中國汽車股比併 吉利同比亞迪邊個更有潛力 | 龔成信箱
成哥你好，想問中華煤氣同中國燃氣比較，係咪後者發展潛力較好。
另外，以汽車發展來說，吉利與比亞迪比較，係咪吉利會好些，因為吉利收購了Volvo ,而國內經濟環境好轉,thanks !
龔成老師：
中華煤氣（0003）會較穩健，有穩中求勝的作用。而中國燃氣（0384）的潛力會較大，見佢近年的盈利增長快速，股價的升幅以倍計，的確有潛力的，但都會小心股價較波動，因此風險比0003高。
吉利（0175）同比亞迪（1211）都是有質素，有潛力的股票，吉利的收購及海外發展的確正面，但我個人更睇好電動車的長遠發展，而比亞迪在這方面的研發一定較好（始終佢本身做電池），所以我會偏向比亞迪，但吉利都好有潛力的，你投資吉利都無問題。（對照龔成信箱：Q4851）
2.40歲想財務自由
老師你好，我早排開始睇你既問答信箱同埋書籍，知道愈早可始投資愈好，將現金變成有價值的資產
但係，由於我係投資新手，並唔係好識得準確判斷股票合理價格（因為工作關係未能參加老師既課程），所以希望以月供股票既方式平均投入股票市場，另外希望得到更加有效率的建議，基本資料如下
現年25歲，月薪25,000到30,000不等，可用儲蓄為30萬，目標係40歲前做到基本財務自由
計劃月供＄2000盈富基金
＄1000中電控股或港燈
＄1000領展房托
＄1000比亞迪股份
其實仲有港鐵公司以及建設銀行都想買
不過唔知點樣計劃買入，另外，現時計劃會唔會太保守做唔到增長既效果，希望老師能夠比小小建議。多謝
龔成老師：
唔緊要，你保持從不用的途徑增加投資知識就可以了，上堂的作用是最大，你都可以睇下遲d的課堂夾唔夾到時間，因為我每次都會在不同時間開班的。
月供部分包了不同類的股票，潛力、平穩增長、保守都有，是一個不錯的組合，可以進行。中電（0002）的增長力會比港燈（2638）高，如你想增值多一點就供中電。
至於$30萬方面，由於你是新手，同時現時市況不算平，只能動用部分資金，例如一半，同時買入時要分注，投資平穩增值股。盈富（2800）、港鐵（0066）、中銀（2388）、建行（0939）都可以投資。餘下的資金則等機會，大跌市時才動用。
如果想財務自由，要開始學習投資知識，你離40歲仍有一段時間，這時期會有很多優質股可投資，同時市況會出現上落，當中有危有機，只要你有能力就可把握到這些機會。
你保持月供，就已經是累積了一定的財富，若果能進一步把握機會，就更易成就財務自由。
因此，這刻先進行上述的財富分配，同時開始增加投資知識，我相信你40歲可以做到財務自由的！（對照龔成信箱：Q4852）
3.睇圖有冇用
老師你好，本人有買股票習慣，睇圖睇資訊，但大部分都是輸
我現在手上股票 1021 8321 8457 可否畀意見給我
龔成老師：
你要改變睇圖、消息、中短線投資這些模式，好多人以為經常買賣最賺錢，但我用以在銀行、證券行工作過的經驗用你講，經常做買賣多的客，都是蝕的一群，而長期最賺錢的一群客，就是那些買入長線的客。
全球憑投資賺錢最多的人巴菲特，佢好清楚表示，睇圖無用！所以，我會信一個有幾千億身家的人，都唔信坊間連$1億身家都無的所謂「專家」。
麥達斯控股（1021）之前的股價波動得好勁，而家更停左牌，我對這類股比較有戒心，暫時無乜野可以做，這是典型的消息股，你要跟得好貼先得。但我不建議投資這類股，如復牌還是賣出比較好。
泰錦控股（8321）主要係香港斜坡工程的總承建商，當中主要承建政府斜坡工程，工程涉及建造土釘、建造擋土牆、安裝泥石流柔性防護網等。
這類股本質應該業務穩定，但睇翻佢財務數據又唔係，之前更出現過虧損，對這類股有保留。
健升物流中國（8457）係中國提供各式各樣的物流服務，涵蓋運輸、倉儲、廠內物流等，客戶主要來自醫藥、快速消費品、包裝、健康與美容及其他行業。
但上市時間短，過往的財務數據根本無法反映真正的業務情況，相信慢慢見真章。以現時市值$2.5億來計，不算平宜。（對照龔成信箱：Q4853）
4.領展（0823）
老師，之前上完股票班後，已開始月供股票同研究如何估值，最近研究領展，發現大行預期的每股盈利同報告中的每股盈利相去甚遠，我明白這是因為物業重估的影響，但這樣是不是不能用市盈率估值呢
最近有在學習股息率投資法，是否這方法比較適用於房託收息股呢，謝謝
龔成老師：
領展（0823）正如課堂中講，有物業重估的收益，但這項收益卻沒有真正的現金流，所以當我地做分析時，往往要扣起這部分收益去考慮。
大行估值與真正盈利的差別，很大程度因為重估因素，但這部分根本不用在意，所以真正經營上的盈利，其實偏差不大的。
當我地用市盈率時，要扣除物業重估部分先計到，所以，計算上比較複雜。反而用股息去分析仲好。
因為領展定明要將90%可分派收入派股息，所以，股息與經營上的盈利，根本是十分接近的，所以不如用股息去會分析仲好。
對於房託來說，可以用股息率去分析的，這在運作上會較為方便，其實原理同市盈率都好似的。（對照龔成信箱：Q4854）
5.5年想儲100萬
你好。我22歲，初出來社會工作，我希望學你，5年內可以有100萬！
想利用每供股票：盈富、金沙、領展、中電、港鐵，每月可供7000。可以5年有$100萬嗎？
龔成老師：
你要5年儲$100萬，是有可能的，但由於你投入本金不多，所以好睇所選股票的發展，以及這幾年的經濟及企業增長情況。所以，你最好加大本金投入，機會會大增。
上述都是有質素的股票，但有平穩增值的能力，但潛力不足。如果你想增加潛力，可以照上述的股票進行月供，然後再供多$2000在比亞迪上，我認為你完成目標的機會會大增。（對照龔成信箱：Q4855）
6.感謝
老師，多謝你的回覆，我以為我的訊息石沉大海，事實上我每日都在等你的回覆。
你的回覆分析很詳細，我想知道的你都回答我了，現在經你指點我知道怎做了，萬分感謝！
龔成老師：
哈哈~唔會石沉大海的，只是發問的人太多，我會用排隊模式進行回答。如你有留意我的【龔成問答信箱】，都會見到我寫起碼幾日先覆到。
希望幫到你。
但從你的行為，可能反映出你是一個心急的人，這在投資不是好事，因為好易受氣氛影響，從而從錯決定。你要學習平常心面對事情，冷靜分析投資好重要。（對照龔成信箱：Q4856）
7.中遠海控（1919）
成哥…… 早前股市高位時，我睇報紙有評股員寫01919好有潛質，於是盲頭烏蠅係高位買左01919中遠海控。
跟住當日股價就俾人切返落去，而家仲係咁跌，買左先知賴野，接左人d貨。咁我就知個股評一係就自己渣左好多貨，一係就收左人地錢寫好呢隻股。
成哥…..你對01919點睇？
我可以繼續持有嗎？
多謝你的回覆
龔成老師：
中遠海控（1919）的質素一般，但又唔算好差，佢為國際和國內客戶提供涵蓋整個航運價值鏈的集裝箱航運、乾散貨航運、物流、碼頭及集裝箱租賃。不過近年的增長就唔算強，暫時睇前景只屬一般。
雖然前景只屬一般，但這股可以守的，不用太擔心，你暫時持有住先。你等到升翻先放啦，但緊記不要再增持。（對照龔成信箱：Q4857）
8.債券
老師，想問債券值得投資？
有高息但風險都高？
我見有年期100年的債券，有7%息。
龔成老師：
如果企業穩健，基本上債券都穩健，是可以投資的項目，風險不高的。但都有些事要注意。
債券只是「產品」，不是「資產」，優質股、物業才是資產（詳見《大富翁致富藍圖》）。我地都可以投資產品，但就應該更集中在資產上。
另外，債券的價值都會有上落的，如果你一直持有至到期，每年收息7%，當然無問題，但如果你中途要賣出，就要用當時的市價賣出，你可能有賺有蝕，這就是風險所在。
當外圍加息（加少少不太大影響），若加較多時，你的債券價格會下跌不少，因為無風險的利率都不差，你持有的債券吸引力自然減少，所以價就會跌。（對照龔成信箱：Q4858）
9.平安（2318）恆生（0011）
平保 及 恆生值得入?
幾錢入才理想? 收息定增長型?
龔成老師：
平安（2318）同恆生（0011）都有質素，有增長力，可作長線投資的。
平安的發展不錯，甚至比中人壽（2628）更好，我相信仍的前景仍然正面，但要留意，壽險公司會將浮存金用作投資，即是將當中的資產，部分分配在股市上。
當股市上升，佢的資產自然增值，股價會反映這情況。但反映，如果股市回落，佢的股價都會跌。
因此，平安在股市上升時，股價都會上升，但這總升幅未必是直接價值上的上升。所以，這刻佢股價其實有少少貴，最好只小注，或分注買入。這股的股息率不高，不太適合作為收息股。
至於恆生，這股正面的，但只會平穩發展，最近升左唔少，分注買入較好，收息及平穩增長都可以。以質素來說，佢同中銀香港（2388）是最好的兩隻，但兩隻的股價都不平宜，所以分注，或月供模式最好。（對照龔成信箱：Q4859）
10.10萬元點投資
老師你好，小弟現年22歲，但資產吾多只有大約十萬，我應該怎樣去投資去增加自己財富呢？
龔成老師：
儲更多錢十分重要，因為初期資金是彈藥，你無彈藥就無得滾大財富，所以，趁你後生，盡一切的方法儲錢，我初出來做野，正職人工$8000，但我努力做兼職，努力儲錢，都可以一個月儲$10000，我相信，你都可以的！
當然，現時的$10萬都可以好好利用，人生累積財富的方法係「先增值，後現金流」，你年輕，可承受較可風險，同時複息回報最強，可以投資「潛力股」+「平穩增值股」，但由於你經驗唔多，一定要增加投資知識，先可以投資潛力股，現時只可小注潛力股。（當然，我希望你快速提升你的投資知識）。
平穩增值股你可考慮盈富（2800）、金沙（1928）、中銀（2388）、長建（1038）、港鐵（0066）等，長線投資，慢慢令財富增值。
由於現時市況處不平水平，你只可動用其中的$50000，餘下的持有現金等機會。在買入股票時，一定要分注，又或以月供股，令這筆財富合理增值。
年輕係你最大的本錢，努力儲錢，學投資知識，我相信你日後可以滾到相當的財富！（對照龔成信箱：Q4860）編按：龔成是於公屋長大的80後青年，畢業後於銀行從事投資相關工作，雖然月薪僅萬多元，但因為理財及投資有道，只花五年時間，於28歲已累積到100萬元資產，目前淨流動資產有數百萬元。著有暢銷書《80後百萬富翁》、《80後2百萬富翁》及《財務自由行》，並出任創富課程導師。
facebook專頁：facebook.com/80shing
個人網站：80shing.skx io/
延伸閱讀：
90後有$9萬積蓄 想用$6萬投資錢搵錢
