500萬外國置業選擇  睇完會唔想做香港人

500萬外國置業選擇 睇完會唔想做香港人

樓市又癲過。新鴻基地產(00016)旗下的筲箕灣新盤形薈最近開價,最平單位281呎定價都要549萬元,呎價接近20,000元,折實後仍高過同區呎價20%至50%,都咪話唔狼死。

撰文:JOEY

可憐的香港人,500萬只係買到300呎唔夠既樓,但放眼世界,500萬真係可以住得好豪。未睇過?唔想煩?唔洗騰,小編幫你搜羅東南亞以至歐美澳地區嘅大城市內、大約500萬甚至有找嘅盤源,畀你參考參考,包大家流哂口水。

到底拎住500萬港幣可以係世界各地買到點樣嘅物業?

台北
喺台北,只需要400萬多啲啲就可以係中正區買到個876平方呎連車位嘅物業,行三分鐘就可以到達古亭捷運站,交通方便。古亭站同旺區西門站都只係三站之隔,行街行到攰,十五分鐘就可以返到屋企休息,真係令人羨慕。

東京
喺東京,同樣都係403萬左右就可以係中央區買個三房一廳仲有露台嘅單位,而且交通都相當方便,附近有都營鐵路站。

曼谷
同樣都係港人熱愛嘅旅遊勝地曼谷,拎住366萬就可以買到個日日令你有度假感覺嘅單位,呢個單位有成2,172平方呎!真係分分鐘廁所都大過小編間房… 有兩房兩廁嘅間隔,真係喺入面打網球都仲得!而且交通都好方便,行幾步就到Lumpini鐵路站,加上本身都位處市中心地帶,抵就抵,可惜長住又始終有言語溝通上嘅考慮…

吉隆坡
嚟到馬來西亞嘅吉隆坡,呢間屋就仲架勢堂喇,不過貴返啲,要500萬港紙,但就有2,345平方呎嘅香港罕見呎數,有四間房仲有足四個廁所,肯定唔洗爭,唔洗傷感情。行一分鐘就去到最近嘅公共交通站!

講完一輪東南亞,係時候衝出亞洲睇睇同香港差唔多嘅金融大城市,不過唔講都唔知,原來500萬港紙都真係幾好使好用!


墨爾本
先去澳洲嘅墨爾本,風光如畫就唔在講,拎住500萬嚟呢度買樓就可以係市中心買返個三房單位都相當吸引。

洛杉磯
飛去美國睇睇,先睇洛杉磯先,呢度有一個約500萬逾千呎嘅單位座落喺比華利山邊,嘩,掹車邊都叫同Justin Bieber做鄰居咁話喎。

紐約
另外睇埋出名樓價貴嘅紐約,小編初頭以為500萬要喺紐約置業簡直癡心妄想,原來都未必!喺紐約布蘭克林區,500萬多少少就可以買到個1,147平方呎嘅兩房單位。

不過,又唔係個個地方都同香港相差好遠嘅,同樣係金融中心嘅倫敦,嗰度買樓一樣好難,50萬鎊都係買得個382平方呎嘅單位,但留意返,呢個單位係位於車路士,係倫敦嘅貴價地段,就好似香港嘅中上環、半山咁既級數,大把名人同你做同區嘅鄰居!

延伸閱讀:
【買村屋6招入市秘笈】
http://www.edigest.hk/Vip/detail?id=3706

【10招令化妝樓現形】
http://www.edigest.hk/Vip/detail?id=3651
【400萬港元以下 去外地置業可以買到乜?】
http://www.edigest.hk/Vip/detail?id=1008