【診所職場事|寶豬趣聞】好好珍惜自己每一隻牙嘅小姐|珍寶豬

【診所職場事|寶豬趣聞】好好珍惜自己每一隻牙嘅小姐|珍寶豬

有日一位小姐嚟到診所。
佢行埋嚟登記處「呀」一聲,擘大個口望住我。

撰文:珍寶豬funnyclinic)|圖片:電視截圖

「唔好啦,盡救得唔得呀?我想好好珍惜我每一隻牙呀」

我:「係咪睇醫生呀小姐?係嘅話麻煩你俾身分證我登記呀」
佢繼續擘大個口,伸出食指指住自己個口。
我:「請問有咩事呀小姐?你係睇醫生嘅話,我就同你登記啦」
佢終於合返埋個口,再行前一步同我講:「你睇唔睇到呀?」
我:「睇啲咩呀?」
佢:「我個口囉」
你個口一直都喺度,唔會睇唔到呀我。
我:「你係咪睇醫生呀?」
佢:「係呀,不過唔係你同我睇咗先咩?」
我:「我負責登記嘅,唔係我睇你呀,你俾身分證我登記呀」
佢:「咁頭先我俾你睇都冇用㗎?」
係呀,失唔失望呀?

我:「俾醫生睇先有用嘅」
佢:「車~頭先我俾你睇你又唔出聲」
我點知你擘大個口做乜啫,我唔知你會唔會係自發性為興趣而擘大個口㗎嘛。
我:「你要睇醫生嘅麻煩你俾身分證我呀,我要登記」
佢再行前啲,再擘大個口對住我…
我:「小姐,我咪講咗俾我睇冇用囉?要俾醫生睇㗎嘛」
佢擘大住佢個口,講到一舊舊:「你睇吓補佢要幾錢呀」
…補牙呀嘛?西醫嚟㗎!補條鐵呀?
我:「小姐你可以合返埋你個口啦,我報唔到價俾你…」
我都未講完,佢就插咀:「點解呀?救唔到呀?唔好啦,盡救得唔得呀?我想好好珍惜我每一隻牙呀」
我:「我哋西醫嚟…冇得補牙,你應該要去搵牙醫先啱」

佢細細聲「呀」咗一聲就離開咗診所。

延伸閱讀:【診所職場事|寶豬趣聞】想要維他命Sample嘅小姐|珍寶豬

延伸閱讀:【診所職場事|寶豬趣聞】想要四日病假嘅先生|珍寶豬

【診所職場事|寶豬趣聞】好好珍惜自己每一隻牙嘅小姐|珍寶豬
圖片:電視截圖