【公司抽獎禮物】給老細的信：聖誕Party抽獎請不要送六合彩飛 送呢啲朕會更開心
撰文：打工皇帝｜圖片：電視劇《半澤直樹》截圖
如果我聖誕抽到呢張六合彩飛，可能我會失落到出年佛誕。為免悲劇重演，亦避免天下打工仔驚嚇多過驚喜，朕決定寫一下打工仔喺聖誕Party抽獎最想有啲咩禮物、點搞先好，以下意見毫無代表性，亦無科學根據，僅僅從一個勞苦打工仔角度出發，敬請留意。
打工仔唔想有擾民嘅Party
首先，聖誕Party絕對應該符合與民同樂的原則出發，千萬不要擾民。大家都明，講到明Party就係想放鬆，唔想太多負擔。Party食物，如果可以都係唔好要求大家自己煮。舉辦時間最好在工作時間之內，或Party當日實行半天工作（或者無咁忙都得）。Party亦忌有表現環節，冇人想Party前一星期犧牲飯鐘、放假時間練舞。之但係，大家都想有少少少少咁多驚喜，起碼聖誕Party就算喺Canteen搞，都叫吓到會，唔好食返平時Canteen啲兩餸飯加包紙包飲品就算……
抽獎禮物原則：唔好得物無所用
而家唔係電視節目，唔需要準備1,000件花之戀畀同事，同事自己亦都有水杯同筆，唔需要送有公司Logo嘅限量版水杯同筆，亦唔需要公司吉祥物。圍內慶祝聖誕，可直接省去門面功夫，一切從實用角度出發。
現金獎／禮品卡／會籍
有時唔使太複雜，聖誕加年尾，大家使費自然大，如果抽獎禮物是現兜兜的現金獎，可謂最直接最實用。如果唔想太直接，就可以買啲受歡迎嘅禮品卡。好簡單，如果見到同事出入成日拎住某間咖啡室嘅咖啡，準備咖啡室禮品卡就好；又例如，見到同事3日唔埋兩日就有速遞到，買返張網購禮品卡就實無死。
甚或，知道某啲同事好鍾意煲劇、聽歌（唔知你點發現），都可以考慮下買Netlfix會籍呢類禮品卡。健康啲嘅，可以送1年健身會籍！
一日Annual Leave
你話如果抽獎由機會抽中一日Annual Leave，呢件事幾吸引？大家一定坐定定等到呢份禮物俾人抽晒先走。唔係大家懶惰唔想返工，只係有啲公司返足一年先可能、或者、有機會加一日AL，而家抽獎一下就即刻有多一日AL。就算唔係即刻放，留係嚟都好啊？
最後，聖誕節真放假！
最後，如果聖誕節可以真放假就好啦。
