【診所職場事|寶豬趣聞】聽聽大便的聲音|珍寶豬

【診所職場事|寶豬趣聞】聽聽大便的聲音|珍寶豬

有日一位A先生嚟到診所。
登記完佢同我講:「我想去廁所,係咪要鎖匙呀?」

我望望鎖匙架:「唔好意思呀,條男廁匙借咗出去,你一係去廁所門口等等睇吓有冇人開門呀」
佢轉身離開診所。

撰文:珍寶豬funnyclinic)|圖片:電視截圖

「你屙親屎佢哋就撼頭埋牆」

過咗陣,佢返咗嚟坐低等睇醫生。
原先借咗男廁匙嘅B先生都返嚟,B行埋嚟還返條匙俾我,仲同我講:「個廁所冷氣有啲大呀,下次可唔可以較返暖啲呀?」
A先生搭嗲:「你吽咁耐梗係凍啦,我去完你都未出嚟」
B望望A,唔出聲,放低條匙就行去搵個位坐低。
A繼續啄住B嚟講:「頭先你係咪喺入面屙屎呀?」
B冇出聲。
A:「屙到劈呢啪啦嗰個,中間嗰格呀,係咪你嚟呀?」

B都冇出聲,係個樣有少少變。
A:「係你啦,左右隔離都冇人,得嗰格咋嘛」
B繼續無視。
A:「我老婆都係屙到咁㗎,你知唔知自己點解會屙到劈呢啪啦咁嘅聲呀?唔係好嘢嚟㗎」
B望向A,但係都繼續冇出聲,個樣就似乎係誠心想學嘢咁。
A:「我老婆之前就做咗嗰個咩大腸鏡㗎啦,我都話佢實有嘢㗎啦,屙到咁。一做咗個檢查就證明我冇錯啦!佢條腸入面好多嗰啲肉粒呀!我都話佢屙到咁劈呢啪啦咁嘈實係有問題啦!你一陣入去同醫生講埋你有呢個問題啦」
B擰返轉頭冇理A。
A好認真咁講:「條腸入面嗰啲肉粒就好似牆咁呀,你屙親屎佢哋就撼頭埋牆㗎啦,一撼就劈呢啪啦,啲撼頭埋牆聲嚟呀」