【診所職場事|寶豬趣聞】小姐以為自己係VIP|珍寶豬

【診所職場事|寶豬趣聞】小姐以為自己係VIP|珍寶豬

電話響起~
我:「你好,乜乜診所」

對方係一位女士:「診所呀?醫生喺唔喺度呀?」
我:「喺呀~今晚八點前嚟都有醫生睇」
佢:「好呀好呀,你話俾佢知我打過嚟呀」

撰文:珍寶豬funnyclinic)|圖片:電視截圖

「話俾醫生知我打過嚟」

我:「請問你係…?」
佢:「我喺度睇過兩次㗎啦」
我仲以為你係咩重要人物呀嚇得我呀~
我:「你要睇醫生嘅直接嚟得㗎啦,今晚八點前喎」
佢:「你話俾佢知我打過嚟喎」
你打過嚟有咩咁特別咁重要?要專登通知醫生?
我:「好呀」
佢收咗我線。我亦有通知返醫生有件咁嘅事,醫生冇回應。
過咗幾個鐘後,佢親自嚟到診所,佢問我:「得未呀?」

我:「同你登記先呀」
佢:「登記?點解要登記呀?」
我:「你唔係要睇醫生咩?睇醫生就要登記啊」
佢:「我頭先咪講咗你同醫生講我打過嚟囉?」
我:「你睇醫生呀嘛?唔係咩?」
佢:「唔係呀,上次醫生話我睇完可以唔駛再睇,有需要至嚟拎藥,配藥平過睇醫生嘛,差唔多嘅嘢就可以唔駛再睇嘅?拎幾多日藥都可以呀嘛,我咳水就要多一枝,收鼻水可以要可以唔要,佢話打個電話嚟同佢講聲就得嘅?」
…原來你句「話俾醫生知我打過嚟」入面係可以延伸到咁多嘢…
我:「你配藥嘅直接同我講就得㗎啦,你有冇覆診卡號碼俾我?」
佢:「你唔係同醫生講咗我打過嚟㗎咩?」

係呀!講咗呀!醫生唔Q記得你呀!
我:「醫生有太多病人,我哋都係要睇清楚你排版先可以出藥嘅,唔可以憑記性就咁出藥俾你咁危險㗎嘛係咪?」
佢拎出覆診卡:「醫生真係記得定唔記得呀?」
我唔出聲,梗係唔記得啦!

延伸閱讀:【診所職場事|寶豬趣聞】想要維他命Sample嘅小姐|珍寶豬

延伸閱讀:【診所職場事|寶豬趣聞】想用阿媽張醫療卡嘅先生|珍寶豬

【診所職場事|寶豬趣聞】小姐以為自己係VIP|珍寶豬
圖片:電視截圖