2015年「港股之最」頒獎禮

2015年「港股之最」頒獎禮

仲有幾日2015年就過去,回顧過去一年,雖然唔似2008年金融海嘯由高位近32,000點直插落10,676點咁深刻難忘,但睇返個別股份,大上大落程度絕對可以媲美海嘯。就趁年尾,小編又搞返個「XX之最」頒獎禮,同大家一齊重溫今年的話題股。

CHOK股之最 – 恩達集團控股 (01480)

恩達在2014年年尾上市,招股價為1.23元;當時表現都唔錯,首日收市都升逾一成。其後一直上升,去到3月尾已經由招股價升到去5.68元。

4月港股大時代來臨時,恩達炒得仲癲,4月尾升至9.7元,以為升幅已經夠大?小編話你知未夠,5月6日突然由9元升到上18元,5月7日由18元升到上35元;高潮而家先嚟,5月8日由開市嘅30元爆升至102元呀!!!單日爆升2.4倍,同招股價相比,更加升咗81倍,一手由招股價(不計手續費)嘅2,460元升到上最高價20.4萬元!

不過呢個價位都係一瞬即逝,轉個頭當日就倒跌42%,最後收市得返17.4元,而到尋日收市為止,股價得返2.37元,CHOK既程度,真係癲過坐過山車!

星光熠熠之最 – 中國創意控股 (08368)

呢隻半新股大家應該仲記得猶新,因為有新一代「女股神」趙薇加持。趙薇今年有「女版畢菲特」之稱,皆因佢買入的股都爆升,就好似阿里影業(01060),持有短短幾個月就賺成6億元,認真投資有道。

今次趙薇唔單止入股中國創意控股,兼出任董事,仲出席埋港交所的上市儀式。除趙薇外,佢老友王菲及阿里巴巴創辦人兼主席馬雲,都係呢隻股的基礎投資者。

在群星拱照下,股價表現就當然靚仔到不得了。中國創意控股以配售形式上市,配售價0.39元,股價首日收市價已升到4元,較配售價高出9.3倍!上市直到而家短短一個月鬆啲,最高已經升到上8.5元,真係明副其實的明「升」股。

石沉大海之最 – 時間由你 (01327)

有句說話成日聽到,「投資涉及風險,證券價格可升可跌,甚至變成毫無價值」,但其實買正股都好少會跌到毫無價值,但有啲新股見佢有跌無升,你會覺得等於丟錢落大海,永無翻身之日。

呢隻時間由你在年初招股,招股價1.1元,但一上市就「潛水」,首日收市價得0.67元,一上市已跌近四成。

之後一直係「水底」,從未浮上水面,就算4月港股大時代,阿豬阿狗的垃圾股炒都飛天,一升幾個開,時間由你都只係係咁易彈上接近1元,跟住就一直向下,低處未算低,直至尋日為止,股價得返0.285元,跌幅超過七成。小編覺得應該改名為「股價由你」,真係冇眼睇!

失望痛心之最 – 渣打集團 (02888)

啱啱講完隻時間由你,可能大家會話細價股係咁架啦,揸啲大隻股票咪穩陣囉。

嗱,小編就覺得世事無絕對,先唔講以前我媽咪買啊李生隻8號仔咁久遠嘅事(8號仔事件詳情:股民共嗚事http://www.edigest.hk/Vip/detail?id=851),今年渣打就傷透唔少股民的心。

渣打前幾年有過上升軌,由大約70元一直升,升到最高逾200元。金融海嘯後,國際銀行股雖然冇運行,但渣打都仲係150至200元之間上落。

點知舊年9月開始,渣打就好似食左瀉藥,跌穿150元支持後就一路向下。就算4月港股大時代都彈唔起,最多彈到120元附近就又跌過,喪失左「紅底股」身份之餘,仲一度跌穿海嘯價,創56.8元歷史新低。唔知青姐好似滙豐控股(00005)跌落33元事件咁,為渣打流下第二滴淚呢?

無仇報之最 – 漢能薄膜發電(00566)

喺4月港股大時代時,漢能係「滬港通」內地投資者交易量最高個別股之一,股價由去年8月至今年5月19日,股價差不多飆升五倍,市值逾3,000億元。一隻內地做太陽能的民企,市值居然超越港交所(00388)、中國石油天然氣(00857)等多隻大藍籌,真係好奇,但重點係仲有好多散戶仍然敢入市。

直至5月20日,漢能股價突然急挫47%,更畀香港證監會停牌,質疑其經營及資金狀況,市值蒸發逾千億元。據消息人士透露,漢能一直尋求復牌,但由於拒絕向港交所提供母企漢能集團帳目,短期內都復牌無望。

據聞近期漢能主席李河君仲多次係場外賤價減持,出售價格低至0.18元人民幣,較停牌前3.91元,折讓超過九成。係揸住的散戶,真係仇都冇得報。

估佢唔到之最 – IMAX CHINA (01970) 及 維珍妮 (02199)

一口氣數好多「潛水股」、CHOK股,但其實今年個市又唔係全部都咁悲,依家就講啲超乎大家想像的股。

要睇新股有冇升值潛力,部分投資者參考認購額同中籤率,一啲百分百中到一手嘅股票,即係坊間唔太多人爭住入,市場需求小,即代表股價爆升機會唔會好大。

不過,今年有兩隻新股就真係令好多散戶跌眼鏡,就係10月頭上市的IMAX CHINA同維珍妮,前者招股時認購不足,後者就只係超額0.1倍;兩者都100%中到一手。但兩者於首日升幅已經逾一成,至尋日為止,IMAX CHINA同維珍妮的累繼升幅已分別近八成及逾一倍,真係估你唔到。

伸延閱讀
【2015年財經大事回顧】http://www.edigest.hk/Vip/detail?id=1792