龍豐上市即插水步翠華後塵 又一個「中環魔咒」應驗 ︳凍鏈茶專欄

歷史總是驚人地相似

2012年，翠華控股（01314.HK）以「茶餐廳第一股」姿態風光上市，上市編號寓意「一生一世」，首日升逾12%。當年股價氣勢如虹，2013年市值曾衝上80億元，風頭一時無兩。

結果呢？花無百日紅。翠華早年雄心壯志殺入中環威靈頓街，月租一度高達230萬元的巨舖，打造金漆招牌。邊個估到自由行風光不再，北上消費成為新常態，加上食物質素每下愈況，招牌奶油豬被網民狠批「縮水又唔脆」，乾炒牛河面目全非。時至今日，翠華全港只淨返幾間分店，又淪為毫子股，市值唔到兩億，對比高峰期有天淵之別。

龍豐正正複製緊同一條路

「龍豐花園」上水起家做藥房，靠做水貨客生意風生水起。近年為部署上市而逆市擴張，喺中環、尖沙咀、旺角等核心地段插旗，旺角家樂坊旗艦店更達17,500呎，氣派十足。表面風光無限，實際上靠銀行貸款同埋透支推動擴張，短期負債水漲船高，上市集資主要用來還債。更令人憂心忡忡係，龍豐嘅同店銷售增長已由2023年度64%，急降至2025年度的6%，最新八個月幾乎歸零。換句話說，新店開得如火如荼，舊店生意卻是停滯不前，正正係當年翠華盛極而衰嘅先兆。無獨有偶，兩者都有一個共同點：上市前中環插旗。

翠華當年中環巨舖月租勁高，結果泥牛入海，最終黯然退場。龍豐上市前同樣喺中環皇后大道中37號插大旗，上市首日卻出師不利。究竟中環風水唔旺零售股，定係上市前急於插旗只為粉飾太平？更諷刺係，龍豐上市前，大股東謝少海負債纍纍下仍然大舉分紅逾4億元，呢種先使未來錢嘅做法，同當年翠華大股東高位減持、一走了之嘅戲碼，雖然唔同，但套路如出一轍，根本上市就係為自己抽水。

龍豐首掛即腰斬收場，就係市場用腳投票嘅最佳證明。