Pokémon GO顛覆辦公室之10大怪現象

Pokémon GO顛覆辦公室之10大怪現象

Pokémon GO登陸香港短短三天,迅速改變人類習慣,唔少人情願行路都唔搭車,只係為左捕捉小精靈。最搞笑係當風氣延至辦公室,全公司上上下下陷入瘋狂狀態,個個同事都認真撳手機,以下嘅辦公室怪現象,你哋有無遇到呢?

撰文:肥比

1. 「獨家村」同事變得多野講、好合群

一向唔多講野,存在感接近0、又唔會出去同同事食飯既同事,竟然踏出公司門口,出街食飯,仲要大大聲講自己捉左「比卡超」,驚人唔知佢有幾叻,存在感即刻爆燈!

2. 大家突然變得好老友

平時見到同事最多都係禮貌講句Hi,之後Dead Air;但同事一句「公司有比卡超呀!」,連平時寡言嘅同事都企起身叫過對面問「邊度有?」,令辦公室氣氛忽然和諧,一隻Game成功拉近同事關係。

3. 走火通道多左人流

講明係「走火通道」,一日無火警都唔會行嘅通道一下子多咗好多同事,拎住手機行來行去,莫非做緊火警演習?

4. 有得claim公司數都唔肯搭的士

同事出外公幹,一定會claim公司數搭的士,但突然良心發現,情願熱辣辣搭2蚊電車,因為要走勻港島各區捉小精靈。

5. 廁所尿兜都好影?

有同事專登入廁所影尿兜,男同事甚至不惜被人告都要入女廁,真係惹人暇想……

6. Cut老細電話線

竟然咁大膽Cut老細電話線?無他,只係差一秒就收服到隻水戰龜,老細就打黎,忍唔住爆粗……

7. 好想入老細房

有同事話老細房有稀有嘅「護主犬」,大家唔洗專登走去中聯辦,但邊個夠膽入去捉?

8. 做人口普查員、Office Boy變絕世筍工

最近做緊人口普查,街上人口普查員明正言順逗住人工、去唔同地方捉精靈,時間剛剛好,成為「極級筍工」;至於做Office Boy,不停要行出行入執文件、影印,發現精靈都有藉口去捉!

9. 辦公室充斥起哄聲

辦公室起哄聲此起彼落,隨時有人大叫捉到小精靈,好熱鬧。

10. 食飯時間比以往少

午飯時間好似比平時短,根本就係心理作用,因為唔夠時間捉小精靈。