富四代鍾培生狂搏出位背後？堂哥鍾培言實力派做教授 揭豪門學歷與身份暗戰？︳凍鏈茶專欄

不過，鍾培生自從同民建聯小花莊雅婷結婚生女之後，唔知係咪因為做咗阿爸生性咗，有網民問《培生擂台》會唔會請梅啟明大戰李泳漢，鍾培生以「想保持專業性」婉拒。早前仲開始做正經生意 – 投資超過港幣6,000萬元，喺家族旗下物業尖沙咀 iSQUARE 國際廣場開設 HKTCG，提供零售、卡抽及展覽等服務。

可惜佢天生惹是非，事緣Pokémon 30周年日版推出前炒風熾熱，HKTCG喺8月底先以1,980元推出卡盒連月餅禮盒套裝，其後再以每盒1,800元接受預訂。未幾，主攻藥妝零售嘅龍豐集團（2290.HK）突然加入戰團，以較低價格預售卡盒。為咗爭奪客源，HKTCG其後將預訂價調低至1,380元，龍豐再狙擊以828元接受預訂，減價戰再下一城。

其實鍾培生打跛腳都唔使憂，但人有錢就要面。佢阿爺鍾江海有兩個老婆，原配林美，二房秦蘭鳳 — 即係鍾培生阿嫲。大嫲細嫲一共生咗6個仔同埋10個女，不過一家人好低調，最為人熟悉係其中三個仔鍾棋偉、鍾仁偉，同埋鍾英偉，現時係華廈置業執行董事。鍾培生有個堂哥鍾培言（鍾培生父親鍾仁偉，而堂哥父親鍾棋偉。）

鍾培言早排教人「用脊柱唱情歌」 ，不過只係因為佢係港大矯形及創傷外科學系臨床教授，2024年獲授予明德教授席，做嘅係脊柱側彎研究，發現咗SLC6A9基因變異係青少年原發性脊柱側彎嘅主要成因。人哋講「用脊柱唱情歌」，係學術幽默，係專業人士嘅從容。

其實鍾培生自己都唔係冇學歷 — 聖保羅男女中學，16歲以拔尖身份入讀美國南加州大學，主修數學與經濟學，2012年畢業。呢個履歷，都值得光宗耀祖。不過唔通一世掛喺口邊話自己「讀過好學校」？鍾培言有嘅係「專業人士」身份，履歷係過去式，身份係現在式。呢個差距，可能就係鍾培生搏出位嘅真正原因。