老婆份工夠養家 40幾歲文員月入4萬想辭職湊仔

日前，有網民以「俾著你會唔會走？」為題在連登討論區發文，指自己40幾歲，有家庭有仔女，「老婆人工已經夠養家，但如果要奢華少少，就要我做埋野。」

樓主：份工無聊不如全職湊仔

樓主繼續解釋，現在在世叔伯的兒子的公司做跟單物流文員，「平時都無咩辛苦，講得上係無聊，人工就4萬幾，大假得廿日，星期六日唔駛返，因為識個老闆，同事都唔會點俾野我做，搞到我好無聊，年紀上又傾唔埋，無咩social，反正個家又唔駛靠我，我有時諗不如做全職湊仔公仲好啦。」

不過，樓主亦有考慮到怕之後退休不夠錢用，加上「出去一定搵唔返4-5萬人工，因為老闆個老豆有恩於我先俾咁嘅價錢我，實際同普通文員無咩分別，可能市價20000-25000左右，點算好？」

少數網民：全職爸爸冇乜大不了

帖文一出隨即引來網民熱烈討論，但只有零星網民支持樓主辭職：

「啲細路幾大先？如果好細個又冇人湊咪做幾年全職爸爸囉，始終要有父母照顧啲細路先會健康成長，順便趁呢段時間進修吓或者發掘其他技能，而家年代唔同咗啦，做全職爸爸冇乜大不了。」

不過，大部分網民都反對樓主辭職，主要原因是認為子女其實並不想父母全職看著自己，寧願父母賺多些錢提供更好物質或升學選擇；另外一些網民就認為樓主現時的工作是筍工，在市面上難以找到相同薪酬的工作；更多人則是認為若果男人沒有工作會失去尊嚴。

網民：筍工真係幾多人恨都恨唔到

• 「俾咁高人工你，你自己走佢真係多謝你。」
• 「咁都要走？出嚟返工係要捱三兩年，就會知自己想要乜，你四十幾歲都未捱過，其實都幾可悲。」
• 「唔洗捱有4皮，點解要走。」
• 「人工高又hea，學吓野先囉。」
• 「unun腳有4皮野，睇唔到有咩理由要走，你話做到ＸＸ就話姐。」
• 「返屋企全職湊仔女仲辛苦，份工仲hea又有四萬袋做乜要走。」
• 「千祈唔好走，有份筍工真係幾多人恨都恨唔到。」

網民：男主內俾人睇唔起

• 「咪OnＸ，男主內只會俾人睇唔起。」
• 「辭咗職一定會後悔。」
• 「做有錢既廢老定冇錢既廢老，自己揀，冇技能冇地位都算，連收入都唔掂，你仲會有老婆咩。」
• 「你諗下如果得你做野，你老婆係屋企湊仔，時間一長你都好自然會覺得佢大食懶，依加係情況掉轉，你諗下你老婆D三姑六婆會點講，辛苦一日仲要受條女氣，最後咪又係頂唔順再搵工，到時你既Skil set可能得依加一半，果時仲慘。」

網民：子女都可能REJCET你

• 「本身老竇出埋嚟做嘢嘅話，可能將來有能力去外國留學，依家老竇唔做嘢，將來只可以本地升學。」
• 「你想做全職爸爸，問過D仔女未，佢地都可能 REJCET你，你估佢地想日日對住你咩。」
• 「你搵多四萬幾，比起你每日喺屋企陪仔女，我相信你每個月攞多幾萬蚊出嚟，買玩具比佢哋玩會仲開心。」
• 「我係個仔都唔想老豆日日係屋企煩住晒，出去搵多D錢比我第時大個用好D la。」