診所職場事寶豬趣聞姨姨要身體檢查上回｜珍寶豬

職場

Jun 29 2018

【寶豬趣聞】有日一位姨姨登記嚟做身體檢查～

見完醫生之後，我就同姨姨講：「呢度有化驗所轉介信，小便樽同大便樽～你到時留完小便同大便就可以直接拎去化驗所㗎啦」

撰文：珍寶豬

佢：「哦哦哦，拎過去化驗所呀？」
我：「係呀～」
佢：「化驗所喺邊呀？」
我：「我已經用螢光筆圈起咗個地址㗎啦，你到時過去就得㗎啦」
佢：「哦哦哦」

第二日，姨姨又嚟到診所。
佢：「啲尿係咪交俾你呀？」
我：「噚日咪講咗直接拎去化驗所囉？」
佢：「我唔順路喎，你同我拎過去呀」

我都冇佢咁好氣：「仲有大便呢？」
佢：「未有得屙呀，屙咗再俾你啦」
我邊講邊拎個小便樽出嚟望：「大便嘅你到時可以拎去化驗所，呢個小便嘅…」

咦？喂？說好的小便呢？

我：「阿姨呀？我哋係要小便喎，你塞晒啲廁紙入去做咩呀？」
佢：「尿呀，我抹完㗎，有尿㗎！」
我：「咁嘅樣化驗所係驗唔到㗎～你直接留啲小便啲樽入面就得㗎啦」
佢：「咩呀，我平時睇電視見化驗所嗰啲人剪少少出嚟，跟住揈幾嘢就驗到嘢啦」
我揈你屎忽！

我：「驗小便嘅係要用小便嘅，總之你小便要直接喺樽入面啦」
佢：「哇，點塞下面入去屙呀？我下面好大㗎喎，你個樽口咁細」
你個尿道口大得過樽口咁恐怖？你唔好嚇我啦…
佢：「唔係喎，我睇電視啲人真係咁俾人化驗㗎喎，你問吓佢哋先得唔得呀？如果唔係又要我行多轉呀！」

下回續。

珍寶豬過往精彩文篇：