要維持中產生活  每月要花幾錢?

要維持中產生活 每月要花幾錢?

在香港做一個中產家庭認真唔易,年薪逾三百萬的財爺都話自己係中產,香港中產出名識嘆,識飲識食、仲要有啲高檔的興趣如玩音響、攝影,今次小編就計一計數,睇香港要做一個有生活質素的中產,一個月最少要洗幾錢。

住屋

住的地方要突顯中產的身份,住私樓近乎是作為中產必要條件。私樓唔可以太細,最少都要有400至500呎,有兩房,有私人空間之餘,而環境又唔好太雜。

以九龍灣德福花園高層實用面積500呎的一個單位要580萬元,月供約15,000元,放租17,500,而較新的馬鞍山迎海第一期放售608萬元,月供約15,700元,放租17,000元。不過買樓計埋管理費,其實同月租都差不多。所以做一個中產,無論買樓定租樓,每月就要用上約17,000元。

住屋每月洗費17,000元
———————-

養車

每個中產都唔想迫地鐵、巴士,所以唔少人都想有自己一部車。由於買車有平有貴,加上有些中產可能會一筆過買車,唔月供,所以今次唔計車價,只計養車費。

根據運輸處規定私家車車主每年都需要交付牌費,汽缸容量不足1,500cc需付$3,929,1,500-2,500cc的需付$5,794,汽缸容積愈大,牌費就愈貴。

另外,月租停車場車位大約需要$2,500,如果屋企、公司兩邊都租停車場,即每月停車場要$5,000元。再加每日油費$100,尚未計隧道費及時租車位費,平均汽車上的每月開支需要$8,000。還有每年檢查並維修費需要約$5,000,以及買第三保,計埋隨時要達10,000元。

養車每月10,000元
———————-

置裝費

作為一個中產,打扮不可以太過寒酸,置裝費不可少。

男士總要有兩三套度身訂造的西裝,雖然未必要買Dunhill或Kent& Curwen等的英國名牌西裝,不過總要有一套夠體面的西裝,約$5000就可以買到一套既莊重又不失時尚的中等價位西裝。始終度身訂造的可以自己挑選布料,最重要是唔怕無款式或同人撞款嘛。再加埋見得下人的皮鞋,好似一對Dr. Martens閒閒地都過千元。

而女士們需要有不同名牌手袋、衣衫、鞋等配合不同場合需要的服裝,加上番工想日日有新鮮感,唔想重覆著某幾件衫,一蘿蘿的置裝費真的是不容小覷,名牌手袋講緊都$8,000至$10,000起跳,OL裝每套約$1,000,每對高根鞋$800,再加上珠寶首飾,講緊都幾千蚊。

再計埋平時出街的運動衫、波鞋,冬天要買大褸、長靴等,一年置裝費$20,000至$30,000元都走唔甩,除返開每個月大約2,500元左右,都唔算太離地啦。

置裝費每月2,500元
———————-

伙食

中產最緊要就係識食,食唔可以太委屈自己,點可以餐餐茶餐廳、大排檔。家陣食一餐好少少的早餐,都要50元左右,午餐都要100元,晚飯都要200元,就咁計,一個月都30日都要10,500元。

仲未計,如果有週年慶祝紀念,同朋友happy hour,二人去食自助餐動輒都要$1000,落BAR飲野又話要幾百,所以都要額外預一筆做應酬,計計埋埋,一個月12,000元伙食費都差不多。

伙食費每月12,000元
———————-

旅行

時常都聽到中產每年最少會去一兩次旅行,去日本掃貨、浸溫泉、食和牛及料理、住靚酒店,七日洗費約一萬五千元,每年去兩次則要三萬元。如果歐遊的話,去英國法國等平均用三萬,假若豪遊歐洲的話,洗四至五萬更加走唔甩。

每年旅行開支30,000元至50,000元
即平均月花約4,000元
———————-

高檔嗜好

做得中產,當然每個人都有一至兩個高檔嗜好,例如飲紅酒、玩攝影、音響、打高爾夫球,潛水等等等,即使喜歡研究美食的,都會投資買廚具等等。

這些嗜好都是要有金錢支持,當一年又預30,000至40,000元在這方面,每個月都大約要花3,000元左右。

個人興趣每年花約30,000至40,000元
即平均每月大約3,000元

就咁加上數總數,粗略估計每月已要48,500元,再加上水電煤、電話費等開支,每月約1,500元,一個月已接近花50,000元。這還未計強積金、保險、供養父母等開支,別忘記還要預留錢交稅。

據稅務局的16/17年度薪俸稅計算,月入50,000元又全無額外免稅額的話,需繳交67,560元稅款(一年,未計退稅)。扣除稅項後,每月實際只得44,362元可花,未足夠以上支出。

但如月入60,000元的話,一年稅款就是87,960元,扣除稅款,每月便有52,670元。

換言之,想擁有一個中產生活,月入60,000只是最基本門檻,如想有儲蓄、投資、或預留家用,人工就要再高啲。

不過,上述數式只以單身獨居人士作計算,如果是一對年輕夫婦二人同住,成本又唔洗咁多,因為住屋及車可以共同使用,這兩項支出無需計雙份。換言之,二人家庭每月洗費只需70,000元,平均每人洗費是35,000元。若夫婦二人每人都月入40,000元,扣稅後都足以支付此金額。

若然二人有小孩,這又不同講法了,因為新增支出就真的可大可小了,起碼屋可能換大啲,還要計及養小朋友的費用。想知養大一個孩子需要幾多錢? 詳情可參閱《10年前要400萬元 現在養大小朋友要幾錢?》(http://www.edigest.hk/Vip/detail?id=2521)

所以,各位想做中產的朋友,真係要努力搵多啲呀﹗

伸延閱讀︰
【6個中產不可錯過的網購網站】
http://www.edigest.hk/Vip/detail?id=3878
【月入25,000元 有資格娶日本老婆】
http://www.edigest.hk/Vip/detail?id=3409

相關文章