診所職場事【寶豬趣聞】電視｜珍寶豬

撰文：珍寶豬（funnyclinic）｜圖片：電視截圖

阿姨嫌診所無電視？

佢繼續眼望四周不停探索：「身分證呀？」
我：「係呀」
佢：「要等幾耐呀？」
我：「而家登記嘅你排第六個」
佢：「會唔會好耐呀？」
我：「你預返一個鐘內就到你」
佢：「要差唔多成個鐘呀？你呢度冇電視睇喎」
睇醫生同睇電視有直接關係嗎？
我：「你係咪要睇醫生？」
佢：「等成個鐘我喺度做咩好呀？第二間都唔會電視都冇部啦…」
咁你何不去你口中所講嘅診所睇？你係咪想嚟幫我哋裝電視？我唔介意你自費呀！
我：「你可以出去行吓轉頭再返嚟嘅」
佢：「唔舒服仲邊得嚟咁多力四圍走呀？」

唔係呀，你把口好好力咁同我拗緊啲無謂嘢呀～
我：「咁你可以坐低睇吓雜誌嘅」
佢：「字都唔識多隻睇咩雜誌呀」
…你做咩啫～
我：「你仲需唔需要登記睇醫生？如果你唔需要睇醫生嘅話，我行開吓做其他嘢啦」
佢：「我睇，不過我都係話緊電視都冇部，唔好囉，第二間都有啦」
我：「咁你俾身分證我呀」
佢邊拎身分證邊問：「你咁耐都冇電視呀？」
我：「係呀，一直都冇」
佢：「你唔駛睇電視咩？」
我冇你咁熱愛睇電視，醫生亦唔係請我返嚟睇電視。
我終於拎到佢張身分證！
我：「要唔要探熱呀？」
佢：「唔探熱仲有咩好做呀，都冇電視睇」

你打算探熱探足接近一個鐘嗎？唔好意思呀，我嗰部耳探嚟，嘟一嘟可以兩三秒咋…
我：「我哋用耳探嘅，你擰歪少少個頭呀」
佢邊擰側少少個頭邊講：「裝部電視啦」
我：「你一陣同醫生反映呀，呢啲醫生話事啫」
結果，佢入到醫生房時有三分二時間都係講緊部電視…