80後月儲4K 無投資頭緒 目標10年內買樓自住 應該點做｜龔成信箱
撰文：龔成 ｜圖片：新傳媒資料庫
1.投資組合
我今年31歲單身, 月入$18000, 與家人合力供樓, 我自己每月家用連供樓$7000。每月$4000會儲起; 今年5月開始$1500月供2800, 餘下用來每月支出。
股票435係$5.34時入了一手。本身有2份儲蓄保險, 一份年供$6700, 供12年, 仲有2年就供完; 一份5年, 年供約$22000,已經供左一年。現金總值約有$50000。
問: 本身儲蓄已經在和家人合力俾首期和進修用得七七八八, 現時我的目標希望係10年內可以再買層樓俾自己住, 但沒有什麼方向頭緒, 老師有沒有什麼建議?
龔成老師：
儲蓄保險是防守性產品，在理財中有當中的角色，但足夠就得，不用過多，這刻已夠，之後不用再買。
如果你計劃10年內再置業，這刻一定要加大儲蓄及投資，如果可以的話，月供盈富（2800）可加至$2500。餘下的資金先儲現金，然後這部分的資金，就要好好把握投資機會。
只要你運用得好，要在10年累積到$80萬至$100萬是合理的，如果把握到投資時機，可以去到$150萬。所以，你現時保持供盈富，而能否有更大的增值，就要睇你餘下的現金部分。
這部分一定要小心選股，同時把握到大跌市時入平貨的機會，你要在這方面好好學習，同時耐心等機會，不要急。
另外，如可以的話，想想方法增加收入，兼職又好，試下做小生意，例如網上的都好，都可以幫你提升收入，有可能令你有更大的突破。（對照龔成信箱：Q6200）
2.創業
先生，我又再睇了你說的現金-》小資產-》大資產，十分認同
龔先生你常提倡人投資優質股，潛質股，還有開班教人，其實我覺得都是你在建立的資產之一，即做生意
我很想問一件事：你怎樣看，在資產增值初期，就投資小本+大量時間去創業嗎？你其實怎看創業？
因我今年26歲月儲一萬，現有8萬，前職是細補習社小老闆，現職是連鎖補習社的職員，現在很想再次出來做自己的教育生意。
但很迷惘，不知應該專注正職，增加作為employee主動收入，還是應該分心創自己的生意，踏入small business owner。
還有，我真是很欣賞你常提倡心態/思想致富，這樣事到現在都還在正面影響我得很多：）
龔成老師：
無論你想以打工得來的收入去儲錢，還是你想創業建立資產，目的都是一樣，就是建立財富。你要比較下，兩者邊一個能為你長遠創造更多的財富。
如果你打工，加上投資，10年可滾存到$150萬-$200萬左右。
如果你創業，只要站得住陣腳，要累積到比這財富更多，並不困難。
因為你打工累積到的財富，並不是太多（雖然預期$150萬都不少），但這數並不是真的好大，在比較之下，你放棄打工的機會成本不算太多。
加上26歲，如果是我，我會博一博，因為上述所講的機會成本不算太大，同時年輕可以輸得起，加上你本身有創業經驗，這是一個突破的方法。
如果你真的想做這事，就不要又打工又創業，最好是專注創業，這當然有風險，但如果你承受得到，我會建議你全力衝！（對照龔成信箱：Q6201）
3.成交
成哥
想請教技術性問題
現價買入124.9, 沽出125
我話排沽125或以上
之後我見多次企在125
但最後沽吾到。
其實係唔係應該話, 現價沽?
還是, 現價沽也不一定沽到, 要視乎有無人排買?
龔成老師：
因為香港交易所所用的，是一個排隊機制，當你見到現價為「買入124.9, 沽出125」，即是排隊等買入的價位是124.9，而排隊等賣出的價位是125。
當你落盤125，你就在125排隊，但其實你之前有好多人排緊排的，就算你見市場不斷以125成交，其實是你之前排隊的人成交的。
所以，你可以選擇立刻賣出（124.9）就得。
其實排隊機制有啲技巧的，但我真係好難用文字同你講，因為我在股票班教同學技巧排隊，都要花10分鐘，所以有機會上堂講。（對照龔成信箱：Q6202）
4.玩財技
老師，我投資左8XXX，輸好多，我懷疑這股有問題，是一個局。
7月5我被指示，當時0.104入貨，對方話係史無前例的機會，叫我賺完請佢食飯。然後就一直跌，我意識到係佢地想搵人接貨，而我就係幫佢接貨果個，今次睇住毫股變仙，我已全數最低位離場。
想請教下龔神，有沒可能我係底跟返佢地入貨，然後執返自己啲骨頭，叫留返啲野？
龔成老師：
有另一讀者同我講這股，都是類似的事情，但我地無證據話這股有問題，只能叫自己小心。
我地買股票就是買企業，因此一定要了解企業的質素。8XXX每年生意只有約$1億，公司好細，同埋近年的生意大跌，加上已連續5年出現虧損。見唔到這股有投資價值。
同埋，佢過往幾年，曾經出現4合1，又5合1，又1送7紅股，根本就在不斷玩財技，這類股往往對小股東不利。你要心這股，同時小心叫你買的那個人。
你唔夠佢地玩的，離場是最好的方法。佢地一定計劃左好耐，一個完整的局。（對照龔成信箱：Q6203）
5.中遠海運港口（1199）
01199( 中遠海運港口) , 此隻航運股值得買入及長期持有嗎?
龔成老師：
中遠海運港口（1199）持有龐大的資產，以及有相當的規模，本質不算差。但佢過往的生意無增長，情況有點失望，盈利亦不穩定，加上股本回報率不高，好難對佢作出較高的評價。整體來說，質素中等。
而比較吸引之處，是這股現價不貴，但這亦是市場反映背後不確定性的結果。
這類股都可持有，但就未必值得太大注，航運股有週期的，但要預測不易，所以小注持有都可。（對照龔成信箱：Q6204）
6.上市
老師我想問關於近年一啲上市公司好鍾意再分拆業務上市，例如平保分拆平安醫生咁
其實我想問長遠睇對原公司影響係正面定負面?
例如將來平安醫生賺到錢 係咪會按番持股比例分番錢比平保?姐係個概念同子母公司咁?
仲有第2個問題係 上市公司唔係要賺錢先可以申請上市咩? 點解平安醫生未賺錢已經可以上市?
謝謝老師解答
龔成老師：
上市有好多目的，例如提高知名度、有助發展、集資，又或比原股東退場。
當佢分柝上市，就是將部分的股權，賣出給公眾投資者，企業因此而集得資金，有助企業擴充業務，你見一般公司都會在市旺時上市，因為可以以高於合理價上市，所以，要在新股中買到平貨，是十分困難的。
到時佢賺到錢，母公司是有份的，當然要睇持股比例，而決定入賬方法。
上市規則有幾個的，以盈利去決定上市，是其中一個方法，但不是唯一的方法。（對照龔成信箱：Q6205）
7.月供組合
龔sir你好啊！ 本人23歲，可月儲5000，打算動用3000-4000作月供股票。但本人身處澳門，中銀同工商的月供股票手續費都係按每隻計算，即是供一隻50蚊，兩隻100蚊，以此類推。
所以我只想月供一隻股票，以免手續費比例太重
請問供盈富，港鐵，騰訊定比亞迪好呢？非常感謝。
龔成老師：
每隻收手績費的確好貴，所以我都認為，集中供一隻最好。
但由於集中一隻會有集中風險，所以，最好的選擇一定是盈富（2800），因為這股長期有平穩增長能力，對你來說適合，同時這是一個50隻股票的組合，能平衡風險。
至於餘下的資金，就先儲現金，然後才慢慢買入港鐵（0066）、騰訊（0700、比亞迪（1211）這些股票，策略上會更好。（對照龔成信箱：Q6206）
8.電能實業
老師你好，本人有10手電能實業，現諗緊是否應該繼續持有，如果6仔再派多一次特別息，流動資產被陰乾到100億都不夠，股價有冇機會大插水？
隨時賺息蝕價，它的流動現金不停縮水，可能之後股價都是向下行的居多，可否幫手分析一下
龔成老師：
佢就算派特別息，你都唔會因此而損失，因為這是左手數右手數的問題。你得到股息，你有現金，佢現金減少，佢股價自然調整，這是正常過程，你唔會損失。
因此，我地分析點，不是佢特別股息與否。
這股本身有質素，但佢比長和的定位，只是一隻收息股，無乜增長力，因為佢的現金，都會以派息的模式，去左母公司長建度。而長建則是比長建定位為增長。
所以，持有邊隻，睇你要啲乜。
但就唔會因派息而無乜錢，而是企業增長力的問題。（對照龔成信箱：Q6207）
9.保利置業集團（0119）
你好，想問119保利置業，早前見到盈利於2017年大增便於4.03時買入，但4月開始慢慢向下，想問是否應該繼續持有？
龔成老師：
保利置業集團（0119）質素屬於中等，佢近年生意都無增長，發展力只屬一般。其實同業在這段時期發展得不錯，但佢就有少少追唔上。
整體來說，這股又不算差，但就唔好預佢好優質，如果你本身持貨不多，持有無問題，都有得守。（對照龔成信箱：Q6208）
10.IMAX CHINA（1970）
龔sir 你對1970Imax china 長遠有咩睇法
睇了年報 它有獨家DMR 技術 率先進攻大中華市場 管理團隊有多年經驗及睇好未來十年發展 ROE 年有15%以上 負債比率不高 是否有一定潛力呢？
但中短期會受經濟週期影響 2：電影係娛樂需求 非必須品 業績依賴人民生活水平
3：匯率（美元）
4：制片廠票房分成
不知分析是否有出錯 請指導下
龔成老師：
IMAX CHINA（1970）本質不錯的，你所講的都是這股的獨特之處，而中國的市場仍在增長中，因此長遠對這股有利，但由於不是最低的檔次，因此會較受經濟週期影響，你都講出了重點。
再睇翻佢的財務數據，近年的增長的確不錯，預期這增長仍然可持續，至於股本回報率高，雖然是利好因素，但由於佢上市年期不算長，而上市前後的股構結構不同，因此未必能完全反映企業的賺錢能力。但都是不錯的。
但要留意，佢現時市盈率近30倍，已反映了增長潛力的因素，因此並不平宜。但無可否認，這股有潛力的。（對照龔成信箱：Q6209）
