移民英國住邊好?居英港人初步介紹各區天氣、樓價、學校、工作機會與交通配套|港媽 • 講英

移民英國住邊好?居英港人初步介紹各區天氣、樓價、學校、工作機會與交通配套|港媽 • 講英

因應《港區國安法》在港實施,英國政府宣布擴BNO護照持有人的權利,放寬申請移民的要求,居住最少6年便可移民英國。然而,英國這麼大,移民英國住邊好?住倫敦有甚麼好處?哪裡的樓價較低?在英國居住的港人、Facebook專頁「港媽 • 講英」早前撰文分享,大家移民英國前選擇居住地可以考慮的事情:

撰文:港媽 • 講英|圖片:unsplash

好多網友問我,英國咁大,點揀喺邊度落腳?有親戚就話可能會住近啲;如果冇嘅話,唔通聽過曼聯就揀住曼城?以下係小女,一名曾住英國十幾年,回流香港十幾年,再帶大帶細咁回流多次英國嘅師奶仔愚見。

首先,嚟得英國就唔好將香港嗰套搬過嚟。就算住喺Central London(倫敦市中心)嘅Central,都唔好諗住好似香港咁樓下就有大商場駁通地鐵,黑雨都唔怕濕,半夜醒咗都唔餓。英國同香港係兩個唔同嘅地方,有唔同嘅文化、天氣、食物、生活、娛樂環境。

移民英國住邊好?居英港人初步介紹各區天氣、樓價、學校、工作機會與交通配套|港媽 • 講英
就算住喺Central London(倫敦市中心)嘅Central,都唔好諗住好似香港咁樓下就有大商場駁通地鐵。

咁好啦,英國天大地大,由最南嘅康瓦爾郡(Cornwall)揸車到最北嘅蘇格蘭(Scotland)邊境都要大概8粒鐘。咁對一啲英國冇朋友、冇親戚、冇留過學、冇旅過行,只係可能弱弱地聽過曼聯係曼城(Manchester),利記係利物浦(Liverpool),Harry Potter喺倫敦(London)撘火車返學,又想揾個治安好、校網好、易揾工、樓價合理、生活方便、綠草如茵、心曠神怡地方嚟落腳嘅朋友嚟講,到底可以點揀?

小女只會大包圍地分享吓英國地區同見解,希望帶出唔同角度嘅觀點畀大家參考,內容絕冇歧視成分。揀地點時,可考慮以下因素:

1. 口音

英國有好多郡(county),而每個郡(county)都有獨特嘅口音。普遍南部嘅英文比較容易明白,北面嘅,例如紐卡素(Newcastle)或利物浦(Liverpool)嘅口音,可能對初到英國嘅港人嚟講,需要多點時間適應;因為除咗口音,仲有好多地道slangs要明白。

移民英國住邊好?居英港人初步介紹各區天氣、樓價、學校、工作機會與交通配套|港媽 • 講英
北部地區如利物浦(Liverpool),當地口音或對初報到的港人來說要多些時間適應。

2. 天氣

地理常識,北面凍過南面,郊區凍過市區,高山雨水多啲,東面就乾身啲。但整體英國都係又凍又濕,自己衡量吓啦。

3. 鄰居

有普遍印象嘅就係,中部如伯明翰(Birmingham)多印度人,南面如白金漢郡(Buckinghamshire)多有錢人,東北面多chavs(用以指部分具反社會主流傾向的青少年,意帶貶義),曼城(Manchester)多香港人。呢方面都幾影響治安、學校質素同市區配套,建議上網做完資料搜集後親身來感受吓。

4. 住屋環境

同大部分國家一樣,越近首都住屋就越貴。咁當然,就業機會多啲,又多啲娛樂,又近唐人街,多啲家嘅感覺。但大家可以考慮吓,移民英國是否想過返香港嘅大都市生活,定係鄉村啲嘅農場生活,還是城郊啲嘅簡單生活,海邊啲嘅自由生活。我想講嘅係,英國版圖很大,倫敦以外都有好多就業機會,或創業嘅可能,所以都值得跳出框框考慮多方面啲。

樓價方面,普遍南面貴過北面。但有些地區如旅遊區,海邊(英國人對海邊非常瘋狂)或擁特別靚嘅自然景觀,例如英國湖區、科茲窩(Cotswold)等,樓價都會俾本地人搶貴晒。

移民英國住邊好?居英港人初步介紹各區天氣、樓價、學校、工作機會與交通配套|港媽 • 講英
圖為英國湖區。

5. 投資

可留意吓英國政府未來幾年會對邊個城市有重點發展,例如起鐵路、市區更新,有機會提升樓價同優化生活配套。又或想做物業投資嘅,咁可揀就業機會多嘅城市,放租畀年輕專業人士,或附近有出名學府嘅城市,放租畀學生。

6. 就業

最多網友關心嘅一項。一定㗎啦,大城市例如倫敦就最多就業機會。倫敦市中心生活指數好高,好多香港人就揀倫敦外圍,因為生活指數相對低啲,同埋可以入倫敦返工。但其實通勤時間都唔短,來回可長達1.5小時。如果揀2、3線嘅城市就要有心理準備揾錢比香港少,同埋未必係自己做開嗰行。

7. 學校

每個郡(county)都有好好同麻麻嘅學校,可以睇Ofsted report做參考。除非你指定子女必定要入間學校,否則就可以唔使睇得太重。但要留意某啲移民落腳熱門地區(如Barnet、Richmond、St Alban),評定咗為「outstanding」嘅公立學校(State school)都可能超哂額(oversubscribed) 。

8. 交通

考慮有冇直通火車到倫敦,因為如果最壞情況下堅要去倫敦返工,而你唔係住倫敦附近,有直通火車都叫有幫助。冬天落住雨企喺月台上等轉車,之後廣播話火車延遲時,你真係會想跳落去月台算。另外,近國際機場都係一項值得考慮嘅因素,到時要出差又方便啲,去歐洲旅行又平啲。倫敦以外,喺英國最好識揸車,如果唔係你真係會好孤單。英國啲巴士出哂名唔密、唔準時同唔快。

移民英國住邊好?居英港人初步介紹各區天氣、樓價、學校、工作機會與交通配套|港媽 • 講英

如果真係唔會、唔想、唔識揸車嘅,建議揾地方近火車站、巴士站同超市,咁冬天出街或買餸時冇咁苦。

以上都係小女少少嘅經驗所談、觀察同分享,任何選擇都冇一定嘅對錯。希望可以幫大家係移民英國嘅事上從多啲嘅角度了解多啲。

延伸閱讀:移民純粹為逃離香港?過來人談心態 以BNO移民英國前先考慮這3點 |港媽 • 講英

延伸閱讀:移民英國|一家四口每月生活費只需約港幣1萬元?一星期買餸開支、餐單分享|港媽 • 講英

延伸閱讀:BNO申請、續領懶人包|申請步驟、副簽與文件要求 遺失補領要點做?

更多移民相關文章,詳見經一移民局

過來人談心態 以BNO移民英國前先考慮這3點 |港媽 • 講英
作者簡介: 移民英國,回流香港,現再回流英國。 人生匆匆好幾個十年,現已榮升為兩小豆釘——小暖男與聰明豆的港媽。每天就在叫刷牙、叫沖涼、叫食飯、洗衫煮飯、執玩具的chaos中渡過。