【診所職場事|寶豬趣聞】鍾意聞臭腳嘅先生|珍寶豬

【診所職場事|寶豬趣聞】鍾意聞臭腳嘅先生|珍寶豬

有日一位男士嚟到診所。
佢行埋嚟登記處問我:「姑娘,呢個醫生睇症hea唔hea呀?」

你呢個問題同問我平時返工認唔認真工作一樣,我老虎蟹都話認真啦下話?
我:「你係咪要睇醫生呀?係嘅俾身份證我登記呀」
佢:「如果hea睇嘅我先睇啦!」

撰文:珍寶豬funnyclinic)|圖片:電視截圖

先生鍾意聞另一半嘅臭腳

咁得意?你嚟呃病假呀?
我:「咁…你自己決定啦,呢啲我都答唔到你嘅,hea唔hea真係幾個人睇法~」
佢:「咁呀?…我可唔可以講我係咩情況俾你知呀?你試吓了解咗我先呀?」
我做咩要了解你呀?我負責登記咋喎?
我:「有啲咩唔舒服同醫生講就可以㗎啦,醫生先係醫你嘅人嘛」
佢耍手擰頭:「唔係呀唔係呀,唔係我要睇醫生㗎」

我:「咁你係…」
佢:「你決定要了解我啦?」
其實都唔係好想,不如你都係走罷啦。
我:「不如我同你登記先呀?你再入房同醫生傾呀?」
佢:「不如你了解咗我先?」
我想掉筆,我好想掉筆!
我冇出聲。
佢:「事源係咁嘅,我嘅另一半對腳就有味嘅,我知係臭㗎,但係我好鍾意」
…我聽咗啲咩?你哋又睇咗啲咩?
佢繼續講:「醫生可唔可以hea啲話俾我哋知我哋都係正常?」
醫生講完會令你哋一個對腳臭得舒服啲,一個聞腳臭聞得舒服啲?啊,現世代嘅人諗法真係令我覺得自己跟唔上啦。
我:「腳有味的話有可能係真菌引起…都要嚟睇醫生㗎」

佢:「我唔係要呢啲呀!」佢嬲到衝咗出診所。
…其實你哋自己兩個人ok咪得囉,醫生唔需要做你哋雙方嘅證『聞』人…

診所職場事 寶豬趣聞 鍾意聞臭腳嘅先生 珍寶豬
圖片:電視截圖

延伸閱讀:北歐風的診所|珍寶豬

延伸閱讀:拎人哋張醫療卡用嘅小姐|珍寶豬