藉口,我要嘅係到數。」

至於點解我會話捽數大會係廢會,因為到唔到數,我自己好清楚,基本上唔需要你提醒我。

而且Set個遙不可及嘅Target果個係你,而唔係我。

你都未答我點解Set個咁高嘅Target,仲好意思問我點解唔到數?會唔會太好笑?

更何況你無為我提供任何方法或協助,就算真係會提出所謂嘅「協助」,通常都唔係真係幫到手。

反而俾咗個位高層認為自己好Helpful、「做到嘢」,所以呢啲會真係少開為妙。

廢會長開長有 廢人作怪?

無用嘅會開極都有,一方面除咗係管理層以為真係有用之外,其實更多嘅原因係佢哋出現少許病態心理。

佢哋認為開會係貢獻嘅一種,係為公司做緊嘢嘅直接體現!

再簡單啲講就係冗員想盡辦法證明自己存在。

反抗不了就試著享受

而作為小薯,既然反抗不了就試著享受,雖然工作量唔會減,但開廢會都可以當係一個另類休息時間。

如果坐到一個不起眼嘅位,不妨做下自己嘢,或者帶埋部電腦入去工作。

總好過聽佢哋天南地北,人都會莫名其妙地忟忟地!