商戶為發精靈財  狂推優惠

商戶為發精靈財 狂推優惠

Pokémon GO大熱,造就好多商機,一眾商家都把握機會推出各式各樣嘅着數優惠,去吸引人流及顧客,各位小精靈訓練員出街捉精靈自娛之餘,仲可以有現金券、搭免費車,有著數唔係唔要嘛?

圖片: 奧海城、MegaBox、Uber、SmarTone、Pacific Coffee

撰文: Jackie

1. 信和新地商場送$50現金券

有商場以現金券作為招徠,最快做到指定Pokémon GO任務,便可得到50元現金券。

其中信和集團旗下六間商場,包括奧海城、屯門市廣場、中港城、荃新天地、尖沙咀中心、帝國中心及利東街,由今日(27日)起,一連3日,每日抽出指定小精靈,首20名在該商場捉到指定小精靈的訓練員,就可以得到指定商戶嘅$50蚊現金券啦。

以今日為例,奧海城就抽出喵喵怪為指定小精靈,頭20個在奧海城捉到喵喵怪,而又上載Cap圖去奧海城 Facebook,就可以得到萬寧$50現金券一張。喵喵怪捕捉機率有成40%,算常出現級別,但以小編所見,暫時仲未有人上載Cap圖,證明唔算多人爭,想賺現金券可以去博一博。

新地旗下的東港城、wtc more世貿中心、上水廣場及Mikiki,亦有捉精靈送現金券活動。方法是由即日起至7月31日,於商場範圍內捕獲三隻精靈並上載至facebook,hashtag商場名字然後向顧客服務員展示,便可獲新地商場現金券50蚊。不過名額只得20個。

至於屯門V City由明天(28日)開始,首20名最快顯示Pokémon Go升級到15的顧客,便可獲V city 港幣50元現金劵乙張。另外,精靈訓練員只需將小精靈和場內B. Duck的實景合照Cap下,上載至不同社交媒體並hashtag「Vcityhk」、「#VcityPokemon」及「VcityBduck」,亦可免費獲取飲品及食品1份。

順帶一提,以上商場都會不定時使用 Lure Module 撒花,務求吸引多啲小精靈出現。


2. MegaBox送$10乳酪雪糕優惠券
MegaBox吸客方法同信和差不多,但禮品就相對遜色,只得$10優惠券。而且冇講明數量,送完即止!

優惠詳情:由即日(27日)起至8月2日,喺MegaBox 場內捕捉(唔一定要捉到)小精靈,截圖並上載至個人Facebook,check-in地標「MegaBox」及加上‪#‎MegaBoxPokemonGO‬,之後展示畀G 顧客服務中心嘅職員睇,就可以贏得Red Mango 乳酪雪糕HK$10優惠券1張。

另外,MegaBox都會不定期於場內PokéStop使用Lure Module(小精靈誘餌),吸引玩家前來捕獲稀有小精靈!

3. 任搭Uber 3個鐘

Uber就推出任搭抽獎。只要捉到超過150隻小精靈(可重複),就有機會今個星期六(30日)免費3小時任搭Uber,遊匀全港九龍新界捉小精靈!

不過參加步驟有啲複雜,先要捉超過150隻小精靈,將其中一隻小精靈改名為「UberGOHK」,在明晚(28日)之前於自己個人Facebook上載寵物小精靈收獲截圖,再加埋UberGOHK,再Tag埋3位戰友,先參加到Uber呢個抽獎,總共會有30位訓練員被選中。

小編玩咗3日只係捉到77隻,要行幾遠先夠151隻呀。而且,依家好似要求大家行路多過搭車,優惠似乎唔夠現金券實用。

不過仲有一個優惠,只要成為Uber新用戶,輸入優惠碼「POKEMONHK」,即可獲得首程HK$100乘車優惠。

4. 數碼通免費借流動充電器

只要係數碼通流動電話月費嘅用戶,就可以喺旗下任何一間門市,免費借用流動充電器三日。

不過睇番佢Facebook Post嘅回覆,有唔少人投訴用SmarTone網路玩Pokémon GO,GPS成日唔準,又指冇無限plan,令用戶要買data玩Pokémon GO。唔知有得借流動充電器呢個舉動,會唔會令佢地順返條氣呢?

5. Pacific Coffee免費升級手調飲品

鐘意飲咖啡嘅訓練員有福了!Pacific Coffee今日起(27日)至7月31日,去到任何一間 Pacific Coffee,向店員出示你捉到嘅比卡超,就可以享有免費手調飲品升級優惠啦。小編真係捉到比卡超,可以慳返幾蚊喇!

6. csl. / 1010用戶免Data任玩Pokémon GO

咁多個Jetso,呢個最令人尖叫。csl. 為Pokémon GO 推出「無限數據」,會將《Pokemon Go》所用嘅Data自動扣除,毋需申請!而且網速高達 375Mbps!

Pokémon GO 免費數據適用於所有要用到數據嘅app,包括Google Map嘅GPS功能。不過就唔包括下載及更新Pokémon GO。

伸延閱讀︰
【免費Wifi 充電全天候支緩 捉精靈必到7大熱點】
http://www.edigest.hk/Vip/detail?id=3656
【Pokémon Go手機耗電測試 邊款最食電?】
http://www.edigest.hk/Vip/detail?id=3650

相關文章