25歲每月4K做月供股票 All in一隻股票 還是分散買四隻好｜龔成信箱
撰文：龔成 ｜圖片：unsplash
1.月供股票
你好，我今年25歲，月入17k但返左一年半全職都係月月清，基本係因為我無理財習慣同埋太大洗
先果排認識到月供股票，就想每月留3~4k月供，2k現金儲起，儲錢之餘希望可以慢慢累積到財富，早日達成財務自由。
所以有啲基本概念想問下你!
1. 盈富基金我研究完一輪，盈富係反映恒指，而恒指依家個位已經好高，點解依家供盈富會係好選擇呢? 係賭恒指3~5年內仲會繼續升?
2. 同樣問題放落0005，匯豐依家接近$80仲適合入市嗎? 如果盈富同5仔依家都keep住高位，會唔會有可能hold好耐都返唔到家鄉呢?
3. 我睇左你好多篇心得，大致係推介月供組合係潛力股+穩定收息股，如果我想月供1928金沙，1211比亞迪會唔會太冒險? 有咩更好既選擇呢?
4. 我只有3~4k 資金月供，與其用1k分別買4隻股票，係咪應該用2k買兩隻股票?
5. 請問你點睇新鴻基地產 (0016)呢? 謝謝你!
真係新手，希望你唔好見怪。謝謝你!
龔成老師：
1）股價、指數的高低，並不代表平貴，所以，你不能單以恆指處於較高水平，就認為是貴。以現時的恆指情況，大約處於合理區略高的位置，但未到貴的水平。因此，盈富（2800）仍是一個不錯的選擇。
另外，我地不是賭恆指5年的升跌，而是進行財富配置，你持有的現金不斷貶值，將現金不斷換成真資產，長線持有，這是最基本的配置策略。這是幫你建一個財富組合，長線投資。
2）匯豐（0005）的質素比以前略有減弱，但現時又處不貴的水平，已反映了當中的風險度。這股都有投資價值，但你唔好預佢增長力好勁，長遠只屬中等，以收息角度分析這股較好。
3）不同年紀會有不同的配置，如果是年輕人，則比較適合投資平穩增值股+潛力股，你以月供金沙（1928）+比亞迪（1211）的模式儲優質股，並不冒險。但你不能在整個組合中，只集中在兩股，一定要有其他股作分散，最簡單就是加入盈富。
4）你用$3000月供兩股，餘下儲現金，現金部分等大市回落時把握機會，這部分就買入其他股。
5）新地（0016）有質素的，適合長線持有。（對照龔成信箱：Q6261）
2.股票策略
龔成老師你好，有地方想向你賜教….
本人現有：
1448 1000股 $7.2購入
1848 1000股 $7.9購入
供股 1211 49股、2800 94股
剩下47萬現金，收入$30000月剩3千，本來供了兩個月1211及2800各$1500
但我改了下個月供$7000股票策略，以下就是：
66 $1000
823 $1000
2388 $1000
1211 $1000
2800 $1000
1299 $1000
1928 $1000
目的係想慢慢將47萬慢慢成為資產…不知道這樣做會否不善，另外我有沒有需要將2800每月供股加注至$1500-2000呢
又或若果我再供多兩隻 是否太負荷呢？
如果供多兩隻 會供388 1038定還是有更好的提議？因為我想建立一個比較平衡既倉 供了會長期持有 目標想交俾個仔大個擁有 兒子現在一歲
龔成老師：
你本身持有的股票，可繼續持有，長遠有增長力的。
你現時持有的$47萬，可以將部分，投資平穩增值股，例如分注買入盈富（2800），又或其他優質股就得。
而你上述所選月供的，都是優質股，都是可以月供的股票，最重要是長期進行，同時你在每月資金上，有適當的分配。
月供多少，最緊要睇你每月有幾多錢剩，例如每月收入$3萬，支出$2萬，剩下$1萬，這$1萬你可以將其中的$5000-$7000，用作月供股票，長線投資，上述的選股都可以。如果你想增值多一點，可以月供港鐵（0066）、港交所（0388）、比亞迪（1211）。
至於餘下每月的資金，就先儲現金，再慢慢等大市出現回落時買入平宜的優質股。（對照龔成信箱：Q6210）
3.白雲山（0874）
請問874和1093 前景如何？
是否適合長線持有？
龔成老師：
白雲山（0874）正面，這企業近年的生意雖然不是強勁地增長，但盈利的增長反而比營業額增長更多，這反映企業的產品組合改善，集中發展一些較高毛利的產品，長遠正面。
這股的增長力不錯，可以長線持有，但由於近年的股價已升了相當多，很多因素都已經反映，因此股價要再爆升不是易事。
石藥集團（1093）的質素更好，同時企業潛力仍在，長遠正面。但這刻的估值實在太高，如本身有貨當然可持有，但如無貨想這刻買入，就要分注，因為這刻已處略貴的水平，最多先小注，等回落才慢慢分注入，策略上會較好。（對照龔成信箱：Q6211）
4.銀娛（0027）
成哥，想問問，銀娛 金沙，那個較適合年輕人？感謝
龔成老師：
兩隻都是優質股，都可以長線投資，金沙（1928）會較為穩健，但卻較平穩，佢過往不斷建新的酒店及賭場，增長快速，但近年已減慢了這增長，因此是平穩的股息，較適合收息。
至於銀娛（0027），則較有潛力，因為佢仲不斷起緊一d新的設施，長遠來說仍然正面，前景不錯。對年輕人來說，銀娛是較好的。（對照龔成信箱：Q6212）
5.恆指市盈率
老師，我之前睇網上資料話恆指市盈率（1975-2015）四十年平均數係14.3，所以我以為低過14.3都叫平，低過一個標準差即市盈低過10.7就好平。
之前見話10倍以下先叫平。我都考慮緊月供，但又覺得等到市況平先入好似仲有著數，因為我現時都有貨係手，唔知咁樣諗岩唔岩？
龔成老師：
其實平貴沒有一個絕對的定義。過往的平均數約為14倍，可以參考這數是合理，但大市市盈率只是一個好初步的分析。
所以，無論是10.7又好，10倍又好，都無一個答案，投資唔同讀書，唔會有公式，唔會有所謂的「標準答案」，所以，唔好死版去用指標。
如果你而家有貨在手，而又夠貨的話，就唔洗心急入，你可以仔細找一些優質股，買入較為不貴的，分注入都得。我地唔會知之後個市的升跌，只能用一套平衡買入的方法，建立一個穩健的投資組合。（對照龔成信箱：Q6213）
6.醫藥股
你認為中國生物製藥有咩產品有潛力市場，能大幅增加其盈利，使其成為潛力股？
藥物關係到健康，安全，有良好的品牌很重要，而這股是國內品牌，能給人信心保證嗎？
另外，你認為騰訊700可投資嗎，合理價是多少？謝謝！
龔成老師：
中生製藥（1177）多隻產品都有不錯的毛利，特別是肝類別的藥。其實，當我地分析醫藥股時，並不希望佢太集中在某一隻藥物，因為這會帶來較大的風險，如果佢多隻藥都成功，同時以成功的藥帶來的資金，去不斷開發新藥，這模式是最穩健的。
這企業好大間，在行業有優勢，因為藥物正是你所講的要安全，國家對藥有一定的標準，而大型、有資金、有品牌的企業，自然能在這方面有優勢，所以這股正面的。
騰訊（0700）是有質素，有潛力的股票，但估值經常處於不平宜水平，因此最好以分注，又或月供的模式買入這股。（對照龔成信箱：Q6214）
7.盈富基金
你好，如本身已有股票，例如已持有盈富基金，每個月再月供盈富會唔會有問題？定係月供其他股票會較好？唔該
龔成老師：
無問題的，因為盈富（2800）本身已經是一個組合，就算你本身已持有，再供都無問題。
就算集中在盈富，你都已經有一定的分散風險作用。因此，你再月供盈富都得。（對照龔成信箱：Q6215）
8.平安好醫生（1833）
1833應該持有定沽？
thanks
龔成老師：
平安好醫生（1833）這企業雖然有質素，但其實這刻的財務數據並不理想，這刻的大部分估值，都是來是將來的概念價值。
坦白講，以現時的估值計，有少少過高，但都可以接受，如果你長遠等到的話，就可以持有，但就要耐心點，但佢企業真正有錢賺，否則，賣出這股較好，因為這股的中短期，仍然未必理想。（對照龔成信箱：Q6216）
9.保守公用股
老師，我想問啲概念上的問題，假若股市有一天爆破，跌一萬點或更多以上，對於一些保守公用股收息股或平穩增值如港鐵，的股價影響會不會也很大
龔成老師：
如果股市真的跌1萬點，一定會對所有股票都有影響，公用股都會下跌，但由於公共類別是防守性的股票，因此到時下跌的幅度，一定比其他類別少，所以能幫你守住部分財富。
但到時都要睇下跌的原因，是經濟問題，還是某些行業的問題，又或是其他的問題，不同的原因，會對不同類股票有不一樣的影響，這個真的要到時先知。
但你要明白一點，如果企業優質，就股跌1萬點，對佢都不會影響，只是中短期的股價下跌，長期又會慢慢上翻去，因此就算到時有貨，不但不用驚，更是難得的入貨機會。（對照龔成信箱：Q6217）
10.歐化（1711）
請問1711值得投資嗎？
龔成老師：
歐化（1711）質素不差的，這股本身有品牌，但增長力就不強，睇翻過往的財務數據，都不是好突出，算是不過不失，但唔好預好的表現太好，現時市值約為$4億，都算合理。（對照龔成信箱：Q6218）
