極罕過億金多寶 中六合彩頭獎夠唔夠退休

樓市

某日與家人飲茶…

老爸: 「陣間記得買六合彩喎!頭獎又冇人中呀!」

弟弟: 「係呀,如果一注中,彩金過億呀!」

太太: 「咁真係要做吓善事囉…」

老爸: 「如果一注獨得,買間大一倍嘅大屋嘆吓。」

弟弟: 「而家啲新樓咁貴,唔係買到好大架咋。」

太太: 「係呀,好似北角個新盤2000呎都買唔到。」

老爸: 「冇人叫你買嗰啲咁貴架嘛。」

筆者: 「今期肯定好多人買啦,可能幾注中呢。」

老爸: 「幾注中有3000萬都好丫。」

太太: 「最緊要都係健健康康,開開心心。」

老爸: 「有3000萬都夠退休啦,到時減少工作,做多啲運動。」

筆者: 「老老實實,今時今日3000萬都未夠退休架。」

太太: 「係呀,住又貴,通脹又勁,唉~~」

老爸: 「有冇咁誇張呀?打成世工都冇3000萬啦。」

弟弟: 「打工真係難,除咗中六合彩,真係要靠投資。」

筆者: 「中頭獎都唔夠退休,香港呢個地方真係…」

每次六合彩有巨額彩金,都可以讓大家發發夢…

小賭怡情,大賭亂性,筆者當然不鼓勵賭搏,十元廿元發吓白日夢又無妨…如果中咗就點點點,當然到最後都係唔中,繼續返工,不過講吓都開心,就像老爸一樣,幾十年如一,哈哈!

悲哀是…香港地原來中頭獎都唔夠退休!

點解唔夠?一般頭獎可能只得千多萬,過去十多年,政府沒有做好供應,亂出辣招,導致樓價急升,一個樓齡30年以上,面積300呎左右的上車盤都已破400萬,如果想一家大細住得落,一個600呎左右的三房單位動輒1000萬,新樓、新式屋苑唔得添。

就算勉強買到自住樓,未有錢開飯,小朋友都未有錢讀書,即使有多寶彩金橫財3000萬,花了1000萬買樓之後,餘下2000萬,假設尚有50年,每年只有40萬,每個月只有幾萬元可用,看似慳慳哋都夠,但可惜世界有通賬,而且非常嚴重,十年八載之後就會發覺,其實就算中了頭獎,錢不夠退休。

中頭奬都唔夠?!咁要點先夠?

其實又唔使咁灰,只要懂得投資,其實少少錢已經夠。

以往我們經常說「1世人3層樓」,意思是有1層樓自住,2層樓收租,若果不用供樓,慳慳哋都夠用。以筆者及無數同學為例,7、8年前趁樓價便宜,趁息低,一變二、二變四…幾年間已達標。

今時今日難度確實高咗!據統計香港有6成以上住宅物業已供滿,照計略花心思,變現再投資就成,很多父幹、母幹由此而來。

然而最大問題是…政策!政府不斷出招,再買住宅要付15%辣稅,點儲幾層樓呢?就算有名再買一間,又如何?近年樓價飛升,租金回報不斷下跌,單靠一兩層樓收租,可以安享晚年嗎?

開闊眼光,投資有價值的資產,是必須要做的!

有人喜歡股票、債券等,都是好工具,筆者心血少,鍾情磚頭,非住宅物業,例如工商舖等;非香港住宅,例如海外樓、大陸樓等,都是選擇,可以因應你自己的能力、人脈、知識去了解,跳出舒適區,脫離熟悉的香港住宅,是辛苦的,但沒辦法,辣招所累,筆者專注於工廈與大陸樓,若有興趣可以繼續留意筆者的分享。

作者為1%投資培訓中心課程總監,教授物業投資、上車及裝修等課程。暢銷書《上車又住又賺》及《樓轉命運》作者,網誌《第一桶金》總瀏覽逾300萬人次。