【診所職場事|寶豬趣聞】想要四日病假嘅先生|珍寶豬

【診所職場事|寶豬趣聞】想要四日病假嘅先生|珍寶豬

電話響起~
我:「你好,乜乜診所」

對方係一位男士:「早晨呀!診所呀?我晏啲可唔可以落嚟睇醫生呀?」
我:「可以呀,我哋會開到一點,之後就四點至八點」
佢:「得得得,準時到一定!有冇邊個時間分邊個醫生睇呀?」
我:「我哋得一個醫生」
佢:「好唔好相與呀?」

撰文:珍寶豬funnyclinic)|圖片:電視截圖

「我求吓你俾我病啦」

睇醫生都要相處到,明嘅明嘅,好多人都擔心呢啲嘢~
我:「都ok嘅,你有啲咩唔舒服都可以直接同醫生講」
佢:「你哋有冇邊種病會係安排得好啲呀?」
安排?你想喺診所獲得咩安排呀?
我:「唔好意思先生,我唔係好唔明你問緊咩…」

佢:「唔明呀?咁我換個角度同你講呀,我而家就冇唔舒服嘅想要四日病假,你會唔會知邊種病可以拎到四日病假?」
我:「冇唔舒服嘅話一日都唔會有呀」
佢:「我而家冇啫,你講完我就有㗎啦,我以前拎開嘅傷風頭痛都係得一兩日,我真係唔知邊種病有四日病假咋」
我:「先生,我係唔會話你知嘅,我哋醫生係根據你真實嘅需要而開病假紙」
佢:「我梗係知真啦,你話俾我聽要跛嘅先有四日,我咪真係毆跛自己囉,我一定做到足做到真㗎」
哇,好大犧牲喎。係咪真係我講你知,你就照做先?咁我會好大膽地假設喎!
我:「唔好意思先生,我真係唔會答你。你真係病嘅先嚟睇醫生,冇病嘅話醫生幫你唔到」

佢:「我求吓你俾我病啦,你個心唔係黑色嘅就答我啦」
我求吓你個人唔好咁膠啦。
我:「如果冇其他嘢嘅話,我收線㗎啦,你有需要就喺應診時間嚟睇醫生啦」
佢好粗聲好粗氣講:「病都唔俾!」
嘟。
佢就收咗我線。
你有病呀,真係要治療治療啊~

延伸閱讀:【診所職場事|寶豬趣聞】想要維他命Sample嘅小姐|珍寶豬

延伸閱讀:想驗吓啲大便嘅先生|珍寶豬

診所職場事 寶豬趣聞 想要 四日 病假 先生 珍寶豬
圖片:電視截圖