移民純粹為逃離香港?過來人談心態 以BNO移民英國前先考慮這3點 |港媽 • 講英

移民純粹為逃離香港?過來人談心態 以BNO移民英國前先考慮這3點 |港媽 • 講英

隨著《港區國安法》實施,英國外相藍韜文日前在國會宣布,將對新措施,延長BNO護照持有人逗留英國的期限,最快6年便可申請入籍英國。在英國居住的港人、Facebook專頁「港媽 • 講英」早前撰文,以過來人的身份,建議大家移民英國前要考慮以下事項:

撰文:港媽 • 講英|圖片:unsplash

其實想講呢個話題好耐。而家香港政治環境同埋近日嘅BNO事件,令好多人好認真咁考慮移民,特別係移民英國。

移民從來都係一件很個人嘅事。你覺得放棄香港某啲野,而獲得新地方嘅野係好值得。但係,都有啲人會覺得咁樣係好儍豬豬。唔緊要,呢啲叫唔同意見、唔同睇法、唔同經歷。

但如果係純粹想逃離香港某啲野而不顧一切咁走走走,咁我建議再諗多啲先。

Afterall,移民is not for everyone。

1. 移民唔代表一天都光晒

逃離咗原本嘅某啲野,但可能新地方遇到更多更愁嘅問題,之後就抱怨抱怨點解點解。傻豬,外國嘅月光唔係特別圓,每個國家都有自己嘅問題。移民之路要成功,就要忠於自己移民嘅初衷,積極努力面對困難。

2. 唔好將「香港」帶過嚟

記住,移民係去一個全新嘅地方生活。佢嘅地理、環境、文化、氣候、人民語言、交通、食物、住屋、工作、娛樂係完全唔同。所以,如果你期望香港嘅便利生活喺英國可以繼續,咁你將會幾失望。

過來人談心態 以BNO移民英國前先考慮這3點 |港媽 • 講英

3. 有啲長遠嘅計劃

特別係作為人母嘅女士。英國冇工人姐姐,四大長老亦不在身邊,照顧小朋友、打理家頭細務,就好似好理所當然咁落咗喺我哋呢班阿太身上,啲老公就出哂去返工/揾工(當然有例外)。

3至4個月後,過咗移民新鮮感,呢個情況會好sink in。話晒都曾經係日日踩住對Rupert Sanderson孭住個Chanel入會議室橫掃千軍(唔係指自己),而家卻日日做以前工人姐姐做嘅野,真係可以好悶。

心目中有個goal,例如計劃小朋友返full day學就搵返嘢做,或者pursue吓自己原有嘅興趣。因為,英國真係可以好悶,好凍、好濕同好暗。如果冇一啲goal去努力吓,真係好容易會抑鬱。

以上係小女嘅一啲愚見,講到尾,心態勝於一切。

過來人談心態 以BNO移民英國前先考慮這3點 |港媽 • 講英
作者簡介: 移民英國,回流香港,現再回流英國。 人生匆匆好幾個十年,現已榮升為兩小豆釘——小暖男與聰明豆的港媽。每天就在叫刷牙、叫沖涼、叫食飯、洗衫煮飯、執玩具的chaos渡過。

延伸閱讀:移民英國|一家四口每月生活費只需約港幣1萬元?一星期買餸開支、餐單分享|港媽 • 講英

延伸閱讀:BNO申請、續領懶人包|申請步驟、副簽與文件要求 遺失補領要點做?

更多移民相關文章,詳見經一移民局