[一抽盛惠七萬八] GameStop 推出萬元級卡包 官方賠率暗藏殺機 玩家大爆回購陷阱 : 抽中神卡隨時都得個桔

Pokémon 卡水漲船高，除了日本及香港大玩「獎池」「盲盒」抽卡大法之外，美國大型零售店跟風之餘仲繼續鬥大：GameStop 於 10 月 10 日推出史上最貴的自家組合包「Riptonium Pokemon Power Pack」，盛惠 $10,000 美金（約港幣 $78,000），玩家可以透過網頁進行抽卡，只得一張，玩完可以選擇寄去自己屋企，或者即場透過網頁賣出。

到底 1 萬蚊美金值唔值一抽，以下為大家再詳細講解。

官方賠率似面露笑容但暗藏殺機

今次的合作是 GameStop 與 PSA 的聯乘活動，主要基地為 GameStop 的「Power Pack」平台，付了錢後，即場開包，只得一張，抽完後如果感到失落，可以選擇將呢張虛擬卡牌保留在 GameStop 伺服器再諗下點做，又或者悻悻然地叫 GameStop 寄番實體版去自己屋企掛在牆上當做個教訓，又或者可以在 GameStop 網頁將它拍賣（賣唔賣得出由天決定）。最後手段可選「立即賣出」，讓 GameStop 以當日海鮮價買入並歸還部份善款，讓閣下可以有個好收場。

「Power Pack」高階卡包共有三款，包括「Lunar」版（$2,500 美金一抽）及「Neutronium」版（$ 5,000 美金一抽），10 月 10 號就新增今次主角，一抽一萬鎂的「Riptonium」。官方非常慷慨，同時間列出了抽中概率

唔想睇數字，一句說話就好：「閣下有 75% 的機會蝕錢」。就算好運抽中同值 1 萬美元的卡，還未計轉售費用或運輸費用；如果運氣麻麻，每抽一次就會立即蝕 $4,000 美金。

另外，官方亦實牙實齒表示，該包平均價值（未知何謂平均，可能是 1 萬包？）在數學上確實是價值 1 萬美金，而且最高可抽到的卡的價值，大概為 $156,000 美金之巨。

真實個案玩家表示「整體上都係蝕」

既然官方有出 Post，自然就有網絡組做徹底分析，有人話「So just buy 2 then? /s」（留意 /s 係反諷，作用如同「曲」），因為數字遊戲上買兩包「應該就能對沖」，反正都係五十五十。就此建議，有人立即回應「你找到漏洞了，應該買夠四包更爽。」

一名實際玩家分享：他以前買過 100 美金級別，有幸抽到 PSA 10 妙蛙花（奇異花）及 PSA 10 劍盾的騎拉帝納，「確實有機會可以抽到好卡，但整體上都係蝕錢」。

他指最大問題是回購：如果選擇即時賣回平台，手續費及回購比例令回報大跌。他又指重複垃圾填充卡比較多，三至四成機會是同一批卡，只是 PSA 認證分數不同，「我抽過七次同一張的比卡超 promo」，在 eBay 上同款數以千計，根本賣不出。

至於官方 GameStop 稱，越高階的包，就越有較好機會抽到貴卡；但官方亦同時一邊戴頭盔一邊表示，這樣做並不保證一定賺錢，另外卡值會波動，賠率每五分鐘更新。估值會以市場數據計算，並用來決定即時回購價。