生不逢時 11 SKIES︳凍鍵茶專欄

當年新世界(0017.HK）就喺呢個條件下同機管局手拖手、心連心，由新世界豪擲200億元打造「機場版K11」，目標係要集齊800間商鋪同全港最大室內娛樂空間，打算食盡三跑同T2客流量；透過11 SKIES 增强新世界嘅商埸租金收益，以減少倚賴賣樓。七年之後，香港商業地產由天堂跌落地獄，只嘆11 SKIES 生不逢時，每次往機場看到設計獨特嘅一堆紫色建築物，都會問幾時先有「景」睇到呢？

開幕兩年，出租率只得四成

除咗KidZania小朋友樂園撐場，其他鋪頭租咗都唔敢開鋪住，唔怕蝕埋人力物力、燈油火蠟咩？11 SKIES最棘手之處，係新世界唔單止收唔到租，仲要為項目減值27億，真係蝕到入肉。新世界與機管局嘅合約寫明2028年起，新世界每年硬食天價保證租金！ 仲未計新世界每年其實仲比緊超過80億利息支出，本身已經夠難捱，過得一日得一日，有潛在投資者或白武士見到都嚇到褪軚啦。

11 SKIES依家似足…

而機管局早排終於公佈，T2將於2026年啟用，但首階段進駐嘅係HK Express、香港航空同東南亞廉航等，乘搭嘅旅客多數係背包友同窮遊族，購買力可能仲弱過深水埗班街坊。雖然話有天橋直通11 SKIES，但係你估班客會特登行過去買Chanel定係趕住搭Jetstar呢？11 SKIES依家似足「賭場旁邊嘅紀念品店」——賭客未到，店員自己玩手指。

新世界翻唔翻到身，都係指望於香港及大陸經濟復甦步伐，但香港失業率已攀升至3.9%，而大陸年青一輩嘅失業率亦達雙位數百分比，來港嘅旅客人數幾時才返到2018年水平亦冇人知。事實係，通關後等足六年都未復常。